An baton han Biblia

 Iginsusumat han Biblia an mga panhitabo ngan kahimtang nga magtitigaman han “ikatarapos han [presente nga] sistema han mga butang” o “an katapusan han kalibutan.” (Mateo 24:3; An Baraan nga Kasuratan) Gintatawag han Biblia ini nga peryodo han panahon nga an “kataposan nga mga adlaw” ngan an “panahon han katapusan.”—2 Timoteo 3:1; Daniel 8:19; An Baraan nga Kasuratan.

Ano an pipira nga tagna parte ha “kataposan nga mga adlaw”?

 Igintagna han Biblia an damu nga butang nga durungan nga mahitatabo sugad nga “tigaman” han kataposan nga mga adlaw. (Lucas 21:7) Pansina an masunod nga mga ehemplo:

 Mga girra ha iba-iba nga bahin han tuna. Hi Jesus nagtagna: “An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian.” (Mateo 24:7) Igintagna liwat han Pahayag 6:4 an usa nga simboliko nga mangangabayo nga nagrirepresentar ha mga girra nga ‘magkukuha han kamurayawan ha tuna.’

 Gutom. Hi Jesus nagtagna: “Magkakaada kakulang hin mga pagkaon.” (Mateo 24:7) An libro han Pahayag nagtagna hin usa pa nga simboliko nga mangangabayo nga magpapahinabo hin gutom ha iba-iba nga dapit han kalibotan.—Pahayag 6:5, 6.

 Magkusog nga mga linog. Hi Jesus nagsiring nga magkakaada “magkusog nga mga linog ha iba-iba nga mga lugar.” (Mateo 24:7; Lucas 21:11) Ini nga magkusog nga linog ha iba-iba nga bahin han tuna magriresulta hin pag-antos ngan kamatay han damu nga tawo nga waray pa mahitabo tikang pa hadto.

 Sakit. Hi Jesus nagsiring nga magkakaada mga epidemya hin “makangingirhat nga mga sakit.”—Lucas 21:11, Contemporary English Version.

 Krimen. Hadto pa man, an mga tawo naghihimo na hin mga krimen. Pero hi Jesus nagtagna nga ha kataposan nga mga adlaw, “magdadamu an magraut.”—Mateo 24:12, An Baraan nga Kasuratan.

 Pagdaot han tuna. An Pahayag 11:18 nagtagna nga an mga tawo ‘magbubungkag han tuna.’ Hihimoon nira ito ha damu nga paagi, diri la ha bayolente ngan maraot nga mga buhat kondi pinaagi liwat ha pagdaot ha palibot.

 Pagtikaraot han batasan han mga tawo. An Biblia nagtagna ha 2 Timoteo 3:1-4 nga an kadam-an han mga tawo magigin “diri mapasalamaton, diri maunungon, . . . diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan, mga traydor, matig-a an ulo, mahilig magrakudaku.” Ini nga mga batasan magtitikagrabe salit tama la an pagkahulagway nga nabubuhi na kita ha “peligroso nga mga panahon.”

 Kawara han maopay nga relasyon han pamilya. An Biblia nagtagna ha 2 Timoteo 3:2, 3 nga damu nga tawo an magkakaada “waray kinaiya nga gugma” ha ira pamilya ngan an mga anak magigin “diri masinugtanon ha [ira] mga kag-anak.”

 Waray gugma ha Dios. Hi Jesus nagtagna: “Magtutugnaw an gugma han kadam-an.” (Mateo 24:12) Karuyag sidngon ni Jesus nga magtutugnaw an gugma ha Dios han kadam-an nga tawo. An 2 Timoteo 3:4 nasiring liwat nga ha kataposan nga mga adlaw, an mga tawo magigin “mahigugmaon ha kalipayan imbes nga mahigugmaon ha Dios.”

 Nagpapakunokuno nga relihiyoso. Ha 2 Timoteo 3:5, an Biblia nagtagna nga an mga tawo mag-aangkon nga nagsisingba ha Dios pero ha pagkamatuod diri nagkikinabuhi uyon ha iya mga suruklan.

 Mas matin-aw nga pagsabot ha mga tagna han Biblia. An libro han Daniel nagtagna nga “ha panahon han kataposan,” damu an mahibabaro ha mga kamatuoran han Biblia, upod na an husto nga pagsabot hini nga mga tagna.—Daniel 12:4, footnote.

 Pagsangyaw ha bug-os nga kalibotan. Hi Jesus nagtagna: “Inin maopay nga sumat han Ginhadian isasangyaw ha bug-os nga inuukyan nga tuna.”—Mateo 24:14.

 Damu an waray interes ngan magtatamay. Hi Jesus nagtagna nga igbabalewaray han kadam-an nga tawo an damu nga ebidensya nga hirani na an kataposan. (Mateo 24:37-39) Labot la hito, igintagna liwat han 2 Pedro 3:3, 4 nga tatamayon han iba an mga ebidensya ngan diri hira matuod bisan kon nakikita na nira ito.

 Katumanan han ngatanan nga tagna. Hi Jesus nagsiring nga ha kataposan nga mga adlaw durungan nga matutuman ini nga mga tagna, diri la an pipira o an kadam-an hito.—Mateo 24:33.

Nagkikinabuhi na ba kita ha “kataposan nga mga adlaw”?

 Oo. An kahimtang ha kalibotan ngan an kronolohiya han Biblia nagpapakita nga an kataposan nga mga adlaw nagtikang han 1914, an tuig nga nagtikang an Girra ha Kalibotan I. Basi masabtan kon ha ano nga paagi an kahimtang ha kalibotan nagpapakita nga nagkikinabuhi na kita ha kataposan nga mga adlaw, kitaa an masunod nga video:

 Han 1914, nagtikang pagmando an Ginhadian han Dios ha langit. An usa han siyahan nga ginhimo hito amo an pagpaiwas kan Satanas nga Yawa ngan han iya mga demonyo ngan limitahan na la ha tuna an ira mga buruhaton. (Pahayag 12:7-12) An impluwensya ni Satanas ha mga tawo nakikita gud ha ira magraot nga batasan ngan paggawi. Tungod hito, an kataposan nga mga adlaw nagigin “peligroso nga mga panahon nga makuri pakiangayan.”—2 Timoteo 3:1.

 Damu nga tawo an naiistres tungod ha peligroso nga mga panahon. Nababaraka hira nga diri na nagkakaurosa an mga tawo. Nahahadlok pa ngani an iba nga magparaptayay an mga tawo.

 Pero may mga tawo nga positibo la gihapon bisan kon naiistres ha kahimtang han kalibotan. Kombinsido hira nga ha diri na maiha wawad-on han Ginhadian han Dios ini nga mga problema han kalibotan. (Daniel 2:44; Pahayag 21:3, 4) Mapailubon nga naghuhulat hira ha Dios nga tumanon an iya mga saad, ngan naliliaw hira ha ginsiring ni Jesus: “An nagpailob tubtob ha kataposan matatalwas.”—Mateo 24:13; Micas 7:7.