1. Paonan-o ginpakusog han Dios an iya magtinumanon nga surugoon ha naglabay?

 AGSOB ihulagway han Pulong han Dios an matinumanon nga kalalakin-an sugad nga makusog. Pero bisan an pinakamakusog ha ira diri pirme naabat nga makusog hiya. Pananglitan, ha pipira nga kahimtang inabat ni Hadi David nga ‘marig-on hiya sugad hin bukid,’ pero may mga panahon nga ‘nahadlok gud hiya.’ (Sal. 30:7) Bisan kon hi Samson makusog hinduro han ginpagios hiya han espiritu han Dios, ginkarawat niya nga kon diri tungod han gahum han Dios, ‘magigin maluya hiya ngan magigin pariho han ngatanan nga iba pa nga tawo.’ (Huk. 14:5, 6; 16:17) Inin magtinumanon nga kalalakin-an nagin makusog la tungod han gahum nga iginhatag ni Jehova ha ira.

2. Kay ano nga nakasiring hi apostol Pablo nga maluya hiya pero makusog? (2 Corinto 12:9, 10)

² Gin-amin ni apostol Pablo nga kinahanglan niya an gahum nga tikang kan Jehova. (Basaha an 2 Corinto 12:9, 10.) Pariho han damu ha aton, hi Pablo nagkaada liwat mga problema ha kahimsog. (Gal. 4:13, 14) May panahon nga nakukurian liwat hiya nga buhaton an tama. (Roma 7:18, 19) Ngan usahay naabat hiya hin kabaraka ngan kawaray-kasigurohan. (2 Cor. 1:8, 9) Pero han hi Pablo maluya, nagin makusog hiya. Paonan-o? Gintagan ni Jehova hi Pablo hin kusog nga iya ginkikinahanglan basi mailob an mga kakurian.

3. Ano nga mga pakiana an babatunon ta hini nga artikulo?

³ Hi Jehova nagsasaad nga pakukusgon liwat kita niya. (1 Ped. 5:10) Pero diri kita makakalaom nga makakarawat naton an iya bulig kon waray kita hihimoon. Ha pag-ilustrar, an makina mahimo makapaandar ha usa nga awto. Pero kinahanglan tamakan han drayber an silinyador basi hiya makakadto ha iba nga lugar. Ha pariho nga paagi, andam hi Jehova ha paghatag ha aton hin  kusog nga aton ginkikinahanglan, pero dapat may himoon kita basi magpahimulos tikang hito. Ano an igintatagana ni Jehova basi magin makusog kita? Ngan ano an dapat naton himoon basi makarawat ito? Mahibabaroan naton an mga baton hito pinaagi ha paghisgot kon paonan-o ginparig-on ni Jehova an tulo nga tawohan ha Biblia—hi propeta Jonas, hi Maria nga nanay ni Jesus, ngan hi apostol Pablo. Mahibabaroan liwat naton kon paonan-o padayon nga ginpaparig-on ni Jehova ha pariho nga mga paagi an iya mga surugoon yana.

4. Paonan-o naton makakarawat an kusog nga tikang kan Jehova?

⁴ An usa nga paagi nga makakarawat naton an kusog nga tikang kan Jehova amo an pagdaop ha iya ha pag-ampo. Sugad nga baton ha aton mga pag-ampo, mahimo kita tagan ni Jehova han “diri ordinaryo nga gahum.” (2 Cor. 4:7) Mapapakusog liwat kita kon babasahon naton an iya Pulong ngan papamalandungon ito. (Sal. 86:11) An mensahe ni Jehova ha aton nga mababasa ha Biblia “gamhanan.” (Heb. 4:12) Kon mag-aampo ka kan Jehova ngan babasahon an iya Pulong, makakarawat mo an kusog nga imo ginkikinahanglan basi makapailob, matipigan an imo kalipay, o matuman an usa nga makuri nga toka. Tigamni kon paonan-o ginpakusog ni Jehova hi propeta Jonas.

