Exeeni Biibiliya onihimya awe sa othanla mootaphuwa? Niireke itthu sootheene Muluku toneettiha?

MURUMIHE

Moota Biibiliya onaakhula awe

Muluku oonivaha eparakha ya othanla mootaphuwa opaka itthu nimphavela ahu mookumini mwahu. Tivonto, itthu siniiraneya mookumini mwahu, khahiyo naaroolepeliwa ni Muluku. Nwehe ele Biibiliya oniixuttiha awe.

Muluku aapattunxe apinaatamu iilikanyihaka mmansawe. (Maphattuwelo 1:26) Moovirikana ni inama, hiyo nipattuxiwe wiira niweryeke otakiha mikhalelo sa Muluku, ntoko ophenta ni exariya. Sintoko Muluku, hiyo nookhalana eparakha ya othanla mootaphuwa itthu nimphavela ahu.
Itthu sinrowa oniiraneela muhoolo, sinlipa ni soothanla nimpaka ahu. Biibiliya onnitumererya wiira nihaana othanla omwiiwelela Muluku, aahiiso wiiwelela malamulo awe. (Otumererya 30:19, 20) Eyo enooniherya wiira Muluku, oonivaha eparakha ya othanla opaka itthu nimphavela ahu. Ohiya onikhanyererya omukokhorela, Muluku onihimya so: “Mwaiwelelá soruma saka, oreriwa wanyu wamulikana ni màsi anririha ematta”. — Yesaya 48:18.
Muupuwelo woowi itthu siniiraneya mookumini mwahu niroolepeliwa, khonooniherya nnakhala vakhaani wiira itthu sinooneettela saana aahiiso nnaari. Wiira itthu sineettele saana mookumini mwahu, nihaana wiimananiha. “Sothene sