“May trono ha langit, ngan may nalingkod hito nga trono. Ngan an nalingkod hito pariho pagkit-on hin bato nga haspe ngan hin presyoso nga pula nga bato, ngan ha palibot han trono may balangaw nga pariho pagkit-on hin esmeralda.”—Pahayag 4:2, 3.

“Mayada kahayag ha palibot niya. Sugad hin hitsura hin balangaw nga nakada ha dampug ha adlaw han paguran, amo man an hitsura han kahayag ha palibot. Amo ini an hitsura han kapariho han himaya ni Jehova.”—Esekiel 1:27, 28.

Ini nga mga bisyon, nga iginhatag kanda apostol Juan ngan propeta Esekiel, naghuhulagway han pagkaharangdon han Gihitaasi nga Dios, hi Jehova, pinaagi hin mga butang nga masayon mahanduraw—nagraranggat nga hiyas, balangaw, ngan magarbo nga trono. Iginpapakita hito nga an presensya ni Jehova makatarag-ob an kahusay, makaruruyag, ngan murayaw.

Ini nga paghulagway ha Dios uyon ha ginsiring han salmista: “Daku hi Jehova, ngan pagdadayawon hin daku: Hiya kahadlukan kapin pa han diosdios nga tanan. Kay an ngatanan nga mga diosdios han mga nasud amo mga ladawan; kondi ginhimo ni Jehova an mga langit. An kadungganan ngan an pagkaharangdon aada ha iya atubangan: An kakusganan ngan an katahuman aada ha iya santuario.”—Salmos 96:4-6.

Bisan kon hi Jehova an Supremo, gin-aaghat kita niya nga dumaop ha iya ha pag-ampo ngan ginpapasarig kita nga namamati hiya. (Salmos 65:2) Nahigugma ngan nagtatagad gud hiya ha aton, salit hi apostol Juan nakagsurat: “An Dios gugma.”—1 Juan 4:8.

“Hinangad [an disipulo nga hi Esteban] ha langit, ngan tungod kay puno hiya han baraan nga espiritu, nakita niya an himaya han Dios ngan hi Jesus nga natindog ha too han Dios, ngan nagsiring hiya: ‘Nakikita ko an langit nga naabrihan ngan an Anak han tawo nga natindog ha too han Dios!’”—Buhat 7:55, 56.

Antes hi Esteban magkaada hini nga bisyon, ginpatay hi Jesus tungod han panulsol han mga tawo nga kaistorya mismo ni Esteban—an Judio nga mga lider. An bisyon nagkompirma nga buhi hi Jesus, ginbanhaw, ngan ginpasidunggan. Mahitungod hito, hi apostol Pablo nagsurat: “Ginbanhaw [ni Jehova]  an Kristo ngan ginpalingkod ha iya too ha langitnon nga mga lugar, nga mas hitaas gud kay ha ngatanan nga gobyerno, awtoridad, gahum, pagmando, ngan ha ngatanan nga ngaran, diri la hini nga sistema, kondi ha tiarabot liwat.”—Efeso 1:20, 21.

Dugang pa ha paghulagway han iya hitaas nga katungdanan, iginpapakita han Biblia nga hi Jesus, pariho kan Jehova, napaid gud ha katawohan. Durante han ministeryo ni Jesus dinhi ha tuna, nagtambal hiya hin may depekto ngan sakit, ngan nagbanhaw hin mga patay. Pinaagi ha paghalad han iya kinabuhi, iginpakita niya an iya daku nga gugma ha Dios ngan ha katawohan. (Efeso 2:4, 5) Natindog na hi Jesus ha too nga kamot han Dios ngan hirani na niya gamiton an iya awtoridad ngan tagan hin damu nga bendisyon an magtinumanon nga tawo ha bisan diin.

“Ako [hi propeta Daniel] nagkinita ngada nga in mga trono iginbutang, ngan an usa nga tigurang na ha mga adlaw [Jehova] linmingkod: . . . yinukut ka mga yukut nag-alagad ha iya, ngan napulo ka yukut ka napulo ka yukut nagtindog ha iya atubangan.”—Daniel 7:9, 10.

Hini nga bisyon mahitungod han langit, diri la usa nga anghel an nakita ni Daniel, kondi damu hinduro. Sigurado nga makatarag-ob gud adto nga bisyon! An mga anghel mahimayaon nga espiritu nga persona, intelihente, ngan gamhanan. May mga anghel nga an ranggo serapin ngan an iba kerubin. An Biblia nag-uunabi han mga anghel hin sobra 250 ka beses.

An anghel diri tawo nga nagkinabuhi anay dinhi ha tuna. Ginlarang hira han Dios antes pa niya larangon an tawo. Han ginhimo an tuna, presente hira basi magkita ngan maggugliat ha kalipay.—Job 38:4-7.