5. Kay ano nga hi propeta Jonas nagkinahanglan hin kusog?

⁵ Hi propeta Jonas nagkinahanglan hin kusog. Pumalagiw hiya tikang ha makuri nga toka nga iginhatag ha iya ni Jehova. Sugad nga resulta, hapit na hiya mamatay tungod ha makusog nga bagyo ngan iginbutang niya ha peligro an kinabuhi han iya mga kaupod ha barko. Han iginlabog hiya ha dagat, ginlamoy hiya han daku nga isda. Salit hi Jonas nahingadto ha usa nga makaharadlok nga lugar—ha tiyan han daku nga isda. Ha imo hunahuna, ano an gin-abat ni Jonas? Naghunahuna ba hiya nga mamamatay na hiya didto? Posible ba nga ginhunahuna niya nga ginsalikway na hiya ni Jehova? Sigurado nga nabaraka gud hi Jonas.

6. Sumala ha Jonas 2:1, 2, 7, ano an nagpakusog kan Jonas han nakadto hiya ha tiyan han isda?

⁶ Ano an ginbuhat ni Jonas basi magkaada kusog han nag-uusahan hiya ha tiyan han isda? An usa hito amo an pag-ampo. (Basaha an Jonas 2:1, 2, 7.) Bisan kon waray niya sugta hi Jehova, nagbasol hiya ngan may pagtoo nga pamamatian ni Jehova an iya pag-ampo. Ginpamalandong liwat niya an Kasuratan. Kay ano nga nakasiring kita hito? Ha iya pag-ampo nga nakarekord ha Jonas kapitulo 2, naggamit hiya hin mga pulong nga pariho han mababasa ha Salmo. (Pananglitan, ikompara an Jonas 2:2, 5 ha Salmo 69:1; 86:7.) Matin-aw, pamilyar gud hi Jonas hito nga mga sinurat. Ngan pinaagi ha pagpamalandong hito ha panahon han iya kakurian, gin-abat niya nga bubuligan hiya ni Jehova. Ha urhi, nakabalik hi Jonas ha mamara nga tuna, ngan andam na hiya pagkarawat ngan pagtuman han iya sunod nga toka.—Jon. 2:10–3:4.

7-8. Paonan-o an usa nga brother ha Taiwan nagkaada kusog han inatubang hiya hin mga problema?

⁷ An ehemplo ni Jonas makakabulig ha aton kon naatubang kita hin magkadurodilain nga problema. Pananglitan, hi Zhiming b nga usa nga brother ha Taiwan, may-ada grabe nga sakit. Dugang pa, kinahanglan liwat niya ilubon an duro nga pagkontra han iya pamilya tungod han iya pagtoo kan Jehova. Ginpapakusog hiya ni Jehova pinaagi han pag-ampo ngan pag-aram. “Usahay, kon may nabangon nga problema,” siring niya, “naabat ako hin sobra nga kabaraka ngan nakukurian pagkalma, salit diri ko  na nahihimo an akon personal nga pag-aram.” Pero sinarig hiya kan Jehova para hin bulig. “Siyahan, nag-aampo ako kan Jehova,” siring niya. “Katapos, nag-i-earphone ako ngan namamati ha mga Kingdom song. May mga panahon pa ngani nga ginkakanta ko ito ha mahinay nga tingog tubtob nga kumalma ako. Katapos nagtitikang na ako pag-aram.”

⁸ An personal nga pag-aram nagparig-on kan Zhiming ha diri ginlalaoman nga mga paagi. Pananglitan, samtang nagpapaopay hiya ha iya operasyon, ginsidngan hiya han nars nga kinahanglan niya magpaabuno hin dugo tungod kay hamubo an iya pula nga selyula. Pero han gab-i antes an iya operasyon, ginbasa ni Zhiming an eksperyensya han usa nga sister nga pariho han iya sitwasyon. An pula nga selyula hito nga sister mas hamubo kay han iya; bisan pa hito, waray magpaabuno an sister ngan nakarekober. An eksperyensya han sister nagparig-on kan Zhiming nga magpabilin nga matinumanon.

