Daroti ekkanaappe woy gelanaappe kase issippe deꞌoosona. Yaatiyogee eti maayettiyakkonne eranawunne simmidi aqo deꞌuwan ufayttidi deꞌanawu maaddees giidi issoti issoti qoppoosona. Ekkanaappe woy gelanaappe kase issippe deꞌiyogee loꞌꞌobee?

Ha huuphe yohuwan

•  Geeshsha Maxaafay woygii?

•  Kasetidi issippe deꞌiyogee ekkanawu woy gelanawu giigettanaadan inttena maaddanee?

•  Issippe deꞌiyogee miishshaa metuwawu maaddanee?

•  Issippe deꞌiyogee dosenna ura ekkennaadan woy gelennaadan maaddanee?

•  Hegaappe kehiyabi deꞌii?

 Geeshsha Maxaafay woygii?

•   Ekkennan woy gelennan mattumaa gayttana bessennaagaa Geeshsha Maxaafay yootees. Leemisuwawu, “pokkiya tuna nagaraappe baqatanaadan” I yootees. (1 Tasalonqqe 4:3; 1 Qoronttoosa 6:18) Hegee ekkanawu woy gelanawu qoppikkonne issippe deꞌiiddi mattumaa gayttiyageetussikka odettidaba. a Geeshsha Maxaafaa maaray gelennan shahaariyogaappenne ekkennan woy gelennan issippe deꞌiyogee qohiyo harabaappe naagettanaadan maaddees.

•   Ekkiyogee woy geliyogee Xoossay giigissidoba. I hegaa essido wode hagaadan giis: “Asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona.” (Doomettaabaa 2:24) Aqo laggeti issippetettaa minttikko, eta soo asay siiqettananne woppu gaana danddayees.

 Kasetidi issippe deꞌiyogee ekkanawu woy gelanawu giigettanaadan inttena maaddanee?

 Issoti issoti maaddees goosona. Eti so giddon issippe oottiyogan issoy issuwa meeziya loytti akeekana danddayoosona giidi qoppoosona. Gidikkokka, giiga aqo deꞌuwawu keehi maaddiyabay issippetettaa minttiyogaa.

 Issi attumaageenne maccaara saꞌay injjetin injjetana xayin duuxxennan issippe deꞌiyogaa waani meezetana danddayiyoonaa? Issi attumaageenne maccaara eta giddon ooninne issippe deꞌiyogaa awudenne aggana danddayays giidi qoppiiddi, ekkanaappe woy gelanaappe kase issippe deꞌiyogee aqo deꞌoy giiga gidanaadan maaddenna. Shin, eti wayssiyabaa xooniiddi maacettidi issippetettaa minttanawu baaxetikko, eta aqo deꞌoy giiga gidees.

 Keehi koshshiyabaa: Ekkennan woy gelennan issippe deꞌiyageeti shaahettanawu giigettoosonappe attin, aqo deꞌuwawu giigettokkona.

 Geeshsha Maxaafaa maaraa: “Issi asi ay zerikkonne, I hegaa cakkana.”—Galaatiya 6:7.

 Issippe deꞌiyogee miishshaa metuwawu maaddanee?

 Issoti issoti maaddees goosona. Issi xinaatee qonccissiyogaadan Amarkkan deꞌiya tammu gasttatuppe oyddaa gidiyageeti miishsha metuwawu giidi issippe deꞌiyogaa bessees. Gidoppe attin, he asatuppe daroti guutta wodiyawu issippe deꞌikkonne, ekkanawu woy gelanawu etawu miishshi gidennaagaa yootidosona.

 Ekkennan woy gelennan issippe deꞌiyogee macca asaa harabankka metana danddayees. Leemisuwawu, shaahetti simmin naata dichchiyageeti darotoo maccaageeta.

 Keehi koshshiyabaa: Ekkennan woy gelennan issippe deꞌiyogee qohiyobay hegee goꞌꞌiyobaappe keehi aadhdhees.

 Geeshsha Maxaafaa maaraa: “Taani GODAI, ne Xoossai, nena maaddiyaabaa tamaarissiyaagaa.”—Isiyasa 48:17.

 Issippe deꞌiyogee dosenna ura ekkennaadan woy gelennaadan maaddanee?

 Issoti issoti maaddees goosona. Gidoppe attin, “ekkennan woy gelennan issippe deꞌiyogee shaahettanawu metootanaadan oottiyogaa hegaadan deꞌiyageeti darotoo akeekennaagaa” Fayting for Yur Merej giyo maxaafay yootees. Aybissi? Issoti issoti maayettennan deꞌiyogaa akeekana danddayoosona. Shin eti haaridi issippe xeelliyobaa, qanxxiyo keettaa acuwa, woy yelettana haniya naꞌa gaasuwan, hegaappe kehiyabi baawa giidi qoppiyo gishshawu issippe deꞌiyogaa pilggiyageeti akeekidosona. b Hegaa bollikka, “issoti issoti issippe deꞌiyogee keha giidi qoppiyo gishshawu shaahettokkona; gidoppe attin, eti issippe deꞌennaba gidiyakko ekkanaappe woy gelanaappe kase shaahettiigana” yaagidi Fayting for Yur Merej giyo maxaafay gujjidi qonccissees.

 Keehi koshshiyabaa: Ekkanaappe woy gelanaappe kase issippe deꞌiyogee dooroy loꞌꞌanaadan maaddiyaba gidennan, giigenna urappe shaahettanawu metootanaadan oottiyaba.

 Geeshsha Maxaafaa maaraa: “Cincca asi iitaa be7idi, qosetti aattees; shin akeeki paccido asi metuwan gelidi qohettees.”—Leemiso 22:3.

 Hegaappe kehiyabi deꞌii?

 Ekkanaappe woy gelanaappe kase issippe deꞌiyogaa gaasuwan qohettennan, intte aqo deꞌoy giiga gidanaadan maaddiyabaa oottana danddayeeta. Waatidi? Geeshsha Maxaafay eko geluwaban zoriyo ubbabaa oottiyogaana. Intte azinanne machcho gididi issippe deꞌanaappe kase aqo lagge gidanaadan koyiyo ura loytti erana gakkanaashin takki giite. Loꞌꞌo aqo lagge dooranawu keehi koshshiya waannabay mattumaa gayttettaa qaaqqaa xalla qoppidi gidennan, intte issi malabaa qoppiyaageetanne issoy issuwa ammaniyogaa bessiyageeta gidana bessees.

 Azinaynne machchiya shaahettennan ufayttidi deꞌana danddayiyo ogiyan doommanaadan maaddiyabaa Geeshsha Maxaafay zorees. c Leemisuwawu, Geeshsha Maxaafay kaallidi deꞌiya hanotatun maaddiyabaa zorees:

•   Ammanettiyageeta gidennaadan

•   Kehanne loꞌꞌo aqo lagge gidanaadan

•   Issoy issuwa eranawu wodiya aattiyo wode issi uri giigenna asa gidiyogaa akeekanaadan

 Ha yohotubaa gujjada eranawu, jw.org saytiyan “Aqo Deꞌuwanne So Asaa” giya shaahuwa xeella.

 Geeshsha Maxaafaa Maaraa: “Geeshsha Maxaafati ubbay Xoossay kaalettin xaafettidosona, qassi hegeeti tamaarissanawu . . . maaddoosona.”—2 Ximootiyosa 3:16.