Nalilipay kami nga ipahibaro nga ginbendisyonan ni Jehova an iya katawohan ha Ukraine basi an aton kabugtoan ha bug-os nga nasud makagsaurog han Memoryal han kamatayon han Kristo. An pipira nga Kingdom Hall ha weste nga bahin han Ukraine gin-gamit para didto mag-Memoryal an mga kabugtoan nga nag-ebakwit didto. An kabugtoan nagsaurog han Memoryal kaurogan na ha gutiay la nga mga grupo, ngan nagkonektar pinaagi han videoconference adton diri makakahimo pagbaya ha ira mga balay.

Ha kadam-an nga bahin han nasud, an mga sirena nga nagpapahamangno nga may mabuto nga mga bomba nagtinunog ha bug-os nga adlaw han Memoryal. Pagtikagab-i, inundang pagtinunog an mga sirena. “Nag-inampo kami nga diri unta maulang an Memoryal tungod hin mga pambomba,” siring ni Sherhiy nga taga-Druzhkivka, Donetsk Region. “Han hirani na gud magtikang an Memoryal, inundang an mga pambomba ngan waray na magtinunog an mga sirena.”

Usa nga grupo hin mga edaran ngan may mga problema ha kahimsog nga mga magwarali ha Nemishaeve, hirani ha Kyiv, an waray pakakatambong hin katirok hin sobra usa na ka bulan. Nag-inampo hira nga makatambong han Memoryal. Ini nga grupo ginbuligan ni Vitaliy, nga usa nga tigurang, nga makatambong han Memoryal. Hi Vitaliy nagsiring: “Waray koryente, salit ginamit na la kami hin ispat durante han Memoryal. Waray liwat heater. Waray kami musika, salit an akon anak nga babaye nagtokar hin biyolin para makakanta kami.”

Hi Oleksandr, nga usa nga tigurang nga nag-uukoy ha lugar han girra, nagsiring: “Durante han kampanya ha panaltag han imbitasyon para ha Memoryal, waray namon mapadad-i hin mga surat an mga tawo ha amon teritoryo kay an mga balay ginpambombahan ngan ginbayaan. Salit, gin-imbitar namon an amon mga kakilala, an amon mga nakaupod ha mga basement, ngan adton mga nakaupod namon ha pag-ebakwit. Damu han amon nakilala an diri hadto namamati ha mga Saksi. Damu ha ira an inupod ha amon ha Memoryal.”

Bisan kon waray pa an kompleto nga report tikang ha ngatanan nga kongregasyon ha Ukraine, nahibaroan nga sobra 210,000 an tinambong han Memoryal.

Usa nga brother ha Ukraine an nagpahayag han iya inaabat mahitungod han Memoryal. Hiya nagsiring: “Sugad la nga an parola nagpapasarig ha mga marinero nga hirani na hira ha baybayon, an pagsaurog han Memoryal nagpapasarig ha akon nga hirani na umabot an adlaw ni Jehova. Nagin mas kombinsido pa gud ako tungod han Memoryal yana nga tuig.”

Tubtob han Abril 21, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 35 nga magwarali an namatay

• 60 nga magwarali an nasamaran

• 43,792 nga magwarali an pinalagiw tikang ha ira mga balay ngadto ha mas talwas nga mga lugar

• 374 nga balay an nabungkag

• 347 nga balay an daku an ruba

• 874 nga balay an gutiay la an ruba

• 1 nga Kingdom Hall an nabungkag

• 10 nga Kingdom Hall an daku an ruba

• 27 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 44,971 nga magwarali an direkta nga ginbuligan han mga DRC basi makabiling hin mas talwas nga urukyan

• 19,961 nga magwarali an pinalagiw ha iba nga mga nasud ngan ginbubuligan han kabugtoan