An bawtismo nagpapasabot nga an usa nga tawo iginpapailarom ha tubig ngan katapos ginhahaw-as hiya tikang hito. a Ito an rason kon kay ano nga hi Jesus nagpabawtismo ha usa nga daku nga salog. (Mateo 3:13, 16) Sugad man, an usa nga taga-Etiopia nga lalaki naghangyo nga bawtismohan hiya han inabot hira ha dapit nga “may katubigan.”—Buhat 8:36-40.

An kahulogan han bawtismo

Iginpapariho han Biblia an bawtismo ha lubong. (Roma 6:4; Colosas 2:12) An bawtismo ha tubig nagsisimbolo ha kamatay han daan nga pagkinabuhi han usa nga tawo ngan pagtikang hin bag-o nga pagkinabuhi sugad nga Kristiano nga dedikado ha Dios. An bawtismo ngan an mga pitad nga ginkikinahanglan antes hito kahikayan han Dios para an usa magkaada limpyo nga konsensya nga iginbasar ha iya pagtoo ha halad ni Jesu-Kristo. (1 Pedro 3:21) Salit, igintutdo ni Jesus nga an iya mga disipulo kinahanglan magpabawtismo.—Mateo 28:19, 20.

An bawtismo ba ha tubig nagwawara han sala?

Diri. Igintututdo han Biblia nga malilimpyohan kita tikang ha sala pinaagi la han iginpaagay nga dugo ni Jesus. (Roma 5:8, 9; 1 Juan 1:7) Pero basi an usa makapahimulos ha halad ni Jesus, kinahanglan magpakita hiya hin pagtoo kan Jesus, bag-uhon an iya pagkinabuhi ngan ipahiuyon ito ha mga katutdoan ni Jesus, ngan magpabawtismo.—Buhat 2:38; 3:19.

Ano an bunyag?

An mga pulong nga “bunyag” ngan “pagbunyag” diri makikita ha Biblia. Nagtutudlok ito ha usa nga seremonya nga ginhihimo han pipira nga singbahan diin an usa nga minasus-an “ginbabawtismohan” (pinaagi ha pagwisik o pagbubo hin tubig ha iya ulo) ngan gintatagan hiya hin ngaran.

Igintututdo ba han Biblia an pagbawtismo ha minasus-an?

Diri. An Kristiano nga bawtismo para la hadton aada na ha edad nga kaya na makasabot ngan tumoo “han maopay nga sumat han Ginhadian han Dios.” (Buhat 8:12) Antes mabawtismohan an usa, kinahanglan anay niya mabatian an pulong han Dios, karawaton ito, ngan magbasol—mga buhat nga diri mahihimo han usa nga minasus-an.—Buhat 2:22, 38, 41.

Dugang pa, iginpapakita han Biblia nga an gudtiay pa nga mga anak han mga Kristiano baraan, o limpyo para ha Dios, tungod han pagin matinumanon han mga kag-anak. (1 Corinto 7:14) Kon ginkakarawat han Dios an pagbawtismo ha mga minasus-an, an pagin baraan hinin gudtiay pa nga anak diri unta igbabasar han Dios ha pagkamatinumanon han ira mga kag-anak. b

Sayop nga mga ideya mahitungod ha Kristiano nga bawtismo

Sayop nga ideya: Igintutdo ni Jesus an pagbawtismo ha mga minasus-an han nagsiring hiya nga para ha mga kabataan an Ginhadian.—Mateo 19:13-15; Marcos 10:13-16.

Kamatuoran: Diri mahitungod ha bawtismo an ginhihisgotan ni Jesus han ginsiring niya ito nga mga pulong. Lugod, iginpapakita niya nga adton naruruyag magin kwalipikado ha Ginhadian han Dios kinahanglan magin pariho hin bata—maaghop ngan andam magpatutdo.—Mateo 18:4; Lucas 18:16, 17.