Pakadto ha sulod

Pakadto ha mga sulod

 LEKSYON 2

Hin-o an Dios?

Hin-o an Dios?

1. Kay ano nga sadang naton singbahon an Dios?

An tinuod nga Dios an Maglalarang han tanan nga butang. Waray hiya tinikangan ngan waray kataposan. (Salmo 90:2) Ha iya nagtikang an maopay nga sumat nga mababasa ha Biblia. (1 Timoteo 1:11) Tungod kay hiya an naghatag ha aton hin kinabuhi, hiya la an sadang naton singbahon.​—Basaha an Pahayag 4:11.

2. Ano nga klase hin persona an Dios?

Waray pa tawo nga nakakita ha Dios tungod kay Espiritu hiya, karuyag sidngon, mas hitaas hiya kay ha ngatanan nga linarang dinhi ha tuna. (Juan 1:18; 4:24) Pero mahimo naton mahibaroan an personalidad han Dios tikang ha iya mga linarang. Pananglitan, an magkalain-lain nga prutas ngan bukad nagpapakita han iya gugma ngan kinaadman. Ngan an haluag hinduro nga uniberso nagsusumat ha aton han iya gahum.​—Basaha an Roma 1:20.

Damu pa an aton mahibabaroan mahitungod ha personalidad han Dios kon babasahon naton an Biblia. Pananglitan, iginsusumat hito an naruruyagan ngan diri naruruyagan han Dios, kon paonan-o niya gintatratar an mga tawo, ngan kon paonan-o hiya nagios ha magkalain-lain nga sitwasyon.​—Basaha an Salmo 103:7-10.

3. May-ada ba ngaran an Dios?

Hi Jesus nagsiring: “Amay namon, nga aada ka ha langit, gindadayaw an imo ngaran.” (Mateo 6:9) Bisan kon damu an titulo han Dios, usa la an iya ngaran. Ha tagsa nga yinaknan, iba-iba an pagluwas hito. Ha Waray-Waray, kasagaran nga ginagamit an ngaran nga “Jehova,” pero may iba nga nagamit hin “Yahweh.”​—Basaha an Salmo 83:18.

 Ha damu nga Biblia, an ngaran han Dios ginkuha ngan ginsaliwnan hin mga titulo nga Ginoo o Dios. Pero han iginsurat an Biblia, mababasa dida hito an ngaran han Dios hin mga 7,000 ka beses. Iginpakilala ni Jesus ito nga ngaran han gintutdoan niya an mga tawo mahitungod ha Dios.​—Basaha an Juan 17:26.

Kitaa an video nga May-ada ba Ngaran an Dios?

4. Nagtatagad ba hi Jehova ha aton?

Pariho hinin mahigugmaon nga amay, nagios an Dios basi maghingaopay kita

An mga pag-antos ba han damu nga tawo nagpapasabot nga hi Jehova diri nagtatagad ha aton? May mga tawo nga nasiring nga nag-aantos kita tungod kay ginsasarihan kita han Dios, pero diri ito tinuod.​—Basaha an Jakobo 1:13.

Gintagan han Dios an tawo hin kagawasan ha pagbuot. Maipapakita naton nga gin-aapresyar naton ito kon pipilion naton nga mag-alagad ha iya. (Josue 24:15) Pero ginpipili han damu an pagbuhat hin maraot ha iba, salit damu an nag-aantos. Nasusubo hi Jehova han iya nakikita nga kawaray-hustisya.​—Basaha an Genesis 6:5, 6.

Hi Jehova nagtatagad ha aton. Karuyag niya nga magin malipayon kita. Diri na maiha, wawad-on niya an pag-antos ngan an mga hinungdan hito. Ha yana gintutugotan niya an pag-antos, pero may maopay hiya nga rason hito. Ha Leksyon 8, mahibabaroan naton kon ano ito.​—Basaha an 2 Pedro 2:9; 3:7, 13.

5. Paonan-o kita magigin duok ha Dios?

Gin-aaghat kita ni Jehova nga magin duok ha iya pinaagi ha pag-ampo. Interesado hiya ha kada tagsa ha aton. (Salmo 65:2; 145:18) Andam hiya magpasaylo. Ginpapabilhan niya an aton mga pangalimbasog nga lipayon hiya, bisan kon usahay napapakyas kita. Salit bisan kon diri kita hingpit, mahimo kita magin duok ha Dios.​—Basaha an Salmo 103:12-14; Jakobo 4:8.

Tungod kay gintagan kita ni Jehova hin kinabuhi, sadang naton hiya higugmaon labaw kay ha bisan hin-o. (Markos 12:30) Samtang iginpapakita mo an imo gugma ha Dios pinaagi ha pagkuha hin dugang nga kahibaro mahitungod ha iya ngan pagbuhat han iya kaburut-on, nagigin mas duok ka ha iya.​—Basaha an 1 Timoteo 2:4; 1 Juan 5:3.