Pakadto ha sulod

Pakadto ha mga sulod

 MAY-ADA BA NAGDISENYO HITO?

An Barahibo han Sea Otter

An Barahibo han Sea Otter

DAMU nga hayop nga nabubuhi ha mahagkot nga katubigan an may madakmol nga tambok ha ilarom han ira panit basi diri hira hagkuton. Pero an sea otter may iba nga proteksyon kontra ha kahagkot​—an ira madakmol nga barahibo.

Tagda ini: An barahibo han sea otter mas sùsò kay han kanan iba nga hayop​—mga 155,000 an barahibo hito ha kada kwadrado sentimetro. Kon nalangoy, an barahibo han sea otter nabulig nga an hangin nga tikang ha iya lawas diri makagawas. Ito nga hangin nagigin sugad hin insulator nga nabulig nga an matugnaw nga tubig diri makadukot ha panit han otter ngan makawara han kapaso han lawas hito.

Natoo an mga syentista nga may mahibabaroan hira tikang ha barahibo han sea otter. Nag-eksperimento hira ha damu nga bado nga hinimo ha artipisyal nga barahibo nga iba-iba an kahilaba ngan kadakmol. Hinbaroan nira nga kon “mas sùsò ngan mas hilaba an barahibo, mas mamara o mas diri nahuhulos an panit.” Salit masisiring nga maopay gud an barahibo han sea otter.

Naglalaom an mga eksperto nga an ira mga eksperimento magriresulta ha pag-uswag ha teknolohiya han paghimo ngan produksyon han mag-opay gud nga mga tela nga diri nahuhulos. Tungod hito, an pipira bangin maghunahuna nga adton kinahanglan mag-dive ha matugnaw nga katubigan diri hahagkuton kon magsusul-ot hira hin bado nga barahiboon nga pariho han kanan sea otter!

Ano ha imo panhunahuna? An barahibo ba han sea otter nga sugad hin insulator produkto han ebolusyon, o may nagdisenyo hito?