Moota Biibiliya onaakhula awe

 Khahiyo vootakhala woova okhwa maana Biibiliya onihimya wiira Okhwa nwanani ahu. (1 Akorinto 15:26) Ti nthowa naya nimpaka ahu khula etthu wiira nikhapelele okumi ahu. Atthu akina mwaha wa itthu soowoothiwa yiiwale aya ni soolema saya, sinniwiiriha woova okhwa mootepana ni okhala “ipottha okumi aya wotheene”. (Aheeperi 2:15) Woova okhwa mootepana, pooti omwiiriha mutthu ohihakalala. Masi osuwela ekeekhai sa mwaha owo, onoonikhaliherya vanceene. — Yohani 8:32.

Ekeekhai voohimya sa okhwa

•   Atthu akhwiiye khanisuwela etthu. (Isaalimu 146:4) Khivanipirisari woova aahiiso wuupuwela wiira nakhwa vale ninrowa opahiwa omooroni, maana Biibiliya onnilikanyiha okhwa ni orupa. — Isaalimu 13:3; Yohani 11:11-14.

•   Atthu akhwiiye khaniwerya onihaaxa. Hata atthu yaale yaari ootepexa otakhala, khaniwerya opaka etthu nuumala okhwa. (Miruku 21:16) Biibiliya onihimya wiira “onyokha waya ni munkhelo aya womala vamosá n’awo.” — Musuweli 9:6.

•   Biibiliya onihimya wiira atthu akhwiiye, aakhalana nlipelelo. Muluku onrowa waahihimuxa atthu akhwiiye wiira atthikele okhala akumi. — Yohani 5:28, 29; Miteko 24:15.

•   Muluku ooleiherya wiira muhoolo “khunrowa-tho okhala okhwa”. (Wiisuupulula 21:4) Olavulaka sa okathi owo, Biibiliya onihimya so: “Anaxariya animwaakhela elapo, Nave anrowa okhalaka memmo voohimala.” Awo anrowa okhalaka moohakalala ahoovaka okhwa. — Isaalimu 37:29.