Han nakadto ka pa ha tiyan han imo nanay, nagtikang an imo kinabuhi ha usa nga gutiay gud nga cell nga gintatawag nga zygote, nga makikita la pinaagi hin microscope. Pero paglabay hin pipira ka bulan, nagin usa ka na nga baby. Ito nga uusa nga cell nagdamu ngan nahimo nga sobra 200 nga iba-iba nga klase hin cell nga may magkadurodilain nga porma, kadaku, ngan papel.

 Hunahunaa ini: Ginkukopya han zygote an kalugaringon nga DNA hito ngan ginbabahin ha duha. Ini nga proseso pauroutro nga nahitatabo hin damu ka beses ha nabahin nga cell. Ha tinikangan, papriho an ngatanan nga bag-o nga cell. Aada ha ira DNA an tanan nga impormasyon nga kinahanglan para mahimo an tagsa nga klase hin cell.

 Usa ka semana katapos magtikang an pagburod, an mga cell nagigin duha nga klase. An usa nga klase hin cell nagigin embryo, samtang an iba naman nga klase hin cell nagigin placenta ngan iba pa nga mga tissue nga nabulig ha embryo nga dumaku.

 Ha ikatulo ka semana, nagigin tulo ka layer an mga cell han embryo. Adton ha gawas nga layer an magigin mga nerve, utok, baba, panit, ngan iba pa nga cell. An mga cell ha butnga nga layer an magigin dugo, tul-an, kidney, muscle, ngan iba pa nga tissue. An mga cell ha sulod nga layer naman an magigin mga internal organ sugad han baga, pantog, ngan an kadam-an nga bahin han digestive system.

 Ha panahon han pagburod, may mga cell nga nabalhin—tag-usa-usa o sugad nga grupo—tikang ha usa nga bahin han embryo ngadto ha iba nga bahin. May mga cell nga nag-uurupod ngan nagigin mga sheet o napipilo ngan nagigin mga cord o cavity. Basi mahimo ini nga proseso, kinahanglan gud an koordinasyon. Halimbawa, may mga panahon nga an mga sheet han cell nalulukot ngan nagigin gudtiay nga mga tubo. Durungan ini nga nahitatabo ha iba-iba nga bahin han embryo. Katapos, ini nga mga tubo nahilaba ngan nagsasanga-sanga, ngan ha urhi, nagdudugtong-dugtong tubtob nga makahimo hin kompleto nga circulatory network.

 Kon matawo na an usa nga mahimsog nga bata, an binilyon nga mga cell hito naporma na ha tama nga klase, ha tama nga lokasyon, ngan ha tama nga panahon.

 Para ha imo, an abilidad ba han cell nga magin iba-iba nga parte han lawas resulta la han ebolusyon? O may nagdisenyo hito?