Geeshsha Maxaafay yootiyobaa

 “Kawotettaa qulppeta” geetettidabay asay ‘Xoossaa Kawotettaa geliyo’ ogiya bessiyo maataa malaatees. (Maatiyosa 16:19; Oosuwa 14:22) a Yesuusi Pheexiroosawu “saluwa Kawotettaa qulppeta” immiis. Hegee Xoossawu ammanettiya asay A geeshsha ayyaanaa ekkidi, saluwa Kawotettaa gelana danddayiyo eraa etawu qonccissiyo maatay Pheexiroosawu imettidoogaa bessees.

Qulppetun oossi dooyidee?

 Pheexiroosi Xoossay immido maatan Kawotettaa geliyo ogiya heezzu citatuyyo bessiis:

1.   Ayhudatanne ammanuwa laammidi Ayhuda gididaageeta. Kawotettaa haaranaadan Xoossay Yesuusa dooridoogaa daro Ayhudati ammanana mala, Yesuusi hayqqi simmin daro takkennan Pheexiroosi eta minttettiis. Pheexiroosi eti attanawu ay oottana bessiyakko yootiis. Yaatiyogan, I Kawotettaa geliyo ogiya etawu bessiis, qassi daro shaꞌu asay “I yootiyobaa ufayttidi” ekkiis.—Oosuwa 2:38-41.

2.   Samaare asaa. Pheexiroosi guyyeppe Samaare asaakko kiitettiis. b Xoossay “etayyo geeshsha ayyaanaa immana mala” inne kiitettida Yohaannisi woossido wodekka I Kawotettaa qulppiyan dooyiis. (Oosuwa 8:14-17) Hegee Kawotettaa gelana danddayiyo ogiya Samaare asawu bessiis.

3.   Hara biittaa asata. Yesuusi hayqqoosappe heezzu layttanne bagga gidin, hara biittaa asaykka (Ayhuda gidenna asay) Kawotettaa gelana danddayiyogaa Xoossay Pheexiroosawu qonccissiis. Yaatin, Pheexiroosi hara biittaa asawu mishiraachchuwa yootiyogan he qulppetuppe issuwan dooyiis; yaatidi, eti geeshsha ayyaanaa ekki Kiristtaane gididi sinttappe Kawotettaa yara gidana mala ogiya bessiis.—Oosuwa 10:30-35, 44, 45.

‘Kawotettaa geliyogaa’ giyogee woygiyogee?

 ‘Kawotettaa geliyageeti’ saluwan Yesuusaara issippe haarana. Geeshsha Maxaafay eti araatan uttidi ‘haaranaagaanne’ ‘kawo gididi saꞌaa haaranaagaa’ yootees.—Luqaasa 22:29, 30; Ajjuutaa 5:9, 10.

Kawotettaa qulppetubaa asay qoppiyo bala qofaa

 Bala qofaa: Kawotettaa qulppetun awude dooyanaakko Pheexiroosi yootin saluwan maacettees.

 Tumaa: Yesuusi Kawotettaa qulppetubaa yootiyo wode Pheexiroosayyo, “Neeni saꞌan qachchiyobay aybinne saluwan qashettana, qassi neeni saꞌan birshshiyobay aybinne saluwan birshshettana” yaagiis. (Maatiyosa 16:19, Zi Niwu Amerikan Baybil) Pheexiroosi yootin saluwan maacettees giidi issoti issoti ha qofaa akeekikkonne, koyro xaafettida Giriiketto qaalay Pheexiroosi maaciyobay saluwagaappe kasetiyaba gidennan, kaalliyaba gidiyogaa bessees.

 Saluwappe azazin Pheexiroosi he qulppetun dooyidogaa Geeshsha Maxaafay hara sohotun yootees. Leemisuwawu, I heezzantto qulppiyan dooyiyo wode Xoossay azazidoogaadan oottiis.—Oosuwa 10:19, 20.