Pakadto ha sulod

Pakadto ha mga sulod

Kon Nagin Diri Maunungon an Imo Padis

Kon Nagin Diri Maunungon an Imo Padis

“Karuyag ko mamatay han nagsiring an akon bana nga babalyoan niya ako hin mas bata ha akon. Baga hin diri ito tama, labi na kon nahinunumdoman ko an akon mga sakripisyo para ha iya.”​—Maria, Espanya.

“Han tigda nga ginbayaan ako han akon asawa, baga hin may bahin han akon pagkatawo nga namatay. Naguba an amon mga hingyap, ginlalaoman, ngan mga plano. May mga adlaw nga kahuna ko okey na ako, pero katapos hito nadidepres na liwat ako.”​—Bill, Espanya.

MAKASURUBO gud an pagin diri maunungon han usa nga padis. Oo, may mga padis nga kaya pasayloon an ira nagbabasol nga padis ngan maibalik an ira maopay nga relasyon. * Pero naisalbar man an pag-asawa o waray, an mga padis nga nakadiskobre nga waray magin maunungon an ira padis sigurado nga nag-aantos hin duro nga kasakit. Paonan-o nira maiilob iton duro nga kasakit?

MGA TEKSTO NGA MAKAKABULIG

Bisan pa han duro nga kasakit, damu nga mga inosente nga padis an nakabiling hin pagliaw ha Biblia. Nahibaroan nira nga nakikita han Dios an ira mga luha ngan napaid hiya ha ira.​—Malakias 2:13-16.

“Kon nababaraka, nagugupong ako, ginliliaw ngan ginlilipay ak’ nimo.”​Salmo 94:19, Maupay nga Sumat.

“Samtang ginbabasa ko ito nga teksto, ginhuhunahuna ko nga mahigugmaon nga gintatambal ni Jehova an akon kasakit, sugad han ginhihimo han mapinairon nga tatay,” siring ni Bill.

“Matinumanon ka hadton nagtutuman.”​Salmo 18:25, Maupay nga Sumat.

“Waray magin maunungon an akon bana,” siring ni Carmen, nga an bana nagin diri matinumanon hin pipira ka bulan. “Pero makakasarig ako nga maunungon hi Jehova ha akon. Diri gud niya ako babayaan.”

“Ayaw kamo kabaraka ha bisan ano, kondi ha ngatanan nga butang pinaagi han pag-ampo ngan pangamuyo . . . ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing.”​Filipos 4:6, 7.

“Pauroutro nga ginbasa ko ini nga teksto,” siring ni Sasha. “Han nagin mas agsob an akon pag-ampo, gintagan ako han Dios hin kamurayawan ha akon kinabuhi.”

Gin-abat han mga gin-unabi ha igbaw nga may mga panahon nga karuyag na nira umundang. Kondi sinarig hira kan Jehova nga Dios ngan kumuha hin kusog tikang ha iya Pulong. Hi Bill nagsiring: “An akon pagtoo naghatag hin katuyoan ha akon kinabuhi ha mga panahon nga nawad-an na ako hin paglaom. Bisan kon may panahon nga naglakat ako ha ‘kasisidman,’ an Dios inupod ha akon.”—Salmo 23:4, Maupay nga Sumat.

^ par. 4 Para ha paghisgot kon magpapasaylo o diri, kitaa an serye han Gumising! han Abril 22, 1999 nga “Kapag Nagtataksil ang Isang Kabiyak.”