Geeshsha Maxaafay yootiyoobaa

 Akkay. Xoossay asaa gujjin, dumma dumma mehiyaa doꞌaanne mokkiyaabata “qommuwan qommuwan” medhdhidoogaa Geeshsha Maxaafay yootees. a (Doomettaabaa 1:12, 21, 25, 27; Ajjuutaa 4:11) Qassi asay ubbay nu koyro aawanne aayo gidida, Addaamappenne Hewaanippe yiidoogaakka yootees. (Doomettaabaa 3:20; 4:1) Paxa deꞌiya dumma dumma meretata Xoossay lodda laamiyan medhdhiis giyo qofaa Geeshsha Maxaafay kaafenna. SHin saynisee issi qommo gidida meretatu giddon dummatettay deꞌiyoogaa akeekiis; Geeshsha Maxaafay he qofaa phalqqenna.

•  Xoossay lodda laamiyan medhdhidee?

•  Lodda laamiyaa qofay Geeshsha Maxaafaara maayettii?

•  Mokkiyaabati, mehetinne doꞌati heeraa meezetiyoogaa xeelliyaagan woygana danddayettii?

 Xoossay lodda laamiyan medhdhidee?

 Xoossay deꞌuwan deꞌiyaabata lodda laamiyan medhdhiis giidi ammaniya asay I hegaadan waati medhdhidaakko dumma dummabaa qoppees. Isaykilopidiya Britanika giyo maxaafay yootiyoogaadan, “Xoossay meretata kaalettiyo ogetuppe issoy ‘meretaa dooruwaa’ giyo ogiyaa goꞌettiyoogaana giidi issi issi asay qoppees.”

 Xoossay lodda laamiyan medhdhiis giyoobay kaallidi deꞌiyaabata xaaxi waaxees:

•   Paxa deꞌiyaabay ubbay beni deꞌiya amarida meretatuppe yiis.

•   Paxa deꞌiya issi qommo meretay muleera dumma gidida hara qommo meretawu laamettana danddayees.

•   Ha hanotay Xoossay oottiyooba.

 Lodda laamiyaa qofay Geeshsha Maxaafaara maayettii?

 Xoossay lodda laamiyan medhdhiis giyo qofay, Geeshsha Maxaafan Doomettaabaa maxaafay meretaabaa yootiyoobay muleera likke gidennaagaa bessiyaaba. Gidoppe attin, Yesuusi Doomettaabaa maxaafay yootiyoobay tumu taarike gidiyoogaa odiis. (Doomettaabaa 1:26, 27; 2:18-24; Maatiyoosa 19:4-6) Geeshsha Maxaafay, Yesuusi saꞌaa yaanaappe kase, saluwan Xoossaara deꞌidoogaanne Xoossay “ubbabaa” medhdhiyo wode A maaddidoogaa yootees. (Yohaannisa 1:3) Yaatiyo gishshawu, Xoossay dumma dumma qommo meretata lodda laamiyan medhdhiis giyo qofay Geeshsha Maxaafay tamaarissiyoobaara maayettenna.

 Mokkiyaabati, mehetinne doꞌati heeraa meezetiyoogaa xeelliyaagan woygana danddayettii?

 Geeshsha Maxaafay issi qommo meretatu giddon ay keena dummatettay deꞌana danddayiyaakko yootenna. Qassi Xoossay medhdhido meheti, doꞌatinne mokkiyaabati issoy haraara gayttidi yeliyo wode woy issi heeraa meezetiyo wode, dummatettay merettana danddayiyoogaa odiyo qofaakka phalqqenna. Heeraa meezetiyo he eeshshaa issi issi asay lodda laame qommo oottidi qoppikkokka, ooratta qommo gidida deꞌoy meretti erenna.