Pakadto ha sulod

MAY-ADA BA NAGDISENYO HITO?

An Kakaiba nga Panit han Balat

An Kakaiba nga Panit han Balat

An balat usa nga hayop nga naukoy ha salad han dagat ngan ha mga coral reef. Usahay, an ira lawas bukol-bukol, bukdo-bukdo, o tais-tais pa ngani. Kaya nira nga magin mahumok gud pariho hin wax o magin matig-a gud pariho hin tabla ha sulod la hin pipira ka minuto o mga segundo pa ngani. Tungod hito, kaya han balat nga sumuksok ha gudtiay gud nga mga guhang, ngan katapos, ginpapatig-a niya an iya lawas basi diri hiya mahulbot han mga hayop nga naatake ha iya. Nahihimo ito han balat tungod han iya kakaiba nga panit.

Tagda ini: An panit han balat mahimo magin matig-a, maturotig-a, ngan mahumok. Basi mahimo ini, gintuturugkop o ginbuburublag han balat an mga fiber ha iya panit. Ginagamit niya an iba-iba nga protina nga nakakapatig-a o nakakapahumok han panit.

Gintuturugkop han mga protina nga nakakapatig-a an mga fiber basi magin mas matig-a an panit han balat. Ginbuburublag naman han mga protina nga nakakapahumok an mga fiber, salit nagigin mas mahumok an panit hito. Kaya pahumukon gud han balat an iya panit nga sugad hin natutunaw na ito.

Karuyag gud subaron han mga syentista an abilidad han panit han balat. Naniniguro hira nga makahimo hin mga electrode para ha operasyon ha utok—mga electrode nga matig-a basi maibutang ito ha husto nga dapit pero katapos, magigin mahumok liwat. Kon makakahimo hira hin sugad nga mga electrode, daku gud an posibilidad nga magin malampuson an operasyon.

Ano ha imo panhunahuna? An kakaiba ba nga panit han balat produkto han ebolusyon, o may nagdisenyo hito?