Pakadto ha sulod

Pakadto ha mga sulod

 AN DALAN HAN KALIPAY

Pagpasaylo

Pagpasaylo

“HAN BATA PA AKO, PIRME AKO NAKAKABATI HIN PANGINSULTO NGAN GUGLIATAY,” siring ni Patricia. “Waray ako mahibaro ha pagpasaylo. Bisan han daku na ako, nagdudumot ako salit diri ako nahingangaturog.” Oo, an kinabuhi nga puno hin kasina ngan pagdumot diri malipayon o diri maopay ha kahimsog. Ha pagkamatuod, iginpapakita han mga pagsaliksik nga an diri mapinasayloon nga mga tawo mahimo . . .

  • Magtugot han ira kasina o pagdumot nga makadaot han ira relasyon ha iba, nga nagriresulta han ira pag-usahan ngan kasubo

  • Mainsulto dayon, magkinabaraka, o madepres hinduro

  • Magsentro han ira hunahuna ha sayop salit diri na hira nagigin malipayon

  • Umabat nga diri nira nasusunod an ira espirituwal nga mga prinsipyo

  • Makaeksperyensya han paghitaas han istres ngan han posibilidad nga magkasakit, upod na an alta-presyon, sakit ha kasingkasing, ngan kaul-ol han kalawasan, sugad han arthritis ngan sakit ha ulo *

ANO AN PAGPASAYLO? An pagpasaylo nangangahulogan ha pagdispensa han nakasala ha imo ngan pagwara han imo kasina, pagdumot, ngan pag-ikaburulos. Diri ito nangangahulogan ha pagkonsinter, pagminos han sayop, o pagbalewaray han nahitabo. Lugod, an pagpasaylo usa nga ginhunahuna hin maopay nga desisyon nga nagpapakita hin mahigugmaon nga hingyap ha pagkaada kamurayawan ngan pagtipig hin maopay nga relasyon ha iba.

An pagpasaylo nagpapakita liwat hin pagsabot. Nasasabtan han mapinasayloon nga tawo nga kita ngatanan nakakasayop o nakakasala, ha pulong ngan ha buhat. (Roma 3:23) May kalabotan hito, an Biblia nasiring: “Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba.”—Colosas 3:13.

Kon sugad, makatadunganon an paghunahuna nga an pagpasaylo usa nga importante nga bahin han gugma, nga amo “an hingpit nga bugkos han pagkaurosa.” (Colosas 3:14) Ngani, sumala ha website han Mayo Clinic, an pagpasaylo nagriresulta ha . . .

  •   Mas maopay nga relasyon ha iba, pagkaada empatiya, pagsabot, ngan pagpaid ha nakasala ha imo

  • Mas mahimsog nga panhunahuna ngan maopay nga espirituwalidad

  • Kaibani han kabaraka, istres, ngan kasina

  • Mas hamubo nga posibilidad nga madepres

PASAYLOA AN IMO KALUGARINGON. An pagpasaylo ha kalugaringon posible nga “makuri hinduro buhaton,” kondi “importante gud ha kahimsog”—ha mental ngan pisikal—sumala han barasahon nga Disability & Rehabilitation. Ano an makakabulig ha imo basi mapasaylo mo an imo kalugaringon?

  • Ayaw paglaom hin kahingpitan ha imo kalugaringon, lugod magin reyalistiko ngan karawata nga nakakasayop ka pariho han iba.—Eklesiastes 7:20

  • Mahibaro tikang han imo mga sayop basi mas malikyan mo nga mautro ito

  • Magin pasensyoso ha imo kalugaringon; may mga kaluyahan ngan maraot nga nahiaraan nga diri dayon nawawara.—Efeso 4:23, 24

  • Pakig-upod ha kasangkayan nga makapadasig, positibo, ngan buotan pero tangkod ha imo.—Proberbios 13:20

  • Kon nakasakit ka ha iba, karawata ito ngan pangaro dayon hin pasaylo. Kon makikigmurayaw ka, magkakaada ka kamurayawan ha hunahuna.—Mateo 5:23, 24

EPEKTIBO GUD AN MGA PRINSIPYO HA BIBLIA!

Katapos mag-aram han Biblia, hi Patricia nga gin-unabi kanina, nahibaro pagpasaylo. “Nagkaada ako kagawasan tikang ha kasina nga nakadaot ha akon kinabuhi,” siring niya. “Diri na ako nag-aantos, ngan diri na nag-aantos an iba tungod ha akon. An mga prinsipyo ha Biblia nagpapamatuod nga hinigugma kita han Dios ngan karuyag niya an pinakamaopay ha aton.”

An lalaki nga hi Ron nagsiring: “Diri ko makukontrol an panhunahuna ngan panggawi han iba. Pero makukontrol ko an akon panhunahuna. Kon karuyag ko magkaada kamurayawan, kinahanglan diri na ako magdinumot. Nahunahuna ko nga imposible magkaada kamurayawan kon may pagdumot ako. May-ada na ako maopay nga konsensya yana.”

^ par. 8 Reperensya: Mga website han Mayo Clinic ngan Johns Hopkins Medicine ngan an barasahon nga Social Psychiatry and Psychiatric Epidemiology.