Usa han mga paagi han matinumanon nga mga anghel ha pag-alagad ha Dios amo an pakigbahin ha pinakaimportante nga buruhaton yana ha tuna—an pagsangyaw han maopay nga sumat han Ginhadian han Dios. (Mateo 24:14) An ira pakigbahin hini nga buruhaton iginpakita ha usa nga bisyon ni apostol Juan, hiya nagsurat: “Nakakita ako hin usa pa nga anghel nga nalupad ha kabutngaan han langit ngan tuna, ngan may maopay nga sumat hiya nga ipapasamwak ha mga naukoy ha tuna, ha tagsa nga nasud, tribo, pinulongan, ngan katawohan.” (Pahayag 14:6) Bisan kon an mga anghel diri na nakikiistorya ha mga tawo pariho han ira ginbuhat hadto, gin-gigiyahan  nira an mga nagsasangyaw ngadto ha mga tangkod an kasingkasing.

“Nagkaada girra ha langit: Hi Miguel [Jesu-Kristo] ngan an iya mga anghel nakig-away ha dragon, ngan an dragon ngan an mga anghel hito nakig-away ha ira. Pero waray ito magdaog, ngan waray na lugar para ha ira didto ha langit. Salit iginlabog an daku nga dragon, an orihinal nga halas, an gintatawag nga Yawa ngan Satanas, nga nanlilimbong ha bug-os nga inuukyan nga tuna. Iginlabog hiya ha tuna, ngan an iya mga anghel iginlabog upod niya.”​—Pahayag 12:7-9.

May panahon hadto nga diri murayaw ha langit. Ha tinikangan han kasaysayan han tawo, usa nga anghel an nagrebelde kan Jehova tungod han iya duro nga hingyap nga singbahon, salit nagin Satanas hiya nga nangangahulogan hin “Parakontra.” Ha urhi, umupod ha iya ha pagrebelde an iba nga anghel nga ginkilala sugad nga mga demonyo. Tungod kay maraot, nakontra gud hira kan Jehova ngan nagsusulay ha mga tawo nga magkinabuhi kontra ha mahigugmaon nga giya ni Jehova.

Maraot gud ngan waray-kalooy hi Satanas ngan an iya mga demonyo. Kaaway hira han mga tawo ngan hira an kasagaran nga hinungdan han pag-antos ha tuna. Pananglitan, ginpatay ni Satanas an mga hayop ngan mga surugoon han matinumanon nga hi Job. Iya liwat ginpatay an napulo nga anak ni Job pinaagi hin “daku nga hangin” nga nagrumpag han balay diin hira nakadto. Katapos, gintagan ni Satanas hi Job hin “magsakit nga mga hubag tikang ha rapadapa han iya tiil ngadto ha iya alimpupuro.”—Job 1:7-19; 2:7.

Kondi hirani na bungkagon hi Satanas. Tikang han iglabog hiya ha tuna, maaram hiya nga “halipot na la an iya panahon.” (Pahayag 12:12) Ginhukman na hi Satanas, ngan maopay gud ito nga sumat!

“Pumalit ka [Jesus] hin mga tawo para ha Dios tikang ha tagsa nga tribo, pinulongan, katawohan, ngan nasud, ngan imo hira ginhimo nga usa nga ginhadian ngan mga saserdote han aton Dios, ngan magmamando hira sugad nga mga hadi ha bug-os nga tuna.”​—Pahayag 5:9, 10.

Sugad la nga ginbanhaw hi Jesus tikang ha tuna ngadto ha kinabuhi ha langit, may-ada liwat iba nga babanhawon ha sugad nga paagi. Hi Jesus nagsiring ha iya matinumanon nga mga apostol: “Tikadto ako ha pag-andam hin lugar para ha iyo. . . . Mabalik ako ngan ig-uupod ko kamo ha akon balay basi kon hain ako, aadto liwat kamo.”—Juan 14:2, 3.

 An mga nasaka ha langit may-ada katuyoan. Kaupod ni Jesus, hira an magkukompwesto han usa nga gobyerno han Ginhadian nga ha urhi magmamando ha mga umurukoy ha tuna ngan magdadara hin mga bendisyon ha ira. Ini an Ginhadian nga ginsugo ni Jesus nga sadang hangyoon han iya mga sumurunod ha modelo nga pag-ampo: “Amay namon ha langit, pagbaraanon an imo ngaran. Kumanhi unta an imo Ginhadian. Matuman an imo kaburut-on dinhi ha tuna sugad han ha langit.”—Mateo 6:9, 10.

“Nakabati ako [apostol Juan] hin daku nga tingog tikang ha trono nga nasiring: ‘Kitaa! An tolda han Dios aada ha katawohan, . . . papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit. An daan nga mga butang naglabay na.’”​—Pahayag 21:3, 4.

Inin matagnaon nga bisyon nagtutudlok ha panahon diin an Ginhadian han Dios, nga ginkukompwesto ni Jesus ngan han mga ginbanhaw tikang ha tuna, magtatapos han pagmando ni Satanas ngan maghihimo ha tuna nga paraiso. Mawawara na an mga hinungdan han kasakit ngan pag-antos han tawo. Bisan an kamatayon mawawara na.

Kondi, ano an mahitatabo ha binilyon nga mga patay nga diri babanhawon ngadto ha langit? Ha tidaraon, babanhawon hira nga may paglaom nga mabuhi ha waray kataposan ha Paraiso nga tuna.—Lucas 23:43.