Xoossaa Sunttaa —A Goꞌettiyoogaanne A Birshshettaa

NE GEESHSHA MAXAAFAN Mazamure 83:18y woygetti birshshettidee? Inggilizettuwan giigida Ooratta Alamiyaa Geeshsha Maxaafaa Xuufetu Birshshettay ha xiqisiyaa: “Neessi sunttay Yihoowa gididoogee, neeni saꞌa ubban Ubbaappe Xoqqiyaagaa gidiyoogaa asay ero” yaagidi birshshiis. Unddenna Geeshsha Maxaafaa Birshshettatunkka hegaa mala ogiyan xaafettiis. Gidoppe attin, daro birshshettati Yihoowa yaagiya sunttaa kessidi “Godaa” woykko “Merinau Deꞌiyaagaa” yaagiyaageetu mala bonchcho sunttaa gelisoosona. Ha sohuwan gelana bessiyay bonchcho suntteeyye Yihoowa yaagiya sunttay?

Ha xiqisee sunttaabaa yootees. Geeshsha Maxaafaappe dariya baggay koyro xaafettido Ibraysxxe qaalan, ha sohuwan issi dumma sunttay xaafettiis. יהוה (YHWH) geetettiya Ibraysxxe pitaletun xaafettiis. Inggilizetto qaalan erettida xeessay “Jihoovah” yaagiyaagaa. Ha sunttay Geeshsha Maxaafan issi xiqisiyaa xallan deꞌii? CHii. Ibraysxxe qaalan koyro xaafettida Geeshsha Maxaafaa xuufetun 7,000 gidiya sohuwan xaafettiis!

Xoossaa sunttay ay keena koshshiyaabee? Nuuni woygi woossanaakko Yesuus Kiristtoosi tamaarissido woosaa qoppa. Hagaadan giidi doommees: “Saluwan de7iya nu Aawau, ne geeshsha sunttai anjjetto.” (Maatiyoosa 6:9) Takkidi, Yesuusi: “Ta Aawau, ne sunttaa bonchcha” yaagidi Xoossaakko woossiis. Xoossaykka saluwaappe: “Taani ta sunttaa bonchchaas; qassikka gujjada bonchchana” yaagidi zaariis. (Yohaannisa 12:28) Xoossaa sunttay keehippe koshshiyoogee qoncce. Yaatin, issoti issoti bantta Geeshsha Maxaafaa birshshettaappe ha sunttaa kessidi a sohuwan bonchcho sunttata gelissidoy aybissee?

Naaꞌꞌu waanna gaasoti deꞌiyaaba milatees. Koyroy, daroti he sunttau koyro xeessay ha wodiyan erettenna gishshau, a goꞌettana bessennabadan qoppoosona. Beni wode Ibraysxxe qaalati ustta pitaleti baynnan xaafettoosona. Yaatiyo gishshau, beni wode YHWH geetettiya pitaleta asay woygi nabbabiyaakko ha wodiyan ooninne erenna. Gidikkonne, Xoossaa sunttaa goꞌettennaadan hegee nuna  diggana bessii? Beni wode, Yesuusa sunttay Yeshuwaa geetettiya woykko Yehoshuwaa geetettiyaakko ooninne eriyay baawa. Gidikkonne, alamiyaa kumettan deꞌiya asay ha wodiyan, ba qaalan erettida xeessan Yesuusa sunttaa goꞌettiiddi deꞌees. Koyro xeetu layttan ayyo xeessay ay malakko erenna gishshau giidi, Yesuusa sunttaa goꞌettanau undduudenna. Hegaadankka, neeni hara biitta biyaakko asay ba qaalan ne sunttaa dumma ogiyan xeesishin siyana danddayaasa. Yaatiyo gishshau, Xoossaa sunttau beni wode xeessay ay malakko erennaagee a sunttan goꞌettennaagau gaaso gidana danddayenna.

Xoossaa sunttaa Geeshsha Maxaafaappe kessidoogau darotoo odiyo hara gaasoy daro wodiyau deꞌida Ayhudatu wogaara gayttidaagaa. Etappe daroti Xoossaa sunttaa mule xeesana bessenna giidi ammannoosona. He ammanoy Geeshsha Maxaafan deꞌiya: “Xoossaa ne GODAA sunttaa hadan denttoppa; aissi giikko, GODAI ba sunttaa hadan denttiyaagaa qaxxayana” yaagiya wogaa bessenna ogiyan goꞌettiyoogaappe denddidaagaana gidiyoogaa bessiyaabi dees.—Kessaabaa 20:7.

