Pakadto ha sulod

Pakadto ha mga sulod

 NANGUNGUNA NGA ARTIKULO

Kon Mamatay an Usa nga Hinigugma

Kon Mamatay an Usa nga Hinigugma

“Maaram an Dios kon ano an pinakamaopay, Bebe. . . . Ayaw pagtuok.”

Ito nga mga pulong iginhuring kan Bebe ha lubong han iya tatay nga namatay ha aksidente ha awto.

Duok gud hi Bebe ha iya tatay. Salit ini nga mga pulong, bisan kon tikang ha usa nga sangkay han pamilya nga may maopay nga intensyon, mas nakasakit ha iya imbes nga makaliaw. “Diri gud para ha kaopayan an iya kamatayon,” pauroutro hiya nga nagsiring ha iya kalugaringon. Han iginsaysay niya an aksidente ha usa nga libro paglabay hin mga tuig, matin-aw nga nasasakitan la gihapon hiya.

Sugad han napamatud-an ni Bebe, mahimo lumabay anay an maiha nga panahon antes malamposan han usa an kasakit, labi na kon an namatay duok hinduro ha iya. Angayan la nga iginhuhulagway han Biblia an kamatayon sugad nga an “kataposan nga kaaway.” (1 Corinto 15:26) Nakakadaot gud ito ha aton kinabuhi ngan agsob nga nahitatabo ha panahon nga diri kita andam, ngan ginkukuha hito an mga tawo nga hinigugma naton. Kita ngatanan apektado han kasakit nga resulta hito. Salit natural la nga diri kita nahibabaro kon paonan-o aatubangon an kamatayon han usa nga hinigugma.

Bangin nakapakiana ka: ‘Mationan-o kaiha malalamposan han usa an pagtaguminatay? Paonan-o maaatubang han usa ini nga kasakit? Paonan-o ko liliawon an usa nga namatayan? Ano an paglaom han aton mga hinigugma nga namatay?’