IRXXA haattaa giddon deꞌiya xanttiya daro doꞌati meegettennaadan maaddiyay eta galbbaa garssan deꞌiya modhuwaa. SHin moliyaa oyqqiya doꞌay meegettennaadan maaddiyay ordde koote mala gidida ikisiyaa.

Ane qoppa: Gomppaykka zananaykka issi santti meetire gidido sohuwan, moliyaa oyqqiya doꞌawu 155,000 ikisee deꞌees; he guuttaa sohuwan hegaa keena ikisee deꞌiyo, xanttiya hara mehee woy doꞌay baawa. He doꞌay haattaa wadhiyo wode, a bollan deꞌiya koote malabay heeran deꞌiya carkkuwaa shiishshi oyqqees. He carkkoy, doꞌaa irxxa haattay bochidi hoꞌꞌuwaa a bollaappe kessennaadan teqqees.

Moliyaa oyqqiya doꞌaa ikisiyaa leemisuwaa kaallidi issi issibaa oottana danddayiyoogaa saynttistteti akeekoosona. Eti ikisiyaa adussatettaanne hegaa tokkiyo sohuwaa dummayi dummayidi, daro kootiyaa medhidosona. Xannaꞌiyaageeti “ikisee adussa gidikko, qassi matan matan tokettikko, he sohoy melanne haattay gelennasaa gidees” goosona. Moliyaa oyqqiya doꞌawu ikisiyaappe merettiya loꞌꞌo kootee deꞌees gaana danddayettees.

Xannaꞌiyaageeti bantta xannaꞌidobay haattaa gelissenna ooratta qommo maayuwaa tekinoloojiyaa goꞌettidi medhanawu maaddanaagaa hidootoosona. Hegee issi issi asay guppidi irxxa haattaa giddo geliyaageeti moliyaa oyqqiya doꞌaagaa mala ikisee deꞌiyo maayuwaa maayiyaakko loꞌꞌo giidi qoppanaadan oottana danddayees.

Ne qofay aybee? Meegettennaadan maaddiya ikisee moliyaa oyqqiya doꞌawu deꞌidoy coo qaadaaneeyye maalaalissiya hanotan merettido gishshataassee?