Pakadto ha sulod

Pakadto ha mga sulod

 MAY-ADA BA NAGDISENYO HITO?

An Nakakabilib nga Pansagang ha Kapaso han Saharan Silver Ant

An Nakakabilib nga Pansagang ha Kapaso han Saharan Silver Ant

AN Saharan silver ant (Cataglyphis bombycina) usa han mga hayop ha tuna nga nakakailob han sobra nga kapaso. Kon tungod ha kapaso han kaudtuhon namimiling hin landong an mga mananap nga nakaon hini nga tubak, nagawas ini nga tubak ha ira urukyan basi madagmit nga mamiling hin pagkaon, sugad han mga insekto nga namatay ha duro nga kapaso.

[50] μm

Tagda ini: Ini nga tubak napapanalipdan han duro nga kapaso tungod han nakatabon nga naiiba nga klase hin barahibo ha bungkog ngan ha gilid han lawas, ngan han waray barahibo nga dughan hito. An mga barahibo nga amo an nagpapainggat hini nga tubak, gudtiay gud hinduro ngan sugad hin tubo nga trianggulo an porma. Garatudgatod an bahin han barahibo nga nakaekspos, samtang an bahin han barahibo nga nadukot ha panit mahamis. Ini nga pagkadisenyo may duha nga nahihimo. Siyahan, ginsasagang hini an kapaso tikang ha adlaw. Ikaduha, ginpapaluya hini an epekto han kapaso nga naa-absorb han lawas tikang ha palibot. Samtang an waray barahibo nga dughan han tubak nagsasagang han mapaso nga alisngaw han baras han disyerto. *

[10] μm

An nakakabilib nga pansagang ha kapaso hini nga tubak nabulig ha iya nga matipigan an temperatura han iya lawas nga diri lumabaw ha pinakamapaso nga temperatura nga maiilob hito—53.6 digri sentigrado. Tungod kay nainteres hinin gutiay nga linarang, nangangalimbasog an mga parasaliksik nga maghimo hin espesyal nga mga kobre nga magpapalaksi ha pagpatugnaw, bisan kon waray iba nga gamiton sugad han bentilador.

Ano ha imo panhunahuna? An nakakabilib ba nga pansagang ha kapaso han Saharan silver ant produkto han ebolusyon, o may nagdisenyo hito?

^ par. 4 Ini nga tubak may-ada liwat espesyal nga mga protina ha lawas nga diri masayon maubos bisan pa han duro nga kapaso, hilaba nga mga tiil salit natukal ito ha mapaso nga baras ngan nakakadalagan hin malaksi, ngan nakakabilib nga abilidad ha pagnabigar salit madagmit gud ito nga nakakabalik ha buho nga gin-uukyan hito.