Pakadto ha sulod

Pakadto ha mga sulod

 SEKSYON 2

Magin Maunungon ha Imo Padis

Magin Maunungon ha Imo Padis

“An gintampo han Dios diri pagbulagon han tawo.”​—Marcos 10:9

Hi Jehova nagsusugo ha aton nga “diri magbuhat ha malingoon.” (Malakias 2:16) An pagkamaunungon importante gud ha iyo pag-asawa kay kon waray ito, waray an pagtapod. Ngan an pagtapod ginkikinahanglan basi magmarig-on an gugma.

Yana, masayon la mawara an pagkamaunungon ha padis. Basi mapanalipdan an iyo pag-asawa, kinahanglan magin determinado ka nga buhaton an duha nga butang.

 1 TAGI HIN PRAYORIDAD AN IMO RELASYON HA IMO PADIS

KON ANO AN GINSISIRING HAN BIBLIA: ‘Siguroha an mas importante nga mga butang.’ (Filipos 1:10) An imo relasyon ha imo padis usa han pinakaimportante nga mga butang ha imo kinabuhi. Angay ito tagan hin prayoridad.

Karuyag ni Jehova nga magpokus ka ha imo padis ngan magin ‘malipayon kaupod’ niya. (Eklesiastes 9:9) Iginpapatin-aw ni Jehova nga diri mo gud sadang igbalewaray an imo padis, lugod, kamo nga duha sadang mamiling hin mga paagi nga mapalipay an kada tagsa. (1 Corinto 10:24) Ipaabat ha imo padis nga importante hiya ha imo ngan gin-aapresyar mo hiya.

KON ANO AN IMO MAHIHIMO:

  • Siguroha nga naggagahin kamo hin panahon basi magkaupod, iginhahatag ha imo padis an imo bug-os nga atensyon

  • Hunahunaa pirme an imo padis diri la an imo kalugaringon

 2 BANTAYI AN IMO KASINGKASING

KON ANO AN GINSISIRING HAN BIBLIA: “Bisan hin-o nga padayon nga nagkikinita ha usa nga babaye ngan may malaw-ay nga hingyap ha iya, nag-aadulteryo na ha iya kasingkasing.” (Mateo 5:28) Kon an usa padayon nga naghihinunahuna hin imoral nga mga butang, sugad hin nagigin diri na hiya maunungon ha iya padis.

Hi Jehova nasiring nga kinahanglan mo ‘bantayan an imo kasingkasing.’ (Proberbios 4:23; Jeremias 17:9) Basi mahimo ito, kinahanglan mo bantayan an imo mga mata. (Mateo 5:29, 30) Subara an patriarka nga hi Job nga naghimo hin kauyonan ha iya mga mata nga diri gud hiya magkikita nga may seksuwal nga hingyap ha iba nga babaye. (Job 31:1) Magin determinado nga diri magkita hin pornograpiya, ngan likyan gud an pagkaada romantiko nga pagbati ha diri mo padis.

KON ANO AN IMO MAHIHIMO:

  • Ipakita ha iba nga maunungon ka gud ha imo padis

  • Hunahunaa an pagbati han imo padis, ngan iundang dayon an bisan ano nga relasyon ha iba nga nagigin hinungdan nga diri na komportable an imo padis