Pyzaidap kaimen kidiaꞌu aimeakan xaꞌapan diinheꞌitiꞌi? Dirib pidiannau intiweitin pataapan panhikynyy kunaykii amazada kaxaꞌapanyn pyꞌy aizii. Mazan mixiꞌu nii man aimeakan kid saabainhan? Uu mixiꞌu nii! Tuminkery Karichian kian tyryy wamixidian kaimen kidiaꞌu xaꞌapan nii diinheꞌitiꞌi.

•  Naꞌapam Tuminkery Karichian kuwadan diinheꞌitiꞌi daꞌy?

•  Mixiꞌu nii man kywai kid Tuminkery Karichian idiaꞌuraz xaꞌapan nii?

•  Naꞌapam nii kywai kid Tuminkery Karichian idiaꞌuraz xaꞌapan?

•  Naꞌapainim nii kywai kid Tuminkery Karichian diꞌikiꞌuraz mixinhan nii?

•  Naꞌapam nii dii wyryy kywai kid kaminkeꞌytan waynau aizii?

 Naꞌapam Tuminkery Karichian kuwadan diinheꞌitiꞌi daꞌy?

 Tuminkery Karichian kuwad ipei wyryy kaxaꞌapannaa kidiaꞌuraz pidiannau dubatpaniaz daꞌy aizii. Mazan ykuwad kapam wyryy kaxaꞌapannaa kidiaꞌuraz aunaa karikeunanyꞌu nii man ynaꞌayzun. Pytykap pabiꞌikid aimeakan daꞌy xaꞌapaꞌu nii diinheꞌitiꞌi.

•   Kanum xaꞌap aizii: Pidiannau madapiinhau

   Tuminkery Karichian kian: “Intuman nii kabayn pamaxaap kiz nii.” — Isaiah (Isaías) 65:21.

   Kanumaꞌu nii xaꞌap diinheꞌitiꞌi? Ipei pidiannau kainhaꞌu nii indap kid.

•   Kanum xaꞌap aizii? Mapyratanyꞌu naꞌik pidiannau aunaꞌuraz in ikudan pakaydinkiz nii

   Tuminkery Karichian kian: “Unwidyaniinhau aunaꞌu nii inkaydinhan madiweytaka.” — Isaiah (Isaías) 65:22.

   Kanumaꞌu nii xaꞌap diinheꞌitiꞌi? Ipeꞌu nii pidiannau kainhaꞌu nii inkaydinkiz nii naꞌik kunaykiaꞌu nii inhau pakaydinkiz ii.

•   Kanum xaꞌap aizii? Dirib pidiannau aunaa intaapkau kaimen

   Tuminkery Karichian kian: “Kazuwaytpainhau kazuwaytpan nii kaimenaꞌu idiaꞌan pidiannau.” — Isaiah (Isaías) 32:1.

   Kanumaꞌu nii xaꞌap diinheꞌitiꞌi? Aunaꞌu nii naa pauwaꞌa pidiannau dakuwapkau inmada dikin ii uu inmapyraatanyn dikin ii. Aunaꞌu nii naa pauwaꞌa pidian baitinhan ytaapkau id panaꞌa baurainhau ai.

•   Kanum xaꞌap aizii? Pidian baiaapan pazamazin

   Tuminkery Karichian kian: “Kainhaꞌu nii irib wanhikynyi imiꞌi baaraꞌa, atii midikyu pauwa ii aka kainhaꞌu nii pauribei kid.” — Psalm (Salmo) 72:16.

   Kanumaꞌu nii xaꞌap diinheꞌitiꞌi? Kainhaꞌu nii irib wanhikynyi ipei pidiannau at. Aunaꞌu nii naa pauwaꞌa pidian daꞌawyn zamaz naꞌik aunaꞌu nii naa pauwaꞌa pidian baiaapan pazamazin.

•   Kanum xaꞌap aizii? Dikeyd kidiaꞌu naꞌik mizaataakary

   Tuminkery Karichian kian: “Inskantan nii papaurib bauwyꞌy, aunaꞌu nii kanum tarikidiaytan indyan.” — Micah (Miqueias) 4:4.

