Pakadto ha sulod

An Ginhadian han Dios ba Aada La ha Imo Kasingkasing?

An Ginhadian han Dios ba Aada La ha Imo Kasingkasing?

An baton han Biblia

 Diri, an Ginhadian han Dios diri la basta usa nga butang nga aada ha kasingkasing han mga Kristiano. * Iginsusumat han Biblia an tinuod nga nahimumutangan hito pinaagi ha pagtawaga hito nga “an ginhadian han langit.” (Mateo 4:17, An Baraan nga Kasuratan) Pansina kon paonan-o iginpapakita han Biblia nga tinuod gud ito nga gobyerno nga nagmamando tikang ha langit.

  •   An Ginhadian han Dios may mga magmarando, mga nasasakopan, mga balaud, ngan may awtoridad nga iestablisar an kaburut-on han Dios ha langit ngan ha tuna.—Mateo 6:10; Pahayag 5:10.

  •   An gobyerno, o Ginhadian, han Dios magmamando ha ngatanan nga “mga katawohan, mga nasud, ngan mga grupo nga iba-iba an yinaknan” ha tuna. (Daniel 7:13, 14) An awtoridad han pagmando hito diri tikang ha mga nasasakopan hito, kondi tikang mismo ha Dios.—Salmo 2:4-6; Isaias 9:7.

  •   Ginsidngan ni Jesus an iya matinumanon nga mga apostol nga makakaupod niya hira ha Ginhadian han langit basi ‘lumingkod ha mga trono.’—Lucas 22:28, 30.

  •   An Ginhadian may mga kaaway, nga bubungkagon hito.—Salmo 2:1, 2, 8, 9; 110:1, 2; 1 Corinto 15:25, 26.

 An Biblia diri nagtututdo nga an Ginhadian han langit aada la ha imo kasingkasing, nga sugad hin nagmamando ito ha imo kasingkasing kon namamati ka ha Dios. Pero iginpapakita hito nga an “pulong mahitungod han Ginhadian” o an “maopay nga sumat han Ginhadian” mahimo ngan dapat makaapekto ha aton kasingkasing.—Mateo 13:19; 24:14.

Ano an kahulogan han “aada ha sakob niyo an Ginhadian han Dyos”?

 An iba nga mga tawo nawuwurok mahitungod han nahimumutangan han Ginhadian tungod han pagkahubad han Lucas 17:21 han pipira nga Biblia. Pananglitan, an Maupay nga Sumat nga bersyon nasiring nga “aada ha sakob niyo an Ginhadian han Dyos.” Basi masabtan naton hin husto ini nga bersikulo, kinahanglan naton ikonsiderar an konteksto.

An Ginhadian han Dios waray dida ha kasingkasing han mga parakontra nga nag-iikaparatay kan Jesus

 Hini nga teksto, an kaistorya ni Jesus mga Pariseo, usa nga grupo han relihiyoso nga mga lider nga nakontra ha iya ngan kaapi hadton nag-iikaparatay ha iya. (Mateo 12:14; Lucas 17:20) Tama ba hunahunaon nga an Ginhadian aada ha ira matig-a nga kasingkasing? Hi Jesus nagsiring ha ira: “Ha sulod puno kamo han pagkahipokrito ngan pagkamatinalapason.”—Mateo 23:27, 28.

 Ha iba nga mga hubad, klaro nga iginpakita kon ano an karuyag sidngon ni Jesus ha iya ginsiring ha Lucas 17:21: “An ginhadian han Dios aanhi kaupod niyo.” (Kami an nag-italiko; Contemporary English Version) “An Ginhadian han Dios aada ha butnga niyo.” (Bag-o nga Kalibotan nga Hubad) An Ginhadian han langit “kaupod” o “aada ha butnga” han mga Pariseo, tungod kay hi Jesus, nga ginpili han Dios basi magmando sugad nga Hadi, natindog ha ira atubangan.—Lucas 1:32, 33.

^ Damu nga Kristiano nga mga relihiyon an nagtututdo nga an Ginhadian han Dios aada la ha kasingkasing han usa nga tawo. Pananglitan, ha United States, an Southern Baptist Convention nagsiring nga an Ginhadian han Dios “amo an pagmando han Dios ha kasingkasing ngan kinabuhi han indibiduwal.” Sugad man, ha iya libro nga Jesus of Nazareth, an papa nga hi Benedict XVI nagsiring nga “an Ginhadian han Dios naabot kon an kasingkasing han usa namamati ha Dios.”