Tuminkery tuman wananaa ykaꞌichi kinha nii pamanakan pa aipenat. “Wananaa chutkau dun, wadakaapkaꞌu dun, uu wabayzainhan dun, wananaa sakadan nii pakaydinhan ymanak kiz, aunaa yxaꞌapan wyryy kaziweꞌu kariwei kaikesudiꞌu uu ydaryꞌu”. (Site Johns Hopkins Medicine diꞌikiꞌu). Kadimen wananaa kaydinhan ymaxaap kiz izai naꞌik ysaabaa kiz wadynaa naꞌik wamada.

PIDIꞌITINHAP: Watumik wyryy tumaꞌuraz wananaa ykaꞌichi kinha nii pamadkan pa aipenat. Tuminkery kian ykaminkeꞌytan nii waynau wanhikynyy kaxaꞌurtinhan dun, ykayꞌan wamixid yxaꞌaptan nii naꞌap. Tuminkery kian: “Ykaminkeꞌyt kaxaꞌurtinhainhawyz ynhikynyy naꞌik ykasaraa ykaziwen kid”. (Psalm [Salmos] 147:3) Pybaitinhan dun aimeakan xaꞌapaꞌu id py tym, naꞌapam nii pymaꞌuzakadan pymixidian Yewah kaminkeꞌytan nii pysaabaan — pinhikynyy?

NAꞌAPAM TUMINKERY PARADAN KIAN

Tuminkery kian: “Aunaa pytarian naa. Kainhaꞌa ungary py tym. Aunaa pydupian naa. Ungary pytuminkeryn unmaꞌuzakdan nii pygary. Mixiꞌu nii unkaminkeꞌytan pygary.” (Isaiah [Isaias] 41:10) Pidian aichipan dun Yewah kaminkeꞌytaꞌazun paygary xaakad yabatinpen naꞌik maꞌuzak yryy ydubtan dun kaxaꞌapannaa kidiaꞌu. Pidian abatinpen dun naꞌap, Paulo dakutan naꞌapaꞌu kaikepaꞌa: “Tuminkery kaimenan ymanawynyꞌuraz naꞌik wazuutpaꞌuraz pidian aichipan.” Ykinii kapam: “maꞌuzak ungary ipei aimeakan at taaꞌuraz maꞌuzakary un at dikin ii.” — Philippians (Filipenses) 4:4-7, 9, 13.

Tuminkery Paradan kaminkeꞌyt wamixidian naꞌapam Yewah kian xaꞌapaꞌu nii diinheꞌitiꞌi Apocalipse 21:4, 5 kuwad kanumaꞌu nii Tuminkery xaꞌapat naꞌik kandii nii wamixid kiz yryy:

• “Yewah ynuan nii ipei pidiannau awyn yy kid”. Ykatukuntan nii ipei aimeakan baintin kidiaꞌu waynau, atii aimeakan kid wadupikidnii mazan baurainhau at madiweytapkau.

• “Kainhaꞌa watumik aukaz ii. Yryy wyryy maꞌuzkaꞌuraz manawyn naubunai. Ykaiween nii pamaꞌuzkan ykaminkeꞌyt kiz waynau naꞌik ymaxaad kiz wabaitinhan”.

• Ipei wyryy aimeakan Yewah kuwadnii paxaꞌaptan nii “mixiꞌu wyryy”. Pa yy naꞌik paynamanaa dikin ii aunaꞌu nii Yewah paradan aimeakan aunaꞌu nii paxaꞌaptan. Ykayꞌan wamixid kiz maꞌuzak yxaꞌapatan nii wyryy pakuwadaniaz.

“‘Ipeꞌu nii yinuan in awyn uu kid aunau nii naa puwaꞌa pidian maukan, uu kaxaꞌuran, uu zaadayzun, uu baiaapan kaziweꞌu. Yxaꞌapanym kayꞌan kiwiichipaꞌuraz uiaꞌu xaꞌaptayzu kariwei kidiaz mainhaabatkau idiꞌi naa.’ Ydaynaꞌan wyryy sakanatpaꞌuraz ymanawynyꞌuraz manawyn tabai idiaꞌa kian, “Aizii ipei naa unpainhaadan aimeakan kid!” Ykian kuxan unꞌat, “Pysaad diuraꞌa paradakary kidiaꞌa, mixiꞌuraz, naꞌik marii kiz inmixidkeu kid.’” — Revelation (Apocalipse) 21:4, 5.

