An Biblia makakabulig gud ha aton para makahimo hin tama nga desisyon. Mabulig ito ha aton nga ‘makakuha hin kinaadman ngan pagsabot.’ (Proberbios 4:5) Ha pipira nga sitwasyon, iginsusumat hito ha aton an pinakamaopay nga desisyon. Ha iba nga sitwasyon, naghahatag ito ha aton hin sagdon nga maggigiya ha aton basi makahimo hin maaramon nga desisyon.

Hini nga artikulo

•  Mga tip nga mabulig ha imo nga makahimo hin tama nga desisyon

•  Dapat ko ba bag-uhon an desisyon nga akon na ginhimo?

•  Anoman kon nakahimo ako hin sayop nga desisyon nga diri ko na kaya bag-uhon?

•   Ayaw pagdali-dali pagdesisyon. An Biblia nasiring: “An maaramon nga tawo naghuhunahuna hin maopay han iya tagsa nga pitad.” (Proberbios 14:15) Kon magdali-dali ka pagdesisyon, bangin may malikatan ka nga importante nga impormasyon. Hunahunaa hin maopay an imo mga opsyon.—1 Tesalonica 5:21.

•   Ayaw paghimo hin mga desisyon base la ha imo inaabat. An Biblia nagpapahamangno ha aton nga diri kita pirme makakasarig ha aton kasingkasing. (Proberbios 28:26; Jeremias 17:9) Pananglitan, bangin diri kita makahimo hin tama nga desisyon kon nag-iisog kita, nadidepres, nanluluya, naaringit, o kapoy hinduro.—Proberbios 24:10; 29:22.

•   Pag-ampo para hin kinaadman. (Santiago 1:5) Nalilipay an Dios nga batunon an sugad nga mga pag-ampo. Mahigugmaon hiya nga Amay ngan karuyag niya nga an iya mga anak makalikay ha mga problema. “Hi Jehova mismo naghahatag hin kinaadman; tikang ha iya baba nagawas an kahibaro ngan husto nga pagturotimbang.” a (Proberbios 2:6) An nangunguna nga ginagamit niya ha paghatag hin kinaadman amo an iya sinurat nga Pulong, an Biblia.—2 Timoteo 3:16, 17.

•   Pag-research. Para makahimo hin tama nga desisyon, kinahanglan mo hin masasarigan nga impormasyon. An Biblia nasiring nga “an tawo nga maaramon namamati ngan nakarawat hin dugang nga instruksyon.” (Proberbios 1:5) Diin ka makakabiling hin mapulsanon ngan masasarigan nga impormasyon?

   Siyahan, hibaroi an ginsisiring han Biblia mahitungod ha butang nga kinahanglan mo pagdesisyonan. Maaram an aton Maglalarang kon ano an pinakamaopay para ha aton, ngan aada ha iya Pulong an pinakamasasarigan nga sagdon. (Salmo 25:12) Para ha iba nga desisyon, an Biblia klaro nga nagsusumat han kinahanglan naton buhaton, bangin pinaagi hin mga balaud o mga sugo. (Isaias 48:17, 18) Pero para ha damu nga iba pa nga butang, waray direkta nga ginsisiring an Biblia. Lugod, naghahatag ito hin mga prinsipyo nga naggigiya ha aton. Makakabulig ini ha aton nga makahimo hin tama nga desisyon, bisan kon diri ito pariho han desisyon han iba. Basi makabiling hin mga teksto ha Biblia nga makakabulig ha imo, pag-research ha basado ha Biblia nga mga artikulo o publikasyon, sugad han libre nga makikita hini nga website. b

   Usahay bangin kinahanglan mo usisahon an iba nga makukuhaan hin masasarigan nga impormasyon. Pananglitan, antes ka pumalit hin usa nga butang—labi na kon mahal ito—mas maopay kon magri-research ka anay parte hito nga produkto ngan han manufacturer hito, upod na an mga kinahanglan mo buhaton kon guba an produkto ngan kon karuyag mo ito ibalik. Syempre, kinahanglan mo liwat anay siguruhon kon ito gud nga produkto an imo kinahanglan.

