Haros ngatanan nga pamilya may patakaran, pananglitan an patakaran parte ha curfew, paggamit hin gadyet, pamatasan, ngan iba pa.

 Ano man kon waray mo masunod an usa nga patakaran han iyo pamilya? Diri mo mababag-o an nahitabo, pero may mahihimo ka basi diri maggrabe an sitwasyon. Ini nga artikulo mabulig nga mahibaroan mo kon paonan-o.

•  An diri dapat himoon

•  An mas maopay himoon

•  An ginsisiring han iba nga batan-on

•   Kon waray mahibaro an imo mga kag-anak nga waray mo sunda an usa nga patakaran, bangin mahunahuna mo nga itago an imo sayop.

•   Kon nahibaro hira nga waray mo sunda an usa nga patakaran, bangin mahunahuna mo nga maghimo hin mga pasangil o basulon an iba.

 Diri tama nga himoon ito nga mga butang. Kay ano? Kay kon itago mo an nahitabo ngan maghimo hin mga pasangil tungod han imo nahimo, makikita han imo mga kag-anak nga diri ka pa hamtong.

 “Diri gud solusyon an pagbuwa. Maabot an panahon nga mahibabaroan gihapon an kamatuoran, ngan magigin mas mabug-at an disiplina ha imo kay waray mo dayon amina an imo sayop nga nahimo.”—Diana.

•   Amina an imo ginbuhat. An Biblia nasiring: “An nagtatabon han iya mga pagtalapas diri maglalampos.” (Proberbios 28:13) Maaram an imo mga kag-anak nga diri ka perpekto. Pero naglalaom hira nga magigin tangkod ka.

   “Mas masayon ka mapasaylo han imo mga kag-anak kon magsusumat ka han tinuod. Ngan kon magsusumat ka han tinuod, madudugangan an ira pagtapod ha imo.”—Olivia.

•   Pangaro hin pasaylo. An Biblia nasiring: “Igsul-ot niyo ngatanan an pagkamapainubsanon.” (1 Pedro 5:5) Kinahanglan mo magin mapainubsanon ha pangaro hin pasaylo ngan pugngan an imo kalugaringon nga maghimo hin bisan ano nga pasangil.

   “Mahimo nga diri na gumana an konsensya hadton padayon nga naghihimo hin mga pasangil. Ha urhi, diri na gud hira nakukonsensya kon nakahimo hin sayop.”—Heather.

•   Karawata an mga resulta. An Biblia nasiring: “Pamati ha disiplina.” (Proberbios 8:33) Likyi an pagreklamo, ngan karawata an pagdisiplina han imo mga kag-anak.

   “Kon magreklamo ka ha disiplina ha imo, magtitikagrabe la lugod an sitwasyon. Karawata an mga restriksyon, ngan ayaw pagpokus ha imo mga diri nahihimo tungod hito.”—Jason.

•   Paghimo hin paagi nga taporan ka utro. An Biblia nasiring: “[Hukasa] an daan nga personalidad nga uyon ha iyo panggawi hadto.” (Efeso 4:22) Ipadayon an paghimo hin tama nga mga desisyon basi taporan ka utro han imo mga kag-anak.

   “Kon padayon ka nga maghihimo hin tama nga mga desisyon ngan papamatud-an mo ha imo mga kag-anak nga diri mo na utro hihimoon an imo sayop hadto, maibabalik an ira pagtapod ha imo.”—Karen.

 TIP: Himoa an sobra pa ha ginlalaoman ha imo han imo mga kag-anak basi pamatud-an nga matataporan ka. Pananglitan, kon magawas ka ha sunod, pahibaroa an imo mga kag-anak kon nagbibiyahe ka na pauli—bisan kon diri pa nimo curfew. Mabulig ini ha ira nga masabtan nga karuyag mo utro nga taporan ka nira.