9. Kon sobra ka nga nababaraka tungod han problema, ano an puydi mo buhaton? (Kitaa liwat an mga piktyur.)

⁹ Kon nagkakaproblema ka, may panahon ba nga diri mo naisusumat hin maopay kan Jehova an imo mga inaabat? O inaabat mo ba nga waray ka na kusog para mag-aram? Hinumdumi nga nasasabtan gud ni Jehova an imo sitwasyon. Salit bisan kon simple la an imo pag-ampo, makakasiguro ka nga ihahatag niya kon ano gud an imo kinahanglan. (Efe. 3:20) Kon nakukurian ka pagbasa ngan pag-aram tungod kay may sakit ka, kinakapoy, o sobra nga nababaraka, puydi mo pamatian an audio rekording han Biblia o han aton mga publikasyon. Puydi ka liwat mamati ha usa han aton mga kanta o magkita hin video ha jw.org. Pinaagi ha pag-ampo kan Jehova ngan pagpamiling hin baton dida ha espirituwal nga mga tagana nga iya iginhahatag, gin-aaghat mo hiya nga pakusgon ka.

10. Paonan-o kita ginpaparig-on han aton Kristiano nga kabugtoan?

¹⁰ Puydi gamiton ni Jehova an aton Kristiano nga kabugtoan basi pakusgon kita. Mahimo hira maghatag hin “daku nga pagliaw” kon naatubang kita hin problema o kon nakukurian kita ha pagtuman ha usa nga makuri nga toka. (Col. 4:10, 11) Labi na nga nagkikinahanglan kita hin kasangkayan “ha mga panahon han kasakitan.”  (Prob. 17:17) Kon nanluluya kita, mahimo kita buligan han aton mga igkasi-magsiringba ha pisikal, emosyonal, ngan espirituwal. Pansina kon paonan-o ginparig-on han iba hi Maria nga nanay ni Jesus.

11. Kay ano nga kinahanglan ni Maria hin kusog?

¹¹ Kinahanglan ni Maria hin kusog ha pagbuhat han kaburut-on ni Jehova. Hunahunaa an kabaraka nga gin-abat ni Maria han nakakarawat hiya hin mabug-at nga toka tikang ha anghel nga hi Gabriel. Waray pa hiya asawa; pero magbuburod hiya. Waray pa hiya eksperyensya ha pagpadaku hin anak, pero kinahanglan niya atamanon an bata nga magigin Mesias. Ngan tungod kay waray pa hiya magkaada seksuwal nga relasyon, paonan-o niya isusumat ini ngatanan ha iya maarasawa nga hi Jose?—Luc. 1:26-33.

12. Sumala ha Lucas 1:39-45, paonan-o nakarawat ni Maria an kusog nga iya ginkikinahanglan?

¹² Paonan-o nagkaada hi Maria hin kusog nga iya kinahanglan basi matuman inin talagsahon ngan mabug-at nga toka? Nangaro hiya hin bulig ha iba. Pananglitan, nangaro hiya kan Gabriel hin dugang nga impormasyon may kalabotan ha iya toka. (Luc. 1:34) Waray pag-iha katapos hito, nagbiyahe hiya ngadto ha “bukiron nga rehiyon” han Juda basi bisitahon an iya paryente nga hi Elizabeth. Sulit gud ito nga pagbiyahe. Ginkumendasyonan ni Elizabeth hi Maria ngan gin-giyahan hiya ni Jehova ha pagsumat hin usa nga makaparig-on nga tagna mahitungod ha waray pa matawo nga anak ni Maria. (Basaha an Lucas 1:39-45.) Hi Maria nagsiring nga “nagbuhat [hi Jehova] hin gamhanan nga mga butang pinaagi han iya butkon.” (Luc. 1:46-51) Pinaagi kanda Gabriel ngan Elizabeth, ginparig-on ni Jehova hi Maria.

