HEGEE AYBEE?

Aqo deꞌuwawu maacettida azinatinne machchoti hegaa ay wodekka duuxxenna issippetettaadan xeelloosona; qassi hegee eti woppu giidi deꞌanaadan maaddees. Metoy merettiyo wodekka, aqo lagge gidida uri issippetettan deꞌanaagaa hankkoy ammanettees.

Issi issi aqo laggeti so asay woy harati woyganaakko yayyidi issippe deꞌoosona. SHin issoy issuwaa siiqiyoonne bonchchiyo gishshawu issippe deꞌanawu murttiyoogee keehi loꞌꞌo.

GEESHSHA MAXAAFAY YOOTIYO MAARAA: ‘Azinay ba machchiyo yeddoppo.’—1 Qoronttoosa 7:11.

“Issi uri aqo laggiyaara deꞌanawu murttikko, yiillotanawu eesotenna. Sohuwaara atto gaanawunne maarotaa oychchanawu koyees. I metuwaa xube ootti xeelleesippe attin, maachchaa kolanawu gaaso ootti xeellenna.”—Mayka.

MURTTIYOOGEE KOSHSHIYO GAASUWAA

Issippetettan deꞌanawu murttibeenna aqo laggeti metoy merettiyo wode sohuwaara, ‘Nuuni issoy issuwawu haniya asa gidokko’ giidi kuuyoosonanne aqo deꞌuwaa laalanawu qoppoosona.

“Daro asay aqo deꞌoy suurana xayikko, paraman shaahetti agganawu qoppidi ekkees woy gelees. Issi uri paraman shaahettana danddayiyoogaa qoppidi ekkiyaaba woy geliyaaba gidikko, I koyroppekka suure muruttibeenna.”—Jiino.

AY OOTTANA DANDDAYAY?

NENA QORA

Metoy merettiyo wode . . .

• Neeni ekkana woy gelana bessenna uraara deꞌiyaabadan qoppay?

• Hara ura ekkanawu woy gelanawu qoppay?

• “Taani nena aggada baana” woy “Tana dosiya hara ura koyana” giyoogaa malabaa haasayay?

Ha oyshatuppe issuwaa woy hegaappe daruwaa ee gaada zaarikko, issippetettan deꞌanawu murttiyaa minttana koshshiyo wode haꞌꞌa.

NE AQO LAGGIYAARA HAASAYA

• Nu aqo deꞌuwan issippetettan deꞌanawu murttidobay kaseegaappe shuggidee? SHuggikko, aybissi?

• Nu murttiyaa minttanawu haꞌꞌi ay oottana danddayiyoo?

MAADDIYA HARA QOFAA

• Ne aqo laggiyaa siiqiyoogaa bessiyaabaa xaafada ayyo woy iyyo issi issitoo imma

• Oottiyoosan ne aqo laggiyaa pootuwaa xarapheezan wottiyoogan, murttidoogaa bessa

• Ooso sohuwan woy haakkada deꞌiyo wode galla galla ne aqo laggiyawu dawala

GEESHSHA MAXAAFAY YOOTIYO MAARAA: “Xoossai issippe gattidoogaa asi shaakkoppo.”—Maatiyoosa 19:6.