“An pagbasa han Biblia mahimo magin makahurubya,” siring han tin-edyer nga hi Will, “kon diri ka maaram han tama nga paagi ha pagbasa hito.”

 Karuyag mo ba mahibaroan an mga sekreto kon paonan-o mag-i-enjoy ha pagbasa han Biblia? Ini nga artikulo mabulig ha imo.

•  Himoa nga buhi an Kasuratan

•  Pag-research!

•  An ginsisiring han imo mga igkasi-batan-on

 Imadyina an imo ginbabasa. Ini an puydi mo himoon:

1.   Pagpili hin asoy ha Biblia nga karuyag mo pag-adman. Puydi ka magpili hin usa nga panhitabo ha Biblia o usa nga bahin han Ebanghelyo, o mahimo ka magpili hin asoy tikang ha koleksyon han mga igindrama nga pagbasa ha Biblia ha jw.org.

2.   Basaha an asoy. Puydi mo ito basahon nga ikaw la nga usa, o puydi mo ito basahon ha daku nga tingog kaupod han imo kasangkayan o kapamilya. An usa mahimo tokahan sugad nga narrator samtang an iba magbabasa han ginsisiring han iba-iba nga tawohan ha Biblia.

3.   Testingi an usa o sobra pa ha masunod nga mga suhestyon:

   •   Ig-drowing an asoy. O paghimo hin storyboard​—simple nga mga retrato han sunod-sunod nga mga hitabo. Butangi hin mga kapsyon basi isaysay an nahitatabo ha tagsa nga eksena.

   •   Paghimo hin mga dayagram. Pananglitan, samtang nagbabasa ka mahitungod ha usa nga matinumanon nga tawohan ha Biblia, ikonektar an iya mga kalidad ngan buhat ha mga bendisyon nga iya nakarawat.

   •   Himoa nga sugad hin balita an asoy. Ireport an panhitabo ha iba-iba nga anggulo, ngan interbyuha an mga nangunguna nga tawohan ngan an mga nakakita han panhitabo.

   •   Kon an usa nga tawohan ha asoy naghimo hin diri maaramon nga desisyon, pag-imadyin hin iba nga ending. Pananglitan, hunahunaa an pagnigar ni Pedro kan Jesus. (Marcos 14:66-72) Ano daw la an mas maopay nga reaksyon ni Pedro?

   •   Kon mahilig ka gud magsurat, paghimo hin imo kalugaringon nga drama nga basado ha usa nga asoy ha Biblia. Ig-api an mga leksyon nga mahibabaroan tikang hito nga asoy.​—Roma 15:4.

 Kon uusisahon mo an mga detalye, makakabiling ka hin nakatago nga mga hiyas ha usa nga asoy. Ha pagkatinuod, usahay importante bisan an usa o duha la nga pulong ha usa nga asoy.

 Pananglitan, ikompara an Mateo 28:7 ha Marcos 16:7.

•    Kay ano nga igin-api ni Marcos an detalye nga hi Jesus hirani na magpakita ha mga disipulo “ngan kan Pedro”?

•  Clue: Hi Marcos waray makakita hini nga mga hitabo; klaro nga nahibaro hiya hito tikang kan Pedro.

•  Nakatago nga hiyas: Kay ano nga sigurado nga naparig-on hi Pedro han nahibaroan niya nga karuyag hiya makita utro ni Jesus? (Marcos 14:66-72) Paonan-o ginpamatud-an ni Jesus nga tinuod hiya nga sangkay ni Pedro? Paonan-o mo masusubad hi Jesus ngan magin tinuod nga sangkay ha iba?

 Kon hihimoon mo nga buhi an Kasuratan ngan mag-research han mga detalye, mas mag-i-enjoy ka ha pagbasa han Biblia!