An siyahan nga 60 minutos han kinabuhi han usa ka minasus-an ha gawas han tagoangkan han nanay importante nga peryodo. Kay ano? Tungod kay an mga nanay nga naghahatag hin gugma ngan oras ha ira iginpanganak pa la nga minasus-an durante hini nga panahon nagpapalaksi han pagtubo ngan pag-uswag han ira anak. *

Ano an nag-aaghat ha nanay nga mahigugmaon nga atamanon an iya minasus-an? Ha The Journal of Perinatal Education, hi Propesor Jeannette Crenshaw nasiring nga an hitaas nga lebel han hormone nga oxytocin “nag-aaghat han kinag-anak nga pagbati han iroy katapos hiya manganak samtang iya ginkakaptan, ginkikinita, ngan ginpapasuso an iya katatawo pa la nga anak.” Usa pa nga hormone nga nagawas hini nga takna an “nabulig ha iroy nga tagdon an panginahanglan han iya minasus-an” ngan nag-aaghat ha iya nga makigkomunikar ha iya anak. Kay ano nga makatirigamnan ini?

An duok nga relasyon han nanay ngan han minasus-an gindisenyo han aton mahigugmaon nga Maglalarang nga hi Jehova nga Dios. * Gindayaw ni Hadi David an Dios ha ‘pagpagawas ha iya ha tagoangkan’ ngan ha pagpaabat ha iya nga talwas hiya tungod han proteksyon han iya nanay. Hiya nag-ampo: “Igintapod ako ha imo pagmangno tikang ha katawo; tikang pa ha tagoangkan han akon nanay, ikaw an akon Dios.”​—Salmo 22:9, 10.

TAGDA: Kon ginhimo han Dios an sugad kakomplikado nga sistema basi masiguro nga mahigugmaon nga tatagdon han iroy an iya minasus-an ngan an panginahanglan hito, diri ba makatadungan la hunahunaon nga an Dios may-ada liwat personal nga interes ha aton “tungod kay mga anak kita han Dios”?​—Buhat 17:29.

Hi Jesu-Kristo nga mas nakilala ha Maglalarang kay ha bisan hin-o, nasiring: “An duha nga maya iginbabaligya ha usa nga sinselyo nga gutiay an kantidad, diri ba? Pero waray bisan usa ha ira an mahuhulog ha tuna nga diri hinbabaroan han iyo Amay. Kondi bisan an mga buhok ha iyo ulo gin-ihap na ngatanan. Salit ayaw kahadlok; mas birilhon kamo kay ha damu nga maya.”​—Mateo 10:29-31.

Kon diri damu ha aton an nagtatagad han gudtiay nga tamsi, labi na ha mga tamsi nga nahuhulog ha tuna. Kondi nakikita han aton Amay ha langit an kada usa han katamsihan! Ngan waray tamsi​—bisan an damu nga tamsi—​an birilhon ha iya labaw ha tawo. Matin-aw an leksyon: Diri ka sadang ‘mahadlok’ nga diri ka nakikita han Dios. Ha kabaliktaran, interesado gud hiya ha imo!

 Ginpapasarig kita han Biblia

• “An mga mata ni Jehova aada ha ngatanan nga dapit, nagkikinita ha magraot ngan ha mag-opay.”—PROBERBIOS 15:3.

• “An mga mata ni Jehova nagkikita ha magtadong, ngan an iya mga talinga namamati ha ira pangaraba para hin bulig.”—SALMO 34:15.

• “Magrarayhak gud ako tungod han imo maunungon nga gugma, kay nakita mo an akon pag-antos; maaram ka han akon duro nga kasakitan.”—SALMO 31:7.

May epekto ba ha aton an paghibaro nga interesado gud an Dios ha aton kaopayan ngan mahigugmaon nga nagbabantay ha aton tungod kay napaid hiya? May-ada gud, sugad han ginsaysay ni Hannah * nga taga-Inglatera:

“Damu ka beses nga gin-abat ko nga diri ako hinigugma ni Jehova ngan diri niya ginbabaton an akon mga pag-ampo. Kahuna ko nga tungod ito kay kulang ako hin pagtoo. Ha akon pag-abat ginsisirotan o ginsasalikway ako tungod kay diri ako importante. Baga hin diri nagtatagad an Dios ha akon.”

Pero yana, diri na ginruruhaduhaan ni Hannah an pagtagad ngan gugma ni Jehova. Ano an hinungdan hito nga pagbag-o? Hiya binaton: “Hinay-hinay adto nga pagbag-o. Nahinumdoman ko an usa nga pahayag basado ha Biblia damu ka tuig na an naglabay. Mahitungod adto han halad-lukat ni Jesus. May-ada ito daku nga epekto ha akon, tungod kay nagkaada ako pagsarig utro nga hinigugma gud ako ni Jehova. Ngan kon ginbabaton an akon mga pag-ampo, nagtatangis ako tungod kay nasasantop ko nga hinigugma gud ngay-an niya ako. Dugang pa, mas damu an akon hinbaroan mahitungod kan Jehova, ha iya personalidad, ngan ha iya pagbati para ha aton pinaagi ha pag-aram han Biblia ngan ha pagtambong ha Kristiano nga mga katirok. Yana klaro nga nakikita ko an suporta ngan gugma ni Jehova ha aton ngatanan ngan an iya hingyap nga atamanon an kada tagsa ha aton.”

Makapadasig gud an ginsiring ni Hannah. Pero, paonan-o ka makakasiguro nga naiintindihan ngan nahinunumdoman han Dios an imo inaabat? Ito nga pakiana babatunon han sunod nga artikulo.