Pakadto ha sulod

Pakadto ha mga sulod

 SEKSYON 5

Tipigi an Maopay nga Relasyon ha Kapamilya

Tipigi an Maopay nga Relasyon ha Kapamilya

“Isul-ot niyo an . . . pagkabuotan, pagpaubos, pagkamalumo, ngan pagkapasensyoso.”​—Colosas 3:12

Han nag-asawa ka, nagkaada ka bag-o nga pamilya. Bisan kon hinigugma ngan ginrirespeto mo an imo mga kag-anak, an imo padis an pinakaimportante na yana nga tawo ha imo. Bangin makuri ito karawaton han pipira han imo kapamilya. Pero makakabulig ha imo an mga prinsipyo han Biblia nga magin timbang basi matipigan an maopay nga relasyon ha imo kapamilya samtang nangangalimbasog ka nga magin marig-on an imo bag-o nga pamilya.

 1 TIPIGI AN HUSTO NGA PANHUNAHUNA HA IYO KAPAMILYA

KON ANO AN GINSISIRING HAN BIBLIA: “Pasidunggi an imo tatay ngan an imo nanay.” (Efeso 6:2) Anoman an imo edad, kinahanglan mo pirme pasidunggan ngan respetuhon an imo mga kag-anak. Ngan hinumdumi nga an imo padis kinahanglan liwat maghatag hin atensyon ha iya mga kag-anak. “An gugma diri nangangabugho,” salit ayaw kabaraka kon duok ha ira an imo padis.​—1 Corinto 13:4; Galacia 5:26.

KON ANO AN IMO MAHIHIMO:

  • Likayi an pagsiring sugad han, “Ginmiminos la ako pirme han imo pamilya” o “Bisan ano an akon buhaton diri gud naayon hi imo nanay”

  • Ibutang an imo kalugaringon ha kahimtang han imo padis

 2 MAGIN MARIG-ON KON KINAHANGLAN

KON ANO AN GINSISIRING HAN BIBLIA: “An tawo mabaya han iya amay ngan han iya iroy, ngan tumampo ha iya asawa: ngan hira magigin-usa nga unod.” (Genesis 2:24) Bisan kon may asawa ka na, bangin abaton han imo mga kag-anak nga responsabilidad ka pa gihapon nira, ngan bangin karuyag nira manginlabot ha iyo labaw han ginkikinahanglan.

Mahimo pag-istoryahan niyo nga mag-asawa kon tubtob diin hira puydi manginlabot ngan katapos isumat ito ha ira ha mahigugmaon nga paagi. Mahimo kamo magin prangka pero diri nakakasakit. (Proberbios 15:1) An pagpaubos, pagin malumo, ngan pagin pasensyoso mabulig nga magin maopay an iyo relasyon ha iyo kapamilya ngan padayon nga higugmaon nga may pagpailob an usa kag usa.​—Efeso 4:2.

KON ANO AN IMO MAHIHIMO:

  • Kon diri ka komportable ha panginlabot han iyo mga kapamilya, ipakiistorya ito ha imo padis ha angayan nga panahon

  • Pag-istoryahi niyo kon paonan-o ito susulbaron