KON nabalhin hin lugar an mga duron, sugad ito hin daku nga panon hin “80 ka milyon nga duron ha kada usa ka kilometro kwadrado.” Kondi diri hira nagkakaburunggoay. Ano an ira sekreto?

Tagda ini: Ha luyo han tagsa nga komplikado nga mata han duron nahimumutang an neuron nga sensitibo ha kiwa han palibot. Tinatawag ini nga lobula giant movement detector (LGMD). Kon aada an posibilidad ha pagbunggo, an mga neuron nagpapadara hin signal ha mga pako ngan mga tiil han duron basi makalikay dayon ito. Ha pagkatinuod, ito nga reaksyon mas malaksi hin lima ka beses kay ha pagpirok han mata.

Tungod han nadiskobrehan han mga syentista ha mga mata ngan mga neuron han duron, nakaimbento hira hin computerized system nga nabulig ha mobile robot nga makadetek ngan makalikay ha nagtitikahirani nga mga butang, bisan kon diri nagamit hin komplikado nga radar o infrared detector. Ginagamit han mga parasaliksik ini nga teknolohiya ha mga awto basi magkaada ito malaksi ngan husto nga warning system ngan malikyan an pagbunggoay. “Damu gud an aton mahibabaroan tikang ha simple nga insekto sugad han duron,” siring ni Propesor Shigang Yue han University of Lincoln ha United Kingdom.

Ano ha imo panhunahuna? An sensitibo ba nga mga neuron han duron produkto han ebolusyon, o may nagdisenyo hito?