Pakadto ha sulod

MAY-ADA BA NAGDISENYO HITO?

An Urusahon nga Kaway han Kugita

An Urusahon nga Kaway han Kugita

An mga robotics engineer naghihimo hin aparato nga mabulig ha mga doktor ha pag-opera ha mga parte han lawas nga gudtiay an espasyo nga diri na kinahanglan samaran hin daku. An usa han ira naimbento ginsubad tikang ha malubay hinduro nga kaway han kugita.

Tagda ini: Kaya han kugita kapyotan, kaptan, ngan piiton an usa nga butang gamit an iya walo nga nauunat ngan malubay nga kaway, bisan ha haligot hinduro nga espasyo. Diri la kaya piluon han kugita an iya mga kaway ha iba-iba nga direksyon kondi kaya liwat niya patig-ahon an iba nga bahin han iya kaway kon ginkikinahanglan.

Natoo an mga parasaliksik nga an pagkaada sugad kahumok ngan kalubay nga robotic arm daku an maibubulig ha pag-opera nga diri na kinahanglan samaran hin daku. Tungod hini nga klase hin aparato nagin posible nga operahan an mga pasyente ngan diri na kinahanglan mag-agi pa hin komplikado nga operasyon.

Kitaa an malubay nga mga kaway han kugita

An sugad nga robotic arm naimbento na ngan ginagamit ha eksperimento nga mga operasyon. Kaya alsahon ngan kaptan han usa nga bahin han lima ka pulgada nga robotic arm an mahumok nga mga internal organ ngan diri nadadaot an mga organ, samtang an usa nga bahin amo an nag-oopera. Sumala kan Dr. Tommaso Ranzani, usa nga membro han grupo nga naghimo hini nga aparato, “natoo kami nga ini nga aparato amo an magigin tinikangan han bag-o ngan mas maopay nga mga bersyon nga may-ada mas hi-tech nga mga feature.”

An mahumok ngan malubay nga robotic arm daku an maibubulig ha pag-opera

Ano ha imo panhunahuna? An kaway ba han kugita produkto han ebolusyon, o may nagdisenyo hito?