Meeze gidida bala qofata

 Bala qofaa: Yihoowa Markkati Ufayssa Masqqalaa bonchchennay eti Yesuusan ammanenna gishshataassa.

 Tumaa: Nuuni Kiristtaane. Atotettaa demmiyoy Yesuusa baggaara xalla gidiyoogaa ammanoos.—Oosuwaa 4:12.

 Bala qofaa: Asay Ufayssa Masqqalaa bonchchennaadan intte tamaarissiyo gishshawu so asay shaahettanaadan ootteeta.

 Tumaa: Nuuni so asaassi keehippe qoppoos, qassi so asaa deꞌoy mino gidanaadan maaddanawu Geeshsha Maxaafaa goꞌettoos.

 Bala qofaa: “Ufayssaa Masqqalaa wode” kehiyoogee, saꞌan sarotettay deꞌanaadaaninne asawu loꞌꞌobaa amottiyoogee intteppe haliis.

 Tumaa: Nuuni ubba galla asawu kehanawunne sarotettan deꞌanawu baaxetoos. (Leemiso 11:25; Roome 12:18) Leemisuwawu, nuuni nu shiiquwaa shiiqiyoonne sabbakiyo ogee, “Intte coo ekkideta; coo immite” giya Yesuusa azazuwaara maayettees. (Maatiyoosa 10:8) Hegaa bollikka, saꞌan tumu sarotettaa ehaanay Xoossaa Kawotettaa gidiyoogaa asawu yootoos.—Maatiyoosa 10:7.

Yihoowa Markkati Ufayssa Masqqalaa bonchchennay aybissee?

•   Yesuusi nuuni I yelettido gallassaa gidennan, hayqqido gallassaa bonchchanaadan azaziis.—Luqaasa 22:19, 20.

•   Yesuusi kiittidoogeetinne beni wode deꞌida erissiyo ashkkarati Ufayssa Masqqalaa bonchchibookkona. Niwu Kaatolik Inssayikiloppidee hagaadan gees: “He baalaa bonchchiyoogee doomettidoy 243 [M.Lppe] simmiina,” hegee kiitettidaageetuppe wurssettay hayqqoosappe xeetaappe dariya layttay aadhdhi simmiina.

•   Yesuusi Tisaase 25n woy Tisaase 29n yelettidoogaa bessiya naqaashi baawa; I yelettido gallassay Geeshsha Maxaafan xaafettibeenna.

•   Ufayssa Masqqalaa doomettay eeqa goynuwaa meeziyaaranne ammanuwaara gayttidaba gidiyo gishshawu, hegee Xoossaa ufayssiyaaba gidenna.—2 Qoronttoosa 6:17.

Intte Ufayssa Masqqalaa bonchchennaagan erettanawu koyidoy aybissee?

 Daroti Ufayssa Masqqalaa doomettay eeqawu goynniyoogaara gayttidaba gidiyoogaanne hegaa Geeshsha Maxaafay kaafennaagaa eriyaaba gidikkokka, hegaa bonchchoosona. Hegaa mala asay hagaadan gaana danddayees: Kiristtaaneti asa ufayssenna hegaa malabaa oottana koshshiyoy aybissee? Hegan erettanawu koyiyoy aybissee?

 Geeshsha Maxaafay nuuni nuussi qoppanaadan, nu qoppiyo abbiyaa goꞌettanaadan minttettees. (Roome 12:1, 2) Nuuni tumaa xoqqu oottidi xeellanaadan Geeshsha Maxaafay tamaarissees. (Yohaannisa 4:23, 24) Harati nuna xeelliyo ogiyaabaa qoppoos; harata ufayssennaba gidikkokka, nuuni Geeshsha Maxaafaa maarata kaalloos.

 Nuuni Ufayssa Masqqalaa bonchchanawu koyennaba gidikkokka, hegaa xeelliyaagan ubba asay ba koyobaa dooriyo maataa bonchchoos. Harati Ufayssa Masqqalaa bonchchiyoogaa diggokko.