Pakadto ha sulod

May Ngaran ba an Dios?

May Ngaran ba an Dios?

An baton han Biblia

An ngatanan nga tawo may-ada ngaran. Salit diri ba makatadunganon la nga may ngaran liwat an Dios? An pagkaada ngan paggamit han personal nga ngaran importante nga bahin basi matipigan naton an aton relasyon ha aton kasangkayan. Importante liwat ito ha aton pakigsangkay ha Dios.

Ha Biblia, an Dios nagsiring: “Ako hi Jehova, amo ito an akon ngaran.” (Isaias 42:8) Bisan kon damu an iya titulo, sugad han “Dios nga Makagarahum-ha-ngatanan,” “Soberano nga Ginoo,” ngan “Maglalarang,” ginpapasidunggan niya an mga nagsisingba ha iya pinaagi ha pag-aghat ha ira nga tawagon hiya ha iya personal nga ngaran.​—Genesis 17:1, NW; Buhat 4:24; 1 Pedro 4:19.

Mababasa ha damu nga hubad han Biblia ha Eksodo 6:3 an personal nga ngaran han Dios. Ito nasiring: “Ako pinakita kan Abraham, kan Isaak, ngan kan Jakob, nga Dios nga Makagarahum; kondi pinaagi han akon ngaran nga hi Jehova ako waray kilal-a nira.”

Jehovah an hubad han ngaran han Dios ha Ingles, nga maiha na hinduro nga ginagamit. Bisan kon ginagamit han damu nga eskolar an ispeling nga “Yahweh,” Jehovah an ngaran nga ginkikilala han kadam-an. An siyahan nga bahin han Biblia iginsurat diri ha Ingles kondi ha Hebreo, yinaknan nga ginbabasa tikang ha too ngadto ha wala. Hito nga yinaknan, an ngaran han Dios may-ada upat nga konsonante o mangarabay, יהוה. Iton upat nga letra ha Hebreo​—nga ginhubad nga YHWH—​gintatawag nga Tetragrammaton.