   Kanumaꞌu nii xaꞌap diinheꞌitiꞌi? Aunaꞌu nii naa pidian tarian dikeydaꞌu ai, yxaꞌapanym kayꞌan aunaꞌu nii naa pauwaꞌa pidiannau dikeydainhau nii, “suu kaimenainhau pidiannau maxaapan nii imiꞌi baaraꞌa”. — Psalm (Salmo) 37:10, 29.

•   Kanum xaꞌap aizii? Ydary kidiaꞌu mizaataakary

   Tuminkery Karichian kian: “Aunaꞌu nii naa pauwaꞌa pidiannau saudan pachipirarin pamizatak kinha nii pairibennau at, aunaꞌu nii naa pauwaꞌa intuminpen mizaataakary daꞌy.” — Isaiah (Isaías) 2:4.

   Kanumaꞌu nii xaꞌap diinheꞌitiꞌi? Kaimenaꞌu nii maxaapkary ipei amazada kawan at. (Psalm [Salmo] 72:7) Aunaꞌu nii naa pauwaꞌa pidian kiduupayzun pawiiz ik uu yzaadayzun pairiben maukan id ydary kidiaꞌu mizaataakary xaꞌapan id.

•   Kanum xaꞌap aizii? Rinhei

   Tuminkery Karichian kian: “Aunaꞌu nii naꞌiauram kian: ‘Unkarinhan.’” — Isaiah (Isaías) 33:24.

   Kanumaꞌu nii xaꞌap diinheꞌitiꞌi? Aunaꞌu nii naa pauwaꞌa pidian karinhan uu achun. (Isaiah [Isaías] 35:5, 6) Tuminkery Karichian kian kapam, “aunaꞌu nii naa pauwaꞌa pidian maukan”. — Revelation (Apocalipse) 21:4.

•   Kanum xaꞌap aizii? Pidiannau kaniribepan naꞌik inkauwadpan madiweitaka amazada

   Tuminkery Karichian kian: ‘Amazada aradaꞌu daꞌi, kunaynymaꞌu nii susui kid suudan naꞌii naꞌap açafrão kawan.’ — Isaiah (Isaías) 35:1.

   Kanumaꞌu nii xaꞌap diinheꞌitiꞌi? Imiꞌi baara saabakau nii, kunaynymaꞌu nii ipei amazada pidiannau maxaapkiz nii, naꞌap Tuminkery aipeyzun kawan kutyaꞌanaa. — Genesis (Gênesis) 2:15; Isaiah (Isaías) 45:18.

  Mixiꞌu nii man kywai kid Tuminkery Karichian idiaꞌuraz xaꞌapan nii?

 Pabiꞌi kid pidiannau kian aunaa. Mazan kaimenaꞌu nii piaichipan naꞌapam Tuminkery Karichian kian diinheꞌitiꞌu daꞌy. Kandii nii? Yxaꞌapanym kayꞌan kywai kid Tuminkery Karichian diꞌikiꞌu panaꞌaꞌu pidiannau kywaa ai. Kywai kid Tuminkery Karichian idiaꞌaꞌuraz, Tuminkery diꞌikiꞌu paꞌidiwery wyryy. Pytykap kandii nii tyryy wamixidian:

•   Tuminkery mixiꞌu yparadan. Tuminkery Karichian kian Tuminkery “aunaa maridinheyzu man yryy”. (Titus [Tito] 1:2) Naꞌik suu Tuminkery kuwadan kaimenaimen kanumaꞌu nii xaꞌap diinheꞌitiꞌi. (Isaiah [Isaías] 46:10) Tuminkery Karichian idiaꞌa, waikud dirib kywai kid Tuminkery kuwadnii naꞌap ykuwadayzun kawan. Piaichipaꞌazun dun pauwaꞌa zii, piawynyytap diuraz vídeo Naꞌap dii wa aichipan mixiꞌu man wyryy kywai kid Tuminkery Karichian idiaꞌaꞌuraz?.

