Pakadto ha sulod

Tikang ha wala tipatoo: Usa nga estasyon hin tren ha Lviv nga damu an tawo. Balay hin bugto nga nasusunog katapos maigo hin bomba. Maisugon nga mga tigurang nga namimiling han kabugtoan ha Mariupol

ABRIL 1, 2022
UKRAINE

UPDATE #5 | An Aton Kabugtoan Padayon nga Nagpapakita hin Gugma Samtang Nahitatabo an Krisis ha Ukraine

UPDATE #5 | An Aton Kabugtoan Padayon nga Nagpapakita hin Gugma Samtang Nahitatabo an Krisis ha Ukraine

Makasurubo, tubtob han Marso 29, 2022, pito pa nga aton kabugtoan ha syudad han Mariupol an namatay. Ha kabug-osan, 17 na nga kabugtoan ha Ukraine an namatay.

An mga Disaster Relief Committee (DRC) ha Ukraine maduruto nga nagtatagana hin relief, ginbubutang pa ngani ha peligro an ira kinabuhi basi pamilngon an ira mga igkasi-magsiringba ha mga lugar nga nadaot han girra.

Pananglitan, an kabugtoan ha mga DRC malampuson nga nagdeliber hin pagkaon, medisina, ngan iba pa nga mga panginahanglan ha mga syudad nga nadaot gud han girra, sugad han Kharkiv, Kramatorsk, ngan Mariupol. Usa nga membro han DRC an nagbibiyahe hin sobra 500 ka kilometro kada adlaw, nga naagi ha damu nga checkpoint han sundalo, para magdeliber hin pagkaon ngan medisina ha mga 2,700 nga magwarali.

Ginhikay liwat han mga DRC nga may masakyan an aton kabugtoan basi makagawas ha mga lugar nga may girra. Usa nga brother ha DRC han Chernihiv an nagsumat: “Han nagtikang pambomba ha mga balay an mga sundalo, klaro nga delikado gud an pagpabilin ha syudad. Tungod kay waray koryente ngan Internet durante han pambomba, an mga tigurang nagdagmit pagkadto ha syudad basi sumatan an mga magwarali nga natago ha mga basement nga may masasakyan hira basi makapalagiw ha syudad.”

An tag-iya han usa nga kompanya hin pampasahero nga mga sarakyan tinugot nga gamiton an iya mga van ngan bus, ngan siyam ka beses nga nagbiyahe hiya basi igawas ha Chernihiv an 254 nga aton kabugtoan. Makausa, gumamit pa ngani hiya hin heavy equipment basi aydon an kalsada para makaagi an iya bus. Mapasalamaton an aton kabugtoan han sugad nga bulig.

Nasusubo liwat kita para ha mga namatayan hin mga hinigugma tungod hini nga nagpapadayon nga girra. Ginpapamulat naton ngatanan an katumanan han paglaom ha Pulong han Dios, an Biblia, kon an kamatayon ngan kabidoan mawara na.—Pahayag 21:3, 4.

Mga 40 nga magwarali nga ginbuligan nga makagawas ha Chernihiv an gin-aasikaso ha usa nga Kingdom Hall ha talwas nga lugar

Tubtob han Marso 29, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa, tungod kay makuri an komunikasyon ha ngatanan nga rehiyon han nasud:

An Kahimtang han Aton Kabugtoan

  • 17 nga magwarali an namatay

  • 35 nga magwarali an nasamaran

  • 36,313 nga magwarali an pinalagiw tikang ha ira mga balay ngadto ha mas talwas nga mga lugar han nasud

  • 114 nga balay an nabungkag

  • 144 nga balay an daku an ruba

  • 612 nga balay an gutiay la an ruba

  • 1 nga Kingdom Hall an nabungkag

  • 7 nga Kingdom Hall an daku an ruba

  • 23 nga Kingdom Hall an gutiay la an ruba

Bulig ha Kabugtoan

  • 27 nga DRC an nanginginano ha kabugtoan ha Ukraine

  • 34,739 nga magwarali an direkta nga ginbuligan han mga DRC basi makabiling hin mas talwas nga urukyan

  • 16,175 nga magwarali an pinalagiw ha iba nga mga nasud ngan ginbubuligan han kabugtoan