He wogay Xoossaa sunttaa bessenna ogiyan goꞌettennaadan diggees. SHin a sunttaa bonchchuwan goꞌettiyoogaa diggii? CHii, diggenna. Ibraysxxe Geeshsha Maxaafaa (“Galꞌꞌa Maachchaa”) xaafidaageeti ubbay Xoossay beni Israaꞌeeletussi immido Higgiyaa naagidi deꞌida ammanettida attumaasata. Yaatin, eti Xoossaa sunttaa darotoo goꞌettidosona. Leemisuwau, eti Xoossau goynniya cora asati issippe bantta qaalaa xoqqu oottidi yexxiyo mazamuretun he sunttaa gelissidosona. Xoossaa Yihooway, ubba baassi goynniyaageeta ba sunttaa xeesanaadan azaziis; ammanettidaageetikka azazettidosona. (Yuu7eela 2:32; Oosuwaa 2:21) Yaatiyo gishshau, ha wodiyan Kiristtaaneti Yesuusi oottidoogaadan, Xoossaa sunttaa bonchchuwan goꞌettanau undduudokkona.—Yohaannisa 17:26.

Geeshsha Maxaafaa birshshiyaageeti, Xoossaa sunttaa sohuwan bonchcho sunttaa gelissidoogan iita bala balidosona. Eti Xoossaa, asaara dabbotanau koshshay baynnaagaanne qarettennaagaa milatissidosona; shin Geeshsha Maxaafay Xoossay ‘xuuraa shaakkiyo’ mata dabbo gidana mala asaa minttettees. (Mazamure 25:14) Neeyyo ba xuuraa shaakkiya mata laggiyaa ane qoppa. Neeni a sunttaa erennaba gidiyaakko, ay keenaa aara matattana danddayay? Hegaadankka, asay Yihoowa geetettiya Xoossaa sunttaa erennan deꞌiiddi, waanidi tumuppe akko shiiqana danddayii? Hegaappekka haray, asay Xoossaa sunttan goꞌettennan aggiyo wode, a sunttau deꞌiya  maalaalissiya birshshettakka erennan aggees. Xoossaa sunttau birshshettay aybee?

Xoossay ba huuphe, baassi ammanettida ashkkara gidida Muusessi ba sunttaa birshshettaa yootiis. Muusee Xoossaa sunttaabaa oychchido wode, Yihooway: “hanana koshshiyaabaa taani hanana” yaagidi zaariis. (Kessaabaa 3:14, NW) Rotherhame birshshido Geeshsha Maxaafan ha qaalati: “Taani Ta dosidobaa Hanana” geetettidosona. Yaatiyo gishshau, Yihooway ba sheniyaa polanau koshshiyaaba ubbaa hanana danddayees.

Ane neeni hanana koyiyooba ubbaa hanana danddayiyaabadan qoppa. Ne laggetussi neeni ay oottuutee? Etappe issoy keehi sahettiyaaba gidikko, eranchcha dottore gidada a pattaasa. Haraa qassi miishshaa metoy gakkikko, miishshaa immiya dure asa gidada a maaddaasa. Gidikkonne, neeni hanana danddayiyoobi keehi guutta gidiyoogee tuma. Nuuni ubbaykka hegaa mala. Neeni Geeshsha Maxaafaa xannaꞌiyo wode, Yihooway qaala gelidobaa polanau koshshiyaaba ubbaa waanidi haniyaakko beꞌada garamettana. Qassi bana siiqiyaageetussi giidi ba wolqqaa goꞌettiyoogee a ufayssees. (2 Odiya 16:9) Yihoowa oonatettaa bessiya ha loꞌꞌobati a sunttaa erennaagetuppe geemmidabata.

Yihoowa yaagiya sunttay Geeshsha Maxaafan deꞌana bessiyoogee qoncce. A birshshettaa eriyoogeenne nu goynuwan a laꞌatettan goꞌettiyoogee saluwan deꞌiya nu Aawaa Yihoowakko shiiqanau keehi maaddiyaaba. a

[Tohossa qofaa]

[Sinttaa 195n diya misiliyaa]

Ibraysxxe pitaliyan Xoossaa sunttaa