An baton han Biblia

 Bisan kon diri detalyado nga ginhihisgotan han Biblia an paghuygo, masasabtan naton tikang ha mga prinsipyo ha Biblia nga sala an paghuygo para ha Dios.—Efeso 5:17. a

•   Naghuhuygo an usa tungod ha kahakog, nga ginkakangalasan han Dios. (1 Corinto 6:9, 10; Efeso 5:3, 5) Karuyag han mga paraghuygo nga makuha an kwarta han iba pinaagi ha pagpirde ha ira, pero diri gin-uuyonan han Biblia an kaipa ha mga gintatag-iya han iba.—Exodo 20:17; Roma 7:7; 13:9, 10.

•   An paghuygo, bisan ha gutiay nga kantidad, mahimo makapukaw ha nakakadaot nga gugma ha kwarta.—1 Timoteo 6:9, 10.

•   An mga paraghuygo agsob nga nasarig ha mga patootoo o swerte. Pero an sugad nga mga gintotoohan ginhuhunahuna han Dios nga usa nga porma hin idolatriya, nga kontra ha pagsingba ha iya.—Isaias 65:11.

•   Imbes nga maghingyap nga makakwarta ha masayon nga paagi, an Biblia nag-aaghat nga magin maduruto. (Eclesiastes 2:24; Efeso 4:28) Adton mga nagsusunod hini nga sagdon makakakaon han “pagkaon nga ira mismo gintrabahoan.”—2 Tesalonica 3:10, 12.

•   An paghuygo nag-aaghat ha usa nga makigkompetensya, nga diri gin-uuyonan han Biblia.—Galacia 5:26.