Pakadto ha sulod

Pakadto ha mga sulod

Kon May Naabot nga Kalamidad

Kon May Naabot nga Kalamidad

“Han siyahan desperado gud kami. Nawara an amon tanan nga panag-iya tungod han mudslide ngan baha.”​—Andrew, Sierra Leone.

“Katapos han bagyo, inuli kami ha balay. Waray gud nahibilin ha amon. Waray kami makatingog. Napaluhod an akon anak ngan nagtinangis.”​—David, Virgin Islands.

KON nakatalwas ka ha usa nga kalamidad, posible nga nasasabtan mo an inaabat han iba nga nakaeksperyensya hito: diri makatoo, diri makarawat an nahitabo, nawuwurok, nababaraka, ngan nagkakaada magraot nga inop. Damu han mga nakatalwas an nadepres ngan nakapoy gud, salit nawad-an hira hin gana nga magpadayon ha kinabuhi.

Kon nawara ha imo an tanan tungod hin kalamidad, bangin abaton mo liwat nga diri mo na maiilob an duro nga istres ngan kabaraka. Bangin abaton mo pa ngani nga waray na pulos an imo kinabuhi. Kondi an Biblia nagsusumat nga may pulos an imo kinabuhi ngan mahimo ka magkaada marig-on nga basihan para maglaom hin maopay nga kabubuwason.

AN KAMATUORAN HA BIBLIA NAGHAHATAG HA ATON HIN PAGLAOM

An Eklesiastes 7:8 nasiring: “Maoroopay an katapusan han usa nga butang kay han tinikangan hini.” Kon nagtitikang ka pa la magrekober ha usa nga kalamidad, baga hin waray paglaom an imo kinabuhi. Pero samtang mapailubon nga nangangalimbasog ka nga ibalik ha normal an imo kinabuhi, hinay-hinay nga nagigin maopay an tanan.

An Biblia nagtagna hin panahon diin “diri na hibabatian . . . an tingug han pagtangis, ngan an tingog han pagngoyngoy.” (Isaias 65:19) Matutuman ini kon an tuna himoon na nga paraiso durante han pagmando han Ginhadian han Dios. (Salmos 37:11, 29) Diri na magkakaada hin mga kalamidad. Wawad-on na ha kadayonan an bisan ano nga masakit nga hinumdoman ngan diri nawawara nga truma, kay an Dios nga Makagarahum-ha-ngatanan nagsasaad: “An una nga mga butang diri na hinunumduman, o diri na maabut ha panumduman.”​—Isaias 65:17.

Hunahunaa ini: An Maglalarang naghimo hin kahikayan basi ‘tagan ka hin paglaum’ ngan maopay nga kabubuwason​—usa nga mamurayawon nga kinabuhi ilarom han perpekto nga pagmando han Dios. (Jeremias 29:11) An paghibaro ba hini nga kamatuoran mabulig nga magkaada pulos an imo kinabuhi? Hi Sally, nga gin-unabi ha siyahan nga artikulo, nagsiring: “An pagpahinumdom ha imo kalugaringon han tanan nga mag-opay nga butang nga hihimoon han Ginhadian han Dios ha tidaraon mabulig ha imo nga kalimtan an naglabay ngan atubangon an presente nga kahimtang.”

Alayon hibaroi an dugang nga bubuhaton han Ginhadian han Dios para ha katawohan ha diri na maiha. Kon bubuhaton mo ini, makakasarig ka nga bisan kon nakaeksperyensya ka hin kalamidad, may pulos la gihap an imo kinabuhi yana samtang ginpapamulat mo an tidaraon nga waray na kalamidad. Ha pagkayana, an Biblia nagtatagana hin praktikal nga mga giya nga mabulig ha imo nga mailob an mga epekto han kalamidad. Tagda an pipira nga ehemplo.