Pakadto ha sulod

Pakadto ha mga sulod

 LEKSYON 11

Paonan-o Kita Mabubuligan han mga Prinsipyo ha Biblia?

Paonan-o Kita Mabubuligan han mga Prinsipyo ha Biblia?

1. Kay ano nga kinahanglan naton hin giya?

Paonan-o mabulig an mga prinsipyo ha Biblia basi diri naton ibutang ha peligro an aton kinabuhi?​—SALMO 36:9.

An aton Maglalarang mas maaramon kay ha aton. Sugad nga mahigugmaon nga Amay, nagtatagad hiya ha aton. Waray kita niya laranga basi magin independente ha iya. (Jeremias 10:23) Salit sugad la nga ginkikinahanglan han usa nga bata an giya han iya mga kag-anak, ginkikinahanglan liwat naton an giya han Dios. (Isaias 48:17, 18) An mga prinsipyo ha Biblia naggigiya ha aton, ngan regalo ito tikang ha Dios.​—Basaha an 2 Timoteo 3:16.

An mga balaud ngan mga prinsipyo ni Jehova nabulig ha aton nga magkinabuhi yana ha gimaopayi nga paagi ngan makarawat an waray kataposan nga mga bendisyon ha tidaraon. Tungod kay an Dios an naglarang ha aton, husto la nga sundon naton an iya giya.​—Basaha an Salmo 19:7, 11; Pahayag 4:11.

2. Ano an prinsipyo ha Biblia?

An mga prinsipyo ha Biblia amo an nangunguna nga mga kamatuoran, samtang an balaud naaplikar ha espisipiko la nga mga kahimtang. (Deuteronomio 22:8) Kinahanglan gamiton naton an aton abilidad ha paghunahuna basi masabtan kon paonan-o naaplikar an usa nga prinsipyo ha usa nga espisipiko nga sitwasyon. (Proberbios 2:​10-12) Pananglitan, igintututdo han Biblia nga an kinabuhi regalo han Dios. Ito nga prinsipyo maggigiya ha aton kon adto kita ha trabaho, ha balay, ngan kon nagbibiyahe. Mabulig ito ha aton nga diri ibutang ha peligro an aton kinabuhi o an kinabuhi han iba.​—Basaha an Salmo 100:3.

3. Ano an duha nga prinsipyo ha Biblia nga pinakaimportante?

Nag-unabi hi Jesus hin duha nga prinsipyo nga importante  hinduro. An siyahan nagpapakita han katuyoan han kinabuhi han tawo​—basi makilala an Dios, higugmaon hiya, ngan mag-alagad nga matinumanon ha iya. Ini nga prinsipyo sadang tagdon pirme kon naghihimo kita hin desisyon. (Proberbios 3:6) Kon susundon naton ini nga prinsipyo magigin sangkay kita han Dios, magigin tinuod nga malipayon, ngan mabubuhi ha waray kataposan.​—Basaha an Mateo 22:36-38.

An ikaduha nga prinsipyo mabulig ha aton nga magkaada maopay nga relasyon ha iba. (1 Korinto 13:4-7) An pag-aplikar hini nag-uupod ha pagsubad ha paagi han pagtratar han Dios ha mga tawo.​—Basaha an Mateo 7:12; 22:39, 40.

4. Paonan-o kita mabubuligan han mga prinsipyo ha Biblia?

An mga prinsipyo ha Biblia nagtututdo ha pamilya kon paonan-o nabulig an gugma basi magkaurosa. (Kolosas 3:​12-14) Basi mapanalipdan an pamilya, an Pulong han Dios nagtututdo hin usa pa nga prinsipyo​—diri sadang magbulag an mag-asawa.​—Basaha an Genesis 2:24.

An pagsunod han mga prinsipyo ha Biblia naghahatag ha aton hin materyal ngan emosyonal nga kaopayan. Pananglitan, mas karuyag han agaron an mga trabahador nga tangkod ngan maduruto tungod kay ginsusunod nira an sagdon ha Biblia. (Proberbios 10:4, 26; Hebreo 13:18) An Pulong han Dios nagtututdo liwat nga sadang kita makontento ha kon ano la an aton ginkikinahanglan ngan pabilhan an pakigsangkay ha Dios kay ha materyal nga mga butang.​—Basaha an Mateo 6:24, 25, 33; 1 Timoteo 6:8-10.

An pag-aplikar han mga prinsipyo ha Biblia mabulig ha aton nga magkaada maopay nga kahimsog. (Proberbios 14:30; 22:24, 25) Pananglitan, an pagsunod ha balaud han Dios may kalabotan ha paghubog nagpapanalipod ha aton tikang ha makamaratay nga mga sakit ngan aksidente. (Proberbios 23:20) Diri man igindidiri ni Jehova an pag-inom hin de-alkohol nga irimnon basta ha kasadangan la. (Salmo 104:15; 1 Korinto 6:10) An mga prinsipyo ha Biblia nabulig ha aton nga bantayan diri la an aton panggawi kondi pati an aton panhunahuna. (Salmo 119:97-100) Pero ginsusunod han tinuod nga mga Kristiano an mga prinsipyo han Dios diri la para ha ira kaopayan. Ginbubuhat nira ito basi pasidunggan hi Jehova.​—Basaha an Mateo 5:14-16.