Pakadto ha sulod

MAY-ADA BA NAGDISENYO HITO?

An Sonar han Dolphin

An Sonar han Dolphin

An mga dolphin, o lumod, nakakahimo hin iba-iba nga lagatik ngan huni ngan katapos, pinamamatian nira an mga echo basi mahibaroan kon hain hira ngan kon ano an aada ha ira palibot. Pinaagi han natural nga sonar han bottlenose dolphin (Tursiops truncatus), an mga syentista naghihimo hin mga underwater acoustic system basi masolusyonan an mga problema nga diri kaya masulbad han aton teknolohiya yana.

Tagda ini: Tungod han sonar han dolphin, kaya hito mabilngan an mga isda nga natago ha baras ha salad han dagat ngan mahibaroan an kaibahan han isda ngan bato. Sumala kan Keith Brown, usa nga propesor han Heriot-Watt University, Edinburgh, Scotland, kaya liwat han dolphin nga “mahibaroan an kaibahan han mga surudlan nga may sulod nga tubig-tab-ang, tubig-dagat, syrup, ngan asyete tikang ha [kahirayo nga] 10 ka metros [32.8 ft].” Karuyag han mga syentista maghimo hin mga aparato nga may sugad hito nga abilidad.

Ha distansya nga 10 ka metros, kaya mahibaroan han mga dolphin an kaibahan han mga surudlan depende han sulod hito

Gin-adman han mga parasaliksik an abilidad han dolphin nga makahimo ngan makabati hin tunog ngan nagsari hira ha pagsubad hito. Tungod hito, naghimo hira hin hi-tech nga electronic sonar device ngan iginbutang ito ha tubo nga waray mag-usa ka metros (3.3 ft) an kahilaba. Ini nga aparato, nga igintaod ha usa nga underwater robotic vehicle nga puropariho hin torpedo, gindisenyo basi mainspeksyon an salad han dagat, mahiagian an nakalubong nga mga butang sugad han mga kable o mga tubo, ngan mausisa ito nga diri na kinahanglan humirani. Ginhuhunahuna han mga nag-imbento hito nga aparato nga magagamit nira ito ha industriya han asyete ngan gasolina. Tungod hito nga aparato nga ginsubad ha sonar han dolphin, mas damu na an makukuha nga impormasyon hito kay ha mga sonar device yana, mabubuligan an mga teknisyan nga maibutang an mga pandagat nga equipment ha pinakamaopay nga lokasyon, ngan mahibabaroan an bisan ano nga ruba​—sugad han gutiay hinduro nga mga gutak ha mga poste nga nasuporta han oil-rig—​ngan bisan an barado nga mga tubo.

Ano ha imo panhunahuna? An abilidad ba han sonar han bottlenose dolphin produkto han ebolusyon, o may nagdisenyo hito?