Geeshsha Maxaafay yootiyobaa

 Geeshsha Maxaafay yuteneziyabaa yootenna. a Shin Geeshsha Maxaafay deꞌuwabaanne hayquwabaa yootiyobay he yohuwa yiggi xeellanaadan maaddees. Hayquwawu gaaso gidiyogee maara gidenna, shin hayqoy matidaashin ashshanawu keehi baaxetana koshshenna.

 Geeshsha Maxaafay Xoossaa, nuna Medhdhidaagaa, ‘deꞌuwa pulttuwa’ yaagees. (Mazamure 36:9; Oosuwa 17:28) Deꞌoy Xoossaa sinttan keehi alꞌꞌoba. Hegaa gishshawu, shemppo woriyogeekka bana barkka woriyogeekka Xoossaa ufayssennaba. (Kessaabaa 20:13; 1 Yohaannisa 3:15) Hegaa bollikka, Geeshsha Maxaafay nu shemppoykka haratu shemppoykka hayqqennaadan naagettana koshshiyogaa yootees. (Zaarettido Wogaa 22:8) Xoossay I immido deꞌuwa nuuni gitabadan xeellanaadan koyiyogee qoncce.

Issi asi harggidi hayqqana hanikko shin?

 Haray atto hayqqana haniya asa woriyogeekka Geeshsha Maxaafan digettidaba. Israaꞌeela kawuwa Saaꞌoola hanotay hegaa bessees. I olan keehi masunxxido wode bana maaddiyagee woranaadan oychchiis. (1 Sameela 31:3, 4) Shin Saaꞌoola maaddiyagee ixxis giis. Gidoppe attin, guyyeppe hara bitanee Saaꞌooli koyidoogaadan A woraas giidi worddotiis. Hegaa Xoossay waati xeelliyakko akeekiya Daawiti gukkida suuttaa awutiya he bitaniyappe achchiis.—2 Sameela 1:6-16.

Shemppo gamꞌꞌettanawu keehi baaxetana bessii?

 Issi asi hayqqana hanikko, Geeshsha Maxaafay shemppo gamꞌꞌettana koshshees geenna. Shin Geeshsha Maxaafay nuuni qoppana bessiya ginata yootees. Hayqoy nu nagaray kaalettido gita morkke. (Roome 5:12; 1 Qoronttoosa 15:26) Nuuni hayqqanawu amottennaba gidikkokka, Xoossay hayqqidaageeta denttana giido gishshawu, hayquwawu yayyana koshshenna. (Yohaannisa 6:39, 40) Deꞌuwa bonchchiya asi danddayetta keenan loytti akkamettanawu koyees. Shin hayqqana haniya shemppo gamꞌꞌettanawu giidi hegaadan akkamettiyogee koshshenna.

Bana woriyogee atto geetettenna nagaree?

 Akkay, Geeshsha Maxaafay asi bana woriyogee atto geetettenna nagara geenna. Asi bana woriyogee gita nagara gidikkokka, b guuggiya sahoy, keehi unꞌꞌettiyabay woy laattido harggee asi bana woranaadan oottana danddayiyogaa Xoossay akeekees. (Mazamure 103:13, 14) Xoossay azzanidaageeta Geeshsha Maxaafan minttettees. Qassi Geeshsha Maxaafay “Xoossay xillotakka xillo gidennaageetakka hayquwappe denttanaagaa” yootees. (Oosuwa 24:15) Bana woriyogaa mala gita nagaraa oottidaageetikka hayquwappe denddanaagaa hegee bessees.