NANGUNGUNA NGA ARTIKULO | MGA BISYON MAHITUNGOD HA KALIBOTAN HAN MGA ESPIRITU
Mga Pakiana Mahitungod ha Kalibotan han mga Espiritu
Nahunahuna mo na ba an mahitungod han kalibotan han mga espiritu ngan han mga naukoy didto? Kon oo, diri ka nag-uusahan. Ha sulod hin mga milenyo na, damu nga teoriya an nahimo mahitungod hito. May mga natoo nga an kalibotan han espiritu an urukyan han mga kaapoy-apoyan nga kinahanglan pasidunggan. An iba naghuhunahuna nga lugar ito han mahimyang nga kahimayaan nga gintatawag nga langit, diin aadto an mga anghel ngan an mag-opay nga tawo nga namatay na. Ngan an iba naghuhunahuna nga an kalibotan han espiritu lugar han minilyon nga mga dios ngan diosa.
Damu nga tawo an nasiring nga waray kita mahibabaroan mahitungod han kalibotan han mga espiritu kay waray testigo nga tikang didto an makakagsumat. Kondi sayop ito nga pangatadongan. Nag-eksister hi Jesu-Kristo ha langit, ha kalibotan han mga espiritu, antes hiya kumanhi ha tuna. Hiya prangka nga nagsiring ha mga lider han relihiyon han siyahan nga siglo: “Linusad ako tikang ha langit diri ha pagbuhat han akon kaburut-on, kondi ha pagbuhat han kaburut-on han nagsugo ha akon.” Salit ini nga iya iginsumat ha iya mga apostol iya personal nga eksperyensya: “Ha balay han akon Amay damu an urukyan.”—Juan 6:38; 14:2.
Syempre an Amay ni Jesus amo an Dios, nga an ngaran amo hi Jehova nga an “balay” aadto ha langit. (Salmos 83:18) Salit waray mas makakaghulagway han diri nakikita nga kalibotan han mga espiritu gawas kan Jehova nga Dios ngan kan Jesu-Kristo. Ira iginpahayag an damu nga impormasyon mahitungod hito pinaagi han makatarag-ob nga mga bisyon nga ira iginhatag ha matinumanon nga mga tawo.
An masunod nga artikulo naghihisgot hin mga bahin ha Biblia nga naghuhulagway han mga nakita han kalalakin-an ha pipira nga bisyon. Samtang ginbabasa mo ini nga mga bisyon, ayaw hingalimti nga an kalibotan han mga espiritu diri materyal, salit an mga butang didto diri nakakaptan o nakikita. Tungod hito, imbes nga gumamit hin mga pulong nga naghuhulagway hin mga butang nga espirituwal, nga bangin diri naton masabtan, ginpahinabo han Dios nga an mga bisyon maghuhulagway ha paagi nga mahahanduraw naton. Ini nga mga bisyon mabulig ha imo nga masabtan an mahitungod hadton mga naukoy ha ‘damu nga urukyan’ ha kalibotan han mga espiritu.
