Pakadto ha sulod

Pakadto ha mga sulod

 BULIG PARA HA PAMILYA | PAG-ASAWA

Kon Paonan-o Aatubangon an Diri Pagkapariho

Kon Paonan-o Aatubangon an Diri Pagkapariho

AN PROBLEMA

Mahilig ka ha isport pero mas karuyag han imo asawa an pagbinasa. Metikuloso ka ngan organisado pero an imo asawa masarang. Makitawo ka pero an imo asawa diri.

‘Magkaiba gud kami!’ siring mo ha imo kalugaringon. ‘Kay ano nga waray namon ito makita han mag-uyab pa la kami?’

Posible nga nakita gud niyo ito. Pero hadto bangin andam kamo nga igbalewaray an iyo mga ginkakaibahan basi malikyan an samok—usa nga butang nga kinahanglan niyo buhaton utro, yana nga mag-asawa na kamo. Ini nga artikulo mabulig ha iyo nga mabuhat ito. Kondi siyahan, tagda an pipira nga impormasyon mahitungod ha diri pagkapariho.

AN SADANG MO HIBAROAN

Seryoso an pipira nga diri pagkapariho. Ha panahon han pagin mag-uyab, importante an paghibaro kon magkauyon ba an mag-uyab. Salit, kon may nakikita an mag-uyab nga seryoso nga diri nira ginkakaparihoan, damu an nagbubulag imbes nga sumulod ha masamok nga pag-asawa. Pero kumusta man an diri seryoso nga diri pagkauyon—adton diri nalilikyan han mga mag-asawa?

Waray duha nga tawo nga magkapariho gud. Salit, normal la ha mag-asawa nga diri magkapariho ha usa o sobra pa hini nga masunod:

Hilig. “Waray gud ako hilig magpahalibway ha gawas han balay,” siring han usa nga asawa nga hi Anna, * “pero mahilig an akon bana sumagka ha nagyiyelo nga kabukiran ngan magbinaktas ha kagurangan hin pipira ka adlaw.”

Nahiaraan. “An akon asawa diri dayon nakaturog pero nakakamata la gihapon hiya ha alas-5 ha aga, kondi kinahanglan ko hin pito tubtob walo ka oras nga katurog kay kon diri, madali ako maaringit,” siring han bana nga hi Brian.

Kinaiya. Bangin awdanon ka, pero an imo asawa maistoryahon. “Nagdaku ako nga diri maistoryahon han akon mga problema, pero an akon asawa tikang ha pamilya diin gin-iistoryahan an tanan nga butang,” siring han bana nga hi David.

May-ada kaopayan an diri pagkapariho. “Bangin maopay an akon pamaagi, pero diri karuyag sidngon nga ito la an paagi,” siring han usa nga asawa nga hi Helena.

 AN IMO MAHIMO BUHATON

Magin andam ha pagsuporta. Hi Adam nagsiring: “An akon asawa, hi Karen, waray gud interes ha isport. Pero naupod hiya ha akon ha pipira nga uyag ngan nagtsi-cheer pa ngani. Hi Karen mahilig ha mga museo, salit gin-uupdan ko hiya ngan ginpapabay-an tubtob han iya karuyag. Nangangalimbasog gud ako nga maruyagan an art tungod kay ito an iya hilig.”Prinsipyo ha Biblia: 1 Corinto 10:24.

Magkaada abrido nga hunahuna. Diri masisiring nga sayop an panhunahuna han imo asawa tungod la kay naiiba ito ha imo panhunahuna. Ito an hinbaroan ni Alex. “Natoo ako hadto nga usa la an epektibo nga paagi ha pagbuhat han mga butang, ngan an iba nga paagi diri epektibo,” hiya nagsiring. “Pero han nag-asawa ako, hinbaroan ko nga damu ngay-an an paagi ngan epektibo an tagsa hito.”Prinsipyo ha Biblia: 1 Pedro 5:5.

Magin reyalistiko. An pagin kompatibol diri nangangahulogan hin pagin magkapariho. Salit ayaw hunahunaa nga pakyas an iyo pag-asawa tungod la kay may nakita kamo nga diri niyo ginkakaparihoan. An libro nga The Case Against Divorce nasiring: “Damu nga tawo an narason, ‘Nabutahan ako han gugma.’” Kondi ito nagdugang: “An iyo adlaw-adlaw nga malipayon nga pag-upod nagpapakita nga bisan ano pa an iyo diri ginkakaparihoan, mahimo niyo higugmaon an kada tagsa.” Pangalimbasog nga “padayon nga mag-inantosay . . . bisan kon may hinungdan an usa ha pagreklamo.”Colosas 3:13.

Sarihi ini: Isurat kon ano an imo karuyag, hilig, ngan an imo nakita nga iyo ginkakaparihoan han imo asawa. Katapos isurat an iyo diri ginkakaparihoan. Bangin makita mo nga diri man sugad ka seryoso an iyo mga ginkakaibahan sugad han imo ginhuhunahuna. Makikita mo liwat ha lista kon diin ka puydi magpaumaya o sumuporta ha imo asawa. “Gin-aapresyar ko kon nagpapahiuyon an akon asawa ha akon, ngan maaram ako nga gin-aapresyar liwat niya kon nagpapahiuyon ako ha iya,” siring ni Kenneth nga usa nga bana. “Bisan kon nangangahulogan ito hin pagsakripisyo, an makita ko hiya nga malipayon nakakapalipay ha akon.”Prinsipyo ha Biblia: Filipos 4:5.

^ par. 10 Ginsaliwnan an iba nga ngaran dinhi hini nga artikulo.