Geeshsha Maxaafan issi issitoo “woosa keettaa” geetettidi birshshettida Giriiketto qaalay goynniya amarida asay shiiqiyo keettaa gidennan, he asata malaatees.

 Ha leemisuwa akeeka: Efisoona 5:24, 25n Geeshsha Maxaafay “woosa keettai Kiristtoosayyo” haarettiyoogaanne “Kiristtoosi woosa keettaa siiqidi, ba huuphiyaa ayyo” immidoogaa yootees. (Wolayttatto Geeshsha Maxaafaa) Ha xiqiseti keettaa gidennan, Kiristtoosayyo haarettiyanne I siiqiyo asatu galchchaa yootiyogee qoncce. a

 Hegaa gishshawu, nu goynnanawu shiiqiyosaa “Shiiquwa Addaraashaa” woy “Kawotettaa Addaraashaa” yaagoos.

“Yihoowa Markkatu Kawotettaa Addaraashaa” giyoy aybissee?

 Hegaadan gaana bessiyo daro gaasoti deꞌoosona:

•   Keettay addaraasha woy shiiqiyo soho.

•   Nuuni Geeshsha Maxaafay yootiyo Xoossaa Yihoowayyo goynnanawunne abaa markkattanawu shiiqoos.—Mazamure 83:18; Isiyasa 43:12.

•   Yesuusi darotoo yootido Xoossaa Kawotettaabaa tamaaranawukka shiiqoos.—Maatiyosa 6:9, 10; 24:14; Luqaasa 4:43.

 Ne heeran deꞌiya Shiiquwa Addaraashaa baada Yihoowa Markkati bantta shiiquwan waatiyakko beꞌanaadan nena shoobboos.