Leksion 7

Kay ano nga importante an pirme nga pag-ampo? (1)

Kan kanay kita sadang mag-ampo, ngan paonan-o? (2, 3)

Ano an husto nga mga ulohan ha pag-ampo? (4)

San-o ka sadang mag-ampo? (5, 6)

Pinamamatian ba han Dios an ngatanan nga mga pag-ampo? (7)

1. An pag-ampo amo an mapainubsanon nga pakiistorya ha Dios. Sadang ka mag-ampo pirme ha Dios. Dida hito aabaton mo nga duok ka ha iya sugad ha usa ka hinigugma nga sangkay. Hi Jehova daku hinduro ngan gamhanan, kondi namamati hiya ha aton mga pag-ampo! Pirme ka ba nag-aampo ha Dios?​—Salmo 65:2; 1 Tesalonika 5:17.

2. An pag-ampo bahin han aton pagsingba. Salit, sadang kita mag-ampo ha Dios la, hi Jehova. Han nakanhi hi Jesus ha tuna, pirme hiya nag-aampo ha iya Amay, diri ha bisan  hin-o. Sadang buhaton naton an pariho. (Mateo 4:10; 6:9) Kondi, an ngatanan nga aton mga pag-ampo sadang sidngon ha ngaran ni Jesus. Ipinapakita hini nga gintatahod naton an katungdanan ni Jesus ngan natoo kita ha iya halad nga lukat.​—Juan 14:6; 1 Juan 2:​1, 2.

3. Kon nag-aampo kita sadang makiistorya kita ha Dios tikang ha aton kasingkasing. Diri naton sadang igsiring an aton mga pag-ampo nga minimemorya o binabasa tikang ha libro han pag-ampo. (Mateo 6:​7, 8) Makakag-ampo kita ha bisan ano matinalahuron nga posisyon, ha bisan san-o nga panahon, ngan ha bisan diin nga lugar. Makakabati an Dios bisan ha hilom nga mga pag-ampo nga ginsiring ha aton kasingkasing. (1 Samuel 1:​12, 13) Maopay nga magbiling hin usa ka hilom nga lugar nga hirayo tikang ha iba nga mga tawo basi maisiring an aton personal nga mga pag-ampo.​—Markos 1:35.

4. Ano nga mga ulohan han mga butang an mahimo mo ig-ampo? Bisan ano nga makakaapekto ha imo pakigsangkay ha iya. (Filipos 4:​6, 7) Ipinapakita han modelo nga pag-ampo nga sadang mag-ampo kita mahitungod han ngaran ngan katuyoan ni Jehova. Mahimo liwat kita mangaro han aton materyal nga mga panginahanglan, nga pasayloon an aton mga sala, ngan para ha bulig ha pag-ato ha pagsulay. (Mateo 6:​9-13) An aton mga pag-ampo diri sadang magin hakugnon. Sadang kita mag-ampo para la ha mga butang nga nauyon ha kaburut-on han Dios.​—1 Juan 5:14.

5. Mahimo ka mag-ampo bisan san-o nga an imo kasingkasing nagpapagios ha imo nga magpasalamat o dayawon an Dios. (1 Kronikas 29:​10-13) Sadang ka mag-ampo kon mayada ka mga problema ngan ginsasarihan an imo pagtoo. (Salmo 55:22; 120:1) Angayan an pag-ampo antes ka kumaon. (Mateo 14:19) Gindadapit kita ni Jehova nga mag-ampo “ha tagsa nga okasyon.”​—Efeso 6:18.

6. Labi na nga kinahanglan naton mag-ampo kon nakahimo kita hin seryoso nga sala. Ha sugad nga mga panahon sadang kita mangamuyo han kalooy ngan pasaylo ni Jehova. Kon aton igsusumat an aton mga sala ha iya ngan buhaton an aton gimaopayi nga diri utruhon ito, an Dios “andam ha pagpasaylo.”​—Salmo 86:5; Proberbios 28:13.

7. Hi Jehova namamati ha mga pag-ampo la han magtadong nga mga tawo. Basi pamation han Dios an imo mga pag-ampo, kinahanglan pangalimbasugan mo nga magkinabuhi ha iya mga balaud. (Proberbios 15:29; 28:9) Kinahanglan magin mapainubsanon ka kon nag-aampo ka. (Lukas 18:​9-14) Kinahanglan mangalimbasog ka nga buhaton an uyon ha imo gin-aampo. Dida hito pamamatud-an mo nga mayada ka pagtoo ngan iton gud an karuyag mo sidngon. Hiton la nga paagi babatunon ni Jehova an imo mga pag-ampo.​—Hebreo 11:6.