Geeshsha Maxaafay yootiyobaa

 Xaaliya biittan Turine kataman deꞌiya afalay Geeshsha Maxaafan odettibeenna. Daroti hegaa Yesuusa ahay xaaxettido liinuwa afalaa giidi qoppoosona. Hegaappe denddidaagan, he afalay Kiristtaaneti keehi geeshsha oottidi xeelliyo buqura gidiis. Ha wodiyan hegee, Xaaliyan Turine kataman kaatediraaliya giyo sohuwan keehi zammaana ogiyan naagettees.

 Turinen deꞌiya afalay tumu Yesuusa anhaa xaaxido afala gidiyogaa Geeshsha Maxaafaa xiqiseti kaafiyonaa? Chii.

 He afalay Geeshsha Maxaafay yootiyobaappe dummatiyogaa bessiya heezzubata ane beꞌoos.

1.   He afalay aaho afala, ayyo zananay 442 santti meetire, gomppay 113 santti meetire, qassi 8 santti meetire gidiya gujo afalay siketti uttiis.

    Geeshsha Maxaafay yootiyobaa: Yesuusa anhay aaho gidida issi afalan gidennan, cora liinuwa afalan xaaxettiis. Yesuusa huuphee hara afalan xaaxettiis. Yesuusi hayquwappe denddi simmin, I kiittidoogeetuppe issoy mela duufuwakko biidi yan “Liinuwa afalay micetti uttidaagaa beꞌiis.” Geeshsha Maxaafay, “Kase A huuphiyan deꞌiya afalay hankko afalaara micetti uttibeenna, shin xaaxettidi barkka deꞌees” yaagees.—Yohaannisa 20:6, 7.

2.   He afalan xokkida suuttaa malaatati deꞌoosona, ayssi giikko anhay meecettennan xaaxettiis geetetti qofettiyo gishshataassa.

    Geeshsha Maxaafay yootiyoba: Yesuusi hayqqido wode A kaalliyageeti “Ayhudatu mooguwa wogaadan” Yesuusa anhaa xaaxidosona. (Yohaannisa 19:39-42) Ayhudatu wogan anhay meecettees qassi zayitiyanninne hara sawiyabatun tiyettees. (Maatiyosa 26:12; Oosuwa 9:37) Hegaa gishshawu, Yesuusa kaalliyageeti A anhaa afalan xaaxanaappe kasetidi meeccidosona giidi qoppiyogee bessiyaba.

3.   He afalan issi bitaniya misile deꞌees. Hegaara gayttidaagan Insaykilopidiya Britanika giyo maxaafay “hiixettidaa afalan issi baggara anhay zinꞌꞌin attida hankko baggan anhaa guyye xaaxettidoogaa” yootees.

    Geeshsha Maxaafay yootiyoba: Yesuusa kaalliyageeti A hayquwabaa, mela duufuwabaa, qassi “I paxa deꞌiyogaa odida kiitanchchata” ba ayfiyan beꞌida maccaaseebaa issippe haasayidosona. (Luqaasa 24:15-24) He afalay Yesuusa duufuwan deꞌiyaba gidiyakko A kaalliyageeti he afalaabaanne he afalaa bolli deꞌiya misiliyabaa haasayanaagee attennaba. Shin, Geeshsha Maxaafay eti hegaabaa haasayidoogaa yootenna.

He afalawu bonchchuwa immiyogee bessiyabee?

 Chii. He afalay Yesuusa anhay xaaxettido afalaa giidi qoppiyakkokka, hegaa bonchchiyogee bala gidiyogaa bessiya Geeshsha Maxaafaa maarata beꞌa.

1.   Hegee koshshiyaba gidenna. Yesuusi, “Xoossay ayyaana, qassi ayyo goynniyageeti ayyaanaaninne tuman goynnana bessees” yaagiis. (Yohaannisa 4:24) Yaattiyo gishshawu, tumu goynuwawu haymaanoote buquratanne malaatata goꞌettana bessenna.

2.   Hegee digettidaba. Tammu azazoti eeqa goynuwa diggoosona. (Zaarettido Wogaa 5:6-10) Geeshsha Maxaafay Kiristtaanetakka “eeqatuppe naagettite” yaagidi azazees. (1 Yohaannisa 5:21) Issoti issoti he afalay bantta ammanuwa shaakki erissiya malaatappe attin eeqa gidenna goosona. Gidikkonne, malaatatikka eta dumma ogiyan bonchchiya urawu eeqa gidana danddayoosona. a Hegaa gishshawu, Xoossaa ufayssana koyiya asi he afala gujjin ay buqurakka dumma ogiyan bonchchana woy goynnana koshshenna.