   “An mga plano napapakyas kon waray pagkonsultahay,” siring han Biblia. (Proberbios 15:22) Salit antes ka magdesisyon, pakiistorya anay ha masasarigan nga mga tawo. Pananglitan, mas maopay kon makikiistorya ka anay ha doktor antes magdesisyon parte ha pagpatambal. (Mateo 9:12) Usahay, makakabulig liwat kon makikiistorya ka ha mga tawo nga inatubang hin pariho nga sitwasyon ha imo. Pero hinumdumi nga diri hira, kondi ikaw an kinahanglan maghimo han desisyon ngan mag-aani han mga resulta hito.—Galacia 6:4, 5.

•   Turotimbanga an mga posible magin resulta. Base ha nakuha mo nga mga impormasyon, puydi mo ilista an imo mga opsyon, sugad man an mga bentaha ngan disbentaha han kada tagsa. Ngan tangkod nga usisaha an posible magin resulta han imo desisyon. (Deuteronomio 32:29) Pananglitan, paonan-o an imo desisyon makakaapekto ha imo, ha imo pamilya, o ha iba? (Proberbios 22:3; Roma 14:19) Kon huhunahunaon mo hin maopay ini nga mga pakiana ngan an mga prinsipyo ha Biblia, makakabulig ini ha imo nga makahimo hin maaramon ngan mahigugmaon nga desisyon.

•   Pagdesisyon. May mga panahon nga bangin mag-alang kita ha paghimo hin desisyon tungod kay diri kita sigurado. Pero kon diri kita magdidesisyon mahimo kita mawad-an hin oportunidad o mahingadto ha diri maopay nga sitwasyon. Ha iba nga pagkayakan, an diri paghimo hin desisyon puropariho hin sayop nga desisyon. Iginpariho ito han Biblia ha pagtanom, ito nasiring: “Hiya nga nag-iinaw han hangin diri magsasabwag; ngan hiya nga nagtatagad han mga dampog diri magbabari.”—Eclesiastes 11:4, An Baraan nga Kasuratan.

 Hinumdumi liwat nga bangin diri perpekto bisan an pinakamaopay nga desisyon. Kasagaran nga nag-uupod hin pagsakripisyo an pagpili. Bangin liwat may diri ginlalaoman nga butang nga mahitabo. (Eclesiastes 9:11) Salit gamita an pinakamaopay nga impormasyon nga may-ada ka, ngan pilia an opsyon nga posible gud maglampos.

 Puydi pa mabag-o an desisyon. Bangin magbag-o an imo kahimtang, o bangin may makita ka nga diri ginlalaoman nga mga problema ha imo pa la ginhimo nga desisyon. Salit, bangin maaramon nga hunahunaon utro an sitwasyon ngan pilion an iba nga opsyon nga posible gud magkaada maopay nga resulta.

 Pero an iba nga desisyon diri na puydi bag-uhon. (Salmo 15:4) Pananglitan, ginlalaoman han Dios an mag-asawa nga tutumanon nira an ira saad han ginkasal hira. c (Malakias 2:16; Mateo 19:6) Kon magkaada mga problema ha pag-asawa, kinahanglan mangalimbasog nga sulbaron ito ngan diri magbulag.

 May mga panahon nga kita ngatanan nakakahimo hin sayop o diri maaramon nga desisyon. (Santiago 3:2, footnote) Normal la nga bangin magbasol kita o makonsensya. (Salmo 69:5) Ngani, makakaopay ha aton an sugad nga pag-abat kon magpupugong ito ha aton nga himoon utro an pariho nga sayop! (Proberbios 14:9) Pero, ginsasagdonan kita han Biblia nga diri sobra nga makonsensya, kay puydi ito makadaot ha mental o ha emosyonal. (2 Corinto 2:7) d Siring han Biblia, “hi Jehova maloloy-on ngan mapinairon. Diri hiya pirme mamimiling hin sayop.” (Salmo 103:8-13) Salit pangalimbasog nga mahibaro hin leksyon tikang ha sayop nga desisyon nga diri mo na mababag-o ngan buhata an imo mahihimo basi matadong an imo sayop.