Tuminkery Karichianaa naꞌik ipei aimeakan Tuminkery tuminii kaminkeꞌyt wa aichipan ykadyz kid. Wyryy aimeakan kid Tuminkery tuminii ydapaad kinha nii waynau wa aichap kiz yryy. Inkaminkeꞌyt wa aipen waminhaydaꞌychipan Tuminkery. Tuminkery Karichianaa aidi naꞌapam ydapadan waynau. Ykian: “Ymaunapdin Tuminkery yꞌidiaꞌat, Tuminkery maunapadinhan nii yꞌidiaꞌat kapam.” (James [Tiago] 4:8) Atos 17:27 kian: “Aunaa Tuminkery mynapun y ai.”

Pytuminpen dun Tuminkery daꞌy piaichiap kinha nii yryy. Piaichipan nii ytaap nii wyryy pygaryz. Panad man aimeakan pymaxaapan idiaꞌa piaichipan dun naꞌapaꞌu?

Pytykap kywai Toru daꞌyaꞌu Japão ii. Ydaru mixidiayaba mazan ybaukuptinhan pidiannau tym dikeydainhau manawyn indakutkau yakuza. Ykian: “un itiimen Tuminkery tuꞌurkizeitpayznii ungary. Karikeunan an pidian un aichiapnii maukan, un itiimeyznii Tuminkery patakaꞌytan ungary, pauwaꞌa zii manawyn pidian tyykiaꞌuraz unmarainpen maukan dun.” Ykian: “ymaxaapan kadyz naꞌik ydiꞌitinpen kadyz dikin ii ytanautinhan pidian dikeydaꞌu. Naꞌik ynhikynyi aimeakan yaipeyzun kutyaꞌanaa, ykian: “Un aipeyzun unmaukan painhaꞌa mazan unzuian daynaꞌan pidian pauwaꞌa zii yaichiapkau un ai, suu un aipen id un aichiapkau pauwaꞌa zii.”

Ydaynaꞌan Toru naꞌik paydaiaru, Hanna, insakadan patuminpen Tuminkery Paradan daꞌy. Yryy dikin  ii Toru panad pamaxaapan naꞌik padiꞌitinpen kadyz. Hanna kian: “Untykap naꞌapam undaiary panadinhan”. Aizii, Toru kian: “Kainhaꞌaꞌu baydap Tuminkery, ytaapan waynau baydap baydap kid. Aunaa yaipen pidian maukan naꞌik yzaydpan ykamynanyn kidiaꞌazun tawynyꞌy mixiꞌuraz ytanautinhan paꞌuian ai. Wakuwadan dun yꞌat aimeakan kid aunaꞌuraz wakuwadaꞌazun aunaa kanum at uu aunaa naꞌiauram pidian aichap naꞌapauram mixi wa abatinpen, Tuminkery abat waynau. Atazunaa Yewah mainhaabatan ipei aimeakan: baitin kidiaꞌu naꞌik dupikidiaꞌu waynau. Aizii ypyꞌy ykaminkeꞌytan waynau pauwaꞌa zii wazaydapnii kid ai. Ymarainhap waynau naꞌik ykazannaat waynau wadubtan dun kaxaꞌapannaa kidiaꞌu.” — Psalm (Salmos) 136:23.

Watuminpen Toru daꞌynaꞌu: Kaimenaꞌu wa aichipan Tuminkery atazunaa ymainhaabatan baitinkery naꞌik yinuan nii ipei wa awyn yy kid. Wyryy idiaꞌan wamixid wamaxaapan nii kaimen diinheꞌitiꞌi naꞌik kai. Wamaxaapan pyꞌy dirib baitinkery biꞌi mazan piaichipan id Tuminkery marainhap pygary tyryy pymaxaapan kaimen naꞌik kunaykii.