Pakadto ha sulod

Pakadto ha mga sulod

Kon May-ada Ka Grabe nga Sakit

Kon May-ada Ka Grabe nga Sakit

“Han hinbaroan ko nga may lung ngan colon cancer ako, sugad hin ginsentensyahan ako hin kamatayon. Pero pag-uli ko katapos han check-up, nahunahuna ko, ‘Okey, diri ini an akon ginlalaoman, pero kinahanglan ko mamiling hin paagi basi mailob ini.’”​—Linda, 71 anyos.

“An mga ugat ha wala nga bahin han akon nawong nagkaada depekto, ngan maul-ol ito hinduro. May mga panahon nga nadidepres ako tungod han sobra nga kaul-ol. Damu ka beses nga inabat ko nga nag-uusahan la ako, ngan nagplano pa ngani ako nga magpakamatay.”​—Elise, 49 anyos.

KON nadayagnos ka o an imo hinigugma hin makamaratay nga sakit, maaram ka nga makahurulop gud ito. Labot la han sakit, kinahanglan mo liwat atubangon an paburobag-o nga emosyon. Mahimo madugangan an kahadlok ngan kabaraka tungod han makakurulba nga mga check-up, diri available o mahal nga pagtambal, o diri maopay nga epekto han mga medisina. An kaguol ha hunahuna tungod han grabe nga sakit mahimo magin makapaluya.

Diin kita makakaaro hin bulig? Nakita han damu nga an ira pinakamaopay nga makukuhaan hin pagliaw amo an pag-ampo ha Dios ngan pagbasa hin nakakaliaw nga teksto. Makakabulig liwat an gugma ngan suporta han kapamilya ngan kasangkayan.

KON ANO AN GINBUHAT HAN IBA

“Atubanga an imo sakit nga may pagtoo ha Dios,” siring han 58 anyos nga hi Robert, “ngan bubuligan  ka niya nga mailob ito. Pag-ampo kan Jehova. Isumat ha iya an imo inaabat. Paghangyo han iya baraan nga espiritu. Hangyoa hiya nga parig-unon ka para ha imo pamilya ngan buligan ka nga magin kalmado samtang gin-iilob mo an imo sakit.

“Daku gud nga bulig kon an imo pamilya aada pirme para ha imo. Kada adlaw, usa o duha an natawag ha akon ngan nagpapakiana, ‘Kumusta ka?’ Ginpaparig-on ako han akon kasangkayan tikang ha iba-iba nga lugar. Nag-oopay an akon pamati tungod ha ira, ngan nakabulig ito ha akon nga magpadayon.”

Kon nabisita ka ha usa nga may sakit, tigamni an siring ni Linda: “Sigurado nga karuyag han may sakit nga magkinabuhi hin normal tubtob nga posible ngan bangin diri niya karuyag nga pirme pag-istoryahan an iya sakit. Salit pag-istoryahi niyo an mga butang nga agsob niyo pag-istoryahan.”

Pinaagi han kusog nga iginhahatag han Dios ngan pagliaw tikang ha Biblia, pati na han suporta han mahigugmaon nga kapamilya ngan kasangkayan, makakasarig kita nga may pulos an aton kinabuhi bisan kon nag-aantos kita hin grabe nga sakit.