•   Maꞌuzkaꞌu manawyn Tuminkery, ykayꞌan ysaabaan nii ipei kaxaꞌapanaa kidiaꞌuraz. Tuminkery Karichian kian Tuminkery maꞌuzkan id yxaꞌaptan “ipei aimeakan pa aiapnii”. (Psalm [Salmo] 135:5, 6) Ykayꞌan, aunaa kanum tyryy maxaatan Tuminkery yxaꞌaptan ai pa aiapnii kid. Yxaꞌaptan nii pataazuniaz waꞌat, ymarainpen id waynau. — John (João) 3:16.

 Mazan panadun pidiꞌitinpen: ‘Tuminkery marainpen pyꞌy waynau, kandii nii wabaitinhan?’ Pytykap vídeo idiaꞌa Kandii nii kainhaꞌa dirib baitinkery?.

 Naꞌapam nii kywai kid Tuminkery Karichian idiaꞌuraz xaꞌapan?

 Tuminkery xaꞌaptan nii paparadan kawan at panaubunaitinpen idiaꞌan. Ymyydnii Disu Kristu kazuwaytipaꞌu nii panaubunaitinhap kiz ii aukaz ii, ytaanii ykaydinkiz nii ytaap kiz pidiannau naꞌik ysaabaa kiz imiꞌi baara. Disu maxaapankan dun imiꞌi baaraꞌa, ykakyd karinhainhau, ytaa wanhikynyi zamaziinhau at, ymaxaad maꞌuzkaꞌu awary naꞌik ykadixitkid maukainhau. (Mark [Marcos] 4:39; 6:41-44; Luke [Lucas] 4:40; John [João] 11:43, 44) Naꞌapaꞌu idiaꞌanaꞌu yaidikidian kanumaꞌu nii yxaꞌapat ykazuwaytpan dun imiꞌi baara.

 Piaichipaꞌazun dun pauwaꞌa zii kanumaꞌu nii Tuminkery Naubunaitinpen xaꞌapat pyꞌat, pyawynyytap vídeo Naꞌapauram atiꞌu wyryy kikeryz Tuminkery Naubunaitinpen?.

 Naꞌapainim nii kaimenaꞌu kywai Tuminkery Karichian diꞌikiꞌu mixinhan?

 Atazunaa ymixinhan! Naꞌapam nii wa aichipan? Tuminkery Karichian kuwad dirib aimeakan daꞌy xaꞌapan nii imiꞌi baaraꞌa, Tuminkery naubunaitinpen maunaptan dunuꞌu naa. (Luke [Lucas] 21:10, 11) Dirib aimeakan Tuminkery Karichian kuwadnii xaꞌapan naa kai ynaubunaitinpen maunaptan idiꞌi naa.

 Piaichipaꞌazun dun pauwaꞌa zii, piaichi diuraz kywai “Naꞌapainim nii Tuminkery kazuwaytpan imiꞌi baara?”.

 Naꞌap dii kaimenaꞌu kywai kaminkeꞌytan waynau aizii?

 Kainhaꞌa saadinpeꞌu Tuminkery Karichian idiaꞌa, ykian kaimen kidiaꞌu aimeakan Tuminkery taazuniaz waꞌat, ikudazuꞌu ‘âncora kawynyꞌu waꞌat’. (Hebrews [Hebreus] 6:19) Naꞌap kimixaꞌu chipirara zamatpan kawan maꞌuzaka ydaryꞌu kanau maꞌuzkaꞌu awary kawan dun, kaimenaꞌu kywai Tuminkery Paradan diꞌikiꞌu taapan nii wanhikynyy maꞌuzaka wadubatpan dun kaxaꞌapanaa kidiaꞌu aimeakan. Wyryy kaimenaꞌu kywai taapan nii wanhikynyy naꞌik wadiꞌitinpen dupiikery ai, naꞌik ykaminkeꞌytan nii wamaxaapan zyiu kapam. — 1 Thessalonians (1 Tessalonicenses) 5:8.