13. Paonan-o ginbalosan an sister nga taga-Bolivia han nangaro hiya hin bulig ha iya mga igkasi-magsiringba?

¹³ Pariho kan Maria, mapaparig-on ka liwat han imo mga igkasi-magsiringba. Hi Dasuri, nga sister ha Bolivia, nagkinahanglan hin sugad nga pagparig-on. Han an iya tatay nadayagnos nga may grabe nga sakit ngan nahospital, kinaburut-on nga gin-ataman niya an iya tatay. (1 Tim. 5:4) Diri ito masayon. Nagsiring hiya, “Damu ka beses nga inabat ko nga diri ko na kaya.” Nagpabulig ba hiya? Ha siyahan, waray. “Diri ko karuyag makapabug-at ha kabugtoan,” siring niya. “Nangatadongan ako, ‘Hi Jehova an maghahatag han bulig nga akon ginkikinahanglan.’ Pero nasantop ko nga kon iginbubulag ko an akon kalugaringon, ginsusolo ko la pag-atubang an akon mga problema.” (Prob. 18:1) Nagdesisyon hi Dasuri nga magsurat ha pipira niya nga sangkay basi isumat an iya sitwasyon. “Diri ko gud maisaysay kon paonan-o ako naparig-on han akon hinigugma nga mga igkasi-Kristiano,” siring niya. “Nagdadara hira hin pagkaon ha hospital ngan nagbabasa hin teksto. Maopay gud ha pag-abat nga diri kita nag-uusahan. Bahin kita han daku nga pamilya ni Jehova—usa nga pamilya nga andam bumulig ha imo, magtangis kaupod mo, ngan magdasig ha imo nga padayon nga mag-alagad kan Jehova kaupod nira.”

14. Kay ano nga dapat naton karawaton an bulig han mga tigurang?

¹⁴ Usa han ginagamit ni Jehova ha pagparig-on ha aton amo an mga tigurang. Mga regalo hira nga ginagamit niya basi mapakusog kita ngan marepreskohan. (Isa. 32:1, 2) Salit kon nababaraka ka, isumat ito ha mga tigurang. Ayaw pag-alang ha pagkarawat han ira bulig. Pinaagi ha ira, mapapakusog ka ni Jehova.

15. Ano nga paglaom an ginpapabilhan han ngatanan nga Kristiano?

¹⁵ An aton paglaom nga basado ha Biblia makakaparig-on ha aton. (Roma 4:3, 18-20) Sugad nga mga Kristiano, may-ada kita presyoso gud nga paglaom nga mabuhi ha waray kataposan—ha iginpahiuli nga paraiso dinhi ha tuna o ha  Ginhadian ha langit. An aton paglaom nagpaparig-on ha aton nga ilubon an mga problema, isangyaw an maopay nga sumat, ngan tumanon an iba-iba nga toka ha kongregasyon. (1 Tes. 1:3) Ito gihap nga paglaom an nagparig-on kan apostol Pablo.

16. Kay ano nga kinahanglan hin kusog ni apostol Pablo?

¹⁶ Hi Pablo nagkikinahanglan hin kusog. Ha iya surat ha mga taga-Corinto, iginpariho niya an iya kalugaringon ha maluya nga surudlan nga hinimo ha lapok. “Gin-iipit gud” hiya, ‘diri maaram han hihimoon,’ “gintitimaraot,” ngan “gintutumba.” Nameligro pa ngani an iya kinabuhi. (2 Cor. 4:8-10) Iginsurat ni Pablo ito nga mga pulong ha iya ikatulo nga pagbiyahe sugad nga misyonero. Ha panahon han iya pagsurat hito, diri hiya maaram nga mas damu pa nga kakurian an iya aatubangon. Kakastiguhon hiya han mga tawo, aarestuhon, piprisuhon, ngan makakaeksperyensya hin kalunod han barko.

17. Sumala ha 2 Corinto 4:16-18, ano an nagpakusog kan Pablo basi mailob an mga kakurian?

¹⁷ Hi Pablo nagkaada kusog nga makailob kay nagpokus hiya ha iya paglaom. (Basaha an 2 Corinto 4:16-18.) Ginsidngan niya an mga taga-Corinto nga bisan kon an iya lawas “nagtitikaluya,” diri niya ito tutugotan nga magpaundang ha iya. Nagpokus hi Pablo ha iya paglaom ha tiarabot. An iya paglaom nga mabuhi hin waray kataposan ha langit “mas labaw gud” kay han bisan ano nga kakurian nga iya naeksperyensyahan. Ginpamalandong ni Pablo ito nga paglaom, ngan sugad nga resulta, inabat niya nga ‘nababag-o hiya kada adlaw.’

18. Paonan-o an paglaom nagparig-on kan Tihomir ngan ha iya pamilya?

¹⁸ Hi Tihomir, nga usa nga brother ha Bulgaria, naparig-on tungod han iya paglaom. Damu ka tuig na an naglabay, an iya manghod nga lalaki nga hi Zdravko, namatay ha usa nga aksidente. Tungod hito, inabat hi Tihomir hin duro nga kasubo ha sulod hin pipira ka panahon. Basi maliaw, gin-iimadyin niya ngan han iya pamilya kon ano an mahitatabo ha pagkabanhaw. Hiya nagsaysay: “Pananglitan, ginhihisgotan namon kon diin namon tatapoon hi Zdravko, kon ano nga pagkaon an amon lulutoon ha iya, kon hin-o an amon iimbitaron ha siyahan nga pagturotarampo  kon mabanhaw na hiya, ngan kon ano an amon isusumat ha iya mahitungod ha kataposan nga mga adlaw.” Nagsiring hi Tihomir nga an pagpokus ha ira paglaom nagparig-on ha ira pamilya basi padayon nga mag-ilob ngan maghulat ha panahon nga banhawon na ni Jehova an iya bugto.

19. Ano an imo puydi buhaton basi maparig-on an imo paglaom? (Kitaa liwat an piktyur.)

¹⁹ Paonan-o mo mapaparig-on an imo paglaom? Kon pananglitan an imo paglaom amo an mabuhi hin waray kataposan dinhi ha tuna, basaha kon paonan-o ginhuhulagway han Biblia an Paraiso ngan pamalandonga ito. (Isa. 25:8; 32:16-18) Hunahunaa kon ano an magigin kinabuhi ha bag-o nga kalibotan. Imadyina nga aadto ka. Hin-o an imo nakikita didto? Ano nga mga tunog an imo nababatian? Ano an imo inaabat? Basi mas gumana an imo imahinasyon, pagkita hin mga piktyur ha aton mga publikasyon nga naghuhulagway han Paraiso o pagkita hin music video, sugad han Ha Bag-o nga Tuna, Hirani Na Gud Matuman, o Kamurayawan—Aadi Na! Kon pirme naton huhunahunaon an aton paglaom ha bag-o nga kalibotan, an aton mga problema magigin “temporaryo la ngan magaan.” (2 Cor. 4:17) Pinaagi han paglaom nga iginhahatag ha imo ni Jehova, mapaparig-on ka niya.

20. Bisan kon nanluluya kita, paonan-o kita magkakaada kusog?

²⁰ Bisan kon nanluluya kita, “pinaagi ha Dios magkakaada [kita] hin gahum.” (Sal. 108:13) Ginhatag na ni Jehova an imo kinahanglan basi makarawat an kusog nga tikang ha iya. Salit kon kinahanglan mo hin bulig basi matuman an usa nga toka, mailob an usa nga problema, o matipigan an imo kalipay, sinsero nga pag-ampo kan Jehova ngan pangaro han iya giya pinaagi han personal nga pag-aram. Karawata an pagparig-on han imo Kristiano nga kabugtoan. Pirme paggahin hin panahon basi pamalandungon an imo paglaom. Kon bubuhaton mo ito ‘mapaparig-on ka han daku nga gahum uyon ha mahimayaon nga pagkagamhanan han Dios basi bug-os nga makailob ka nga may pagpasensya ngan kalipay.’—Col. 1:11.