Pakadto ha sulod

Pakadto ha mga sulod

 Leksyon 15

Kay Ano nga Sadang Ka Magpadayon ha Pag-aram?

Kay Ano nga Sadang Ka Magpadayon ha Pag-aram?

1. Ano an imo mapapahimulosan han imo padayon nga pag-aram ha Biblia?

Sigurado nga inin sumaryo han nangunguna nga mga katutdoan ha Biblia nagparig-on han imo gugma kan Jehova. Pero kinahanglan padayon nga parig-unon ito nga gugma. (1 Pedro 2:2) An imo paglaom nga mabuhi ha waray kataposan nadepende han imo padayon nga pagin duok ha Dios pinaagi han pag-aram ha iya Pulong.​—Basaha an Juan 17:3; Judas 21.

Samtang nagtitikadamu an imo kahibaro mahitungod ha Dios, an imo pagtoo nagigin mas marig-on. An pagtoo mabulig ha imo nga lipayon an Dios. (Hebreo 11:1, 6) Magpapagios liwat ito ha imo nga magbasol ngan maghimo hin mga pagbag-o ha imo kinabuhi.​—Basaha an Buhat 3:19.

2. Paonan-o mabulig ha iba an imo kahibaro mahitungod ha Dios?

Mahimo ka magkaada espesyal nga relasyon kan Jehova

Kita ngatanan nalilipay ha pag-istorya hin maopay nga sumat. Salit sigurado nga karuyag mo isumat ha iba an imo nahibabaroan. Samtang padayon ka nga nag-aaram ha Biblia, mahibabaroan mo kon paonan-o ito gagamiton ha pagsaysay han imo pagtoo kan Jehova ngan han maopay nga sumat.​—Basaha an Roma 10:13-15.

An siyahan nga ginsusumatan han kadam-an nga tawo ha maopay nga sumat amo an ira kasangkayan o kapamilya. Pero magin mataktika. Imbes nga sidngan hira nga buwa an ira relihiyon, isumat ha ira an mga saad han Dios. Hinumdumi liwat nga agsob nga mas naaaghat an mga tawo han imo maopay nga panggawi kay han imo ginsisiring.​—Basaha an 2 Timoteo 2:24, 25.

3. Ano nga klase hin relasyon ha Dios an imo mapapahimulosan?

An pag-aram ha Biblia magpaparig-on han imo relasyon ha Dios. Ha urhi, mahimo ka magkaada espesyal nga relasyon  kan Jehova kay magigin bahin ka han iya pamilya.​—Basaha an 2 Korinto 6:18.

4. Paonan-o ka padayon nga mag-uuswag?

Mahibabaro ka kon paonan-o iaaplikar an mga prinsipyo ha Biblia pinaagi han padayon nga pag-aram hito. (Hebreo 5:13, 14) Paghangyo ha usa han mga Saksi ni Jehova nga tutdoan ka ha Biblia gamit an libro nga Ano Gud ba an Igintututdo han Biblia? Samtang nagtitikadamu an imo nahibabaroan ha Pulong han Dios, nagigin mas mapulsanon an imo kinabuhi.​—Basaha an Salmo 1:1-3; 73:27, 28.

An Biblia may ‘mahimayaon nga maopay nga sumat han malipayon nga Dios.’ (1 Timoteo 1:11, NW) Mahimo ka magin duok ha Dios pinaagi ha pagin duok ha iya katawohan. (Hebreo 10:24, 25) Kon mangangalimbasog ka nga padayon nga lipayon hi Jehova, makakarawat mo an tinuod nga kinabuhi​—an kinabuhi nga waray kataposan. An pagin duok ha Dios an pinakamaopay nga butang nga imo mahihimo.​—Basaha an 1 Timoteo 6:9.