Pakadto ha sulod

MAY-ADA BA NAGDISENYO HITO?

An Panlimpyo han Antena han Carpenter Ant

An Panlimpyo han Antena han Carpenter Ant

Importante ha mga insekto an kalimpyo basi makalupad, makasaka, ngan mahibaroan an nahitatabo ha ira palibot. Pananglitan, an mahugaw nga antena han tubak nagpapaluya han abilidad hito ha pagnabigar, pagkomunikar, ngan paghibaro hin mga hamot. Salit “waray ka gud makikit-an nga mahugaw nga insekto,” siring han zoologist nga hi Alexander Hackmann. “Maaram hira kon paonan-o lilimpyohan an ira kalugaringon tikang ha mga hugaw.”

Tagda ini: Gin-estudyohan ni Hackmann ngan han iya mga kaupod an pamaagi nga ginagamit han usa nga klase han carpenter ant (Camponotus rufifemur) ha paglimpyo han iya antena. Nadiskobrehan nira nga basi matanggal hini nga tubak an iba-iba nga kadaku han hugaw ha ira antena, ginpipilo hini an iya tiil basi makaporma hin pariho hin kimpit ngan ibubutang niya an antena dida hito nga kimpit ngan huhulbuton an tagsa nga antena. An madakmol nga mga barahibo dida hito nga kimpit nakakatanggal han pinakadagku nga hugaw. An gurogudti nga hugaw natatanggal pinaagi hin pino nga barahibo nga pariho kahalaghag ha barahibo han antena han tubak. Katapos, an pinakagudti nga hugaw​—nga sugad kaguti han 1/80 han diyametro han buhok han tawo—​natatanggal pinaagi hin mas pino pa gud nga barahibo.

Kitaa an paglimpyo han carpenter ant ha iya antena

Natoo hi Hackmann ngan an iya team nga an pamaagi nga ginagamit han mga tubak ha pagtipig nga limpyo han ira antena magagamit liwat ha mga industriya. Pananglitan, magagamit an sugad nga mga pamaagi ha pagtipig han kalimpyo durante han paghimo hin sensitibo nga microelectronic nga mga piyesa ngan mga semiconductor, diin bisan an gutiay la nga hugaw mahimo makadaot hini.

Ano ha imo panhunahuna? An epektibo ba nga pamaagi han carpenter ant ha paglimpyo han iya antena produkto han ebolusyon, o may nagdisenyo hito?