Pakadto ha sulod

Pakadto ha mga sulod

 Leksyon 14

Kay Ano nga May-ada Organisasyon an Dios?

Kay Ano nga May-ada Organisasyon an Dios?

1. Kay ano nga ginpili han Dios an kadaan nga Israel nga magin iya katawohan?

Gin-organisar han Dios nga magin nasud an tulin han patriarka nga hi Abraham ngan gintagan hira hin mga balaud. Gintawag niya ito nga nasud nga “Israel,” ngan ito la nga nasud an nagsingba ha tinuod nga Dios ngan ha ira igintapod an iya pulong. (Salmo 147:19, 20) Salit pinaagi han nasud han Israel, makakakarawat hin bendisyon an katawohan ha ngatanan nga nasud.​—Basaha an Genesis 22:18.

Ginpili han Dios an mga Israelita ha kadaan nga panahon basi magin iya mga saksi. An ira kasaysayan nagpapakita kon paonan-o makakapahimulos an mga tawo ha pagsunod han mga balaud han Dios. (Deuteronomio 4:6) Salit pinaagi han mga Israelita, makikilala han iba an tinuod nga Dios.​—Basaha an Isaias 43:10, 12.

2. Kay ano nga gin-organisar an tinuod nga mga Kristiano?

Paglabay han panahon, nawara han Israel an pag-uyon ni Jehova salit ginsaliwnan niya ito han Kristiano nga kongregasyon. (Mateo 21:43; 23:37, 38) Yana, sugad nga kasaliwan han mga Israelita, an tinuod nga mga Kristiano nag-aalagad sugad nga mga saksi ni Jehova.​—Basaha an Buhat 15:14, 17.

Gin-organisar ni Jesus an iya mga sumurunod para magsangyaw ngan manhimo hin disipulo ha ngatanan nga nasud. (Mateo 10:7, 11; 24:14; 28:19, 20) Ini nga buruhaton hirani na matapos, ha kataposan hinin presente nga sistema. Ha siyahan nga higayon, ginpapahinabo ni Jehova nga magkaurosa ha tinuod nga pagsingba an minilyon nga tawo. (Pahayag 7:9, 10) Gin-oorganisar liwat an tinuod nga mga Kristiano basi magdinasigay ngan magbinuligay ha kada tagsa. Ha bug-os nga kalibotan, nakakarawat nira an pariho nga mga instruksyon nga basado ha Biblia ha ira mga katirok.​—Basaha an Hebreo 10:24, 25.

 3. Paonan-o nagtikang an organisasyon han mga Saksi ni Jehova ha moderno nga panahon?

Han dekada 1870, gin-usisa han gutiay nga grupo han mga estudyante han Biblia an maiha na nga igintago nga mga kamatuoran ha Biblia. Maaram hira nga gin-organisar ni Jesus an Kristiano nga kongregasyon basi magsangyaw, salit gintikangan nira an pagsangyaw mahitungod ha Ginhadian ha bug-os nga kalibotan. Han 1931, gin-gamit nira an ngaran nga mga Saksi ni Jehova.​—Basaha an Buhat 1:8; 2:1, 4; 5:42.

4. Paonan-o gin-oorganisar an mga Saksi ni Jehova?

Han siyahan nga siglo, may usa nga grupo hin hamtong nga kalalakin-an nga nagmamangno ha ngatanan nga Kristiano nga kongregasyon ha iba-iba nga nasud. Ginkilala nira hi Jesus sugad nga Ulo han kongregasyon. (Buhat 16:4, 5) Ha pariho nga paagi, an mga Saksi ni Jehova yana may Nagmamando nga Lawas nga ginkukompwesto hin hamtong nga kalalakin-an. Hira an nanginginano ha sanga nga mga opisina han mga Saksi ni Jehova nga naghuhubad, nag-iimprinta, ngan nananaltag hin mga publikasyon nga basado ha Biblia ha sobra 600 nga yinaknan. Salit an Nagmamando nga Lawas nagpaparig-on ngan naghahatag hin giya nga tikang ha Biblia ha sobra 100,000 nga kongregasyon ha bug-os nga tuna. Ha tagsa nga kongregasyon, may kwalipikado nga kalalakin-an nga nag-aalagad sugad nga tigurang, o paramangno. Mahigugmaon nga ginmamangnoan nira an panon han Dios.​—Basaha an 1 Pedro 5:2, 3.

An mga Saksi ni Jehova gin-oorganisar basi magsangyaw han maopay nga sumat ngan manhimo hin disipulo. Pariho ha mga apostol, nagsasangyaw hira ha balay-balay. (Buhat 20:20) Nagtatanyag liwat hira hin pag-aram ha Biblia ha mga tawo nga nahigugma ha kamatuoran. Pero an mga Saksi ni Jehova diri kay basta organisasyon la. Usa hira nga pamilya nga may mahigugmaon nga Amay. Magburugto hira nga nahigugma ha usa kag usa. (2 Tesalonika 1:3) Tungod kay an katawohan ni Jehova gin-oorganisar basi lipayon hiya ngan buligan an iba, hira an pinakamalipayon nga pamilya dinhi ha tuna.​—Basaha an Salmo 33:12; Buhat 20:35.