Pakadto ha sulod

PAKIANA HAN MGA BATAN-ON

Kay Ano nga Kinahanglan Umatender ha mga Katirok ha Kingdom Hall?

Kay Ano nga Kinahanglan Umatender ha mga Katirok ha Kingdom Hall?

An mga Saksi ni Jehova nagkakatirok duha ka beses kada semana ha ira mga lugar han pagsingba nga gintatawag nga Kingdom Hall. Ano an ginbubuhat didto, ngan paonan-o ka makakabenepisyo ha pag-atender?

 Ano an ginbubuhat ha Kingdom Hall?

An Kingdom Hall usa nga lugar diin an mga tawo nahibabaro hin praktikal nga mga impormasyon tikang ha Biblia. An mga katirok didto makakabulig ha imo nga:

  • mahibaro han kamatuoran mahitungod ha Dios.

  • masabtan an kahulogan han mga panhitabo yana.

  • magin mas maopay nga tawo.

  •  magkaada maopay gud nga kasangkayan.

Maaram ka ba? An katirokan han mga Saksi ni Jehova gintatawag nga Kingdom Hall kay kaurogan nga ginhihisgotan didto an Ginhadian han Dios.—Mateo 6:9, 10; 24:14; Lucas 4:43.

 Kay ano nga kinahanglan ka umatender?

Makakabulig ha imo an mga impormasyon. An mga prinsipyo ha Biblia nga ginhihisgotan ha mga katirok han mga Saksi ni Jehova makakabulig ha imo nga magkaada hin kinaadman. (Proberbios 4:5) Karuyag sidngon, an Biblia makakabulig ha imo nga makahimo hin mag-opay nga desisyon. Makakabulig liwat ito ha imo nga mabaton an importante nga mga pakiana ha kinabuhi, upod na an:

Ini an pipira han mga ulohan han mga pahayag nga iginpipresenta ha amon mga katirok ha weekend:

  • Kay Ano nga Kinahanglan Magpagiya Kita ha Biblia?

  • Diin Ka Makakakuha hin Bulig ha Panahon han Kagol-anan?

  • Kon Ano an Ginbubuhat han Ginhadian han Dios Para ha Aton Yana.

“Umatender ha katirok an usa ko nga kaklase. Sumapit hiya ha amon pamilya ngan iginpagamit namon ha iya an amon mga libro. Kahuman, nagsiring hiya ha akon nga naimpres gud hiya ha mga komento han mga tawo ha mga bahin diin puydi makapartisipar an mga mamarati. Nagsiring liwat hiya nga ha ira singbahan waray hira ginagamit nga mga publikasyon para ha pag-aram pariho ha aton.”—Brenda.

Maaram ka ba? Waray bayad an pag-atender ha Kingdom Hall, ngan waray pangulekta nga ginhihimo.

An pakig-upod ha mga naatender magpaparig-on ha imo. An Biblia nasiring nga an usa nga rason kon kay ano nga kinahanglan magkatirok an mga Kristiano amo an ‘pagdinasigay ha usa kag usa.’ (Hebreo 10:24, 25) Yana kadam-an nga tawo makikalugaringon, salit makarepresko gud makig-upod ha mga tawo nga gin-uuna an Dios ngan an iba kay ha ira kalugaringon.

“Katapos han bug-os nga adlaw, usahay naabat ako hin kasubo ngan kakapoy. Pero pirme nag-oopay an akon pag-abat tungod han mga tawo ha Kingdom Hall. Pag-uli ko kahuman han katirok, malipayon ako ngan andam na liwat ha pag-atubang han sunod nga adlaw.”—Elisa.

Maaram ka ba? Sobra 120,000 an kongregasyon han mga Saksi ni Jehova ha bug-os nga kalibotan, ngan nagkakatirok hira ha sobra 60,000 nga lokasyon. Ha aberids, mga 1,500 nga Kingdom Hall an gintutukod kada tuig tungod kay nagtitikadamu an mga naatender. *

^ par. 27 Basi makabiling hin lokasyon han katirok, kitaa an page nga “Mga Katirok ha Kongregasyon han mga Saksi ni Jehova” ngan i-click an “Pamiling hin Lokasyon nga Hirani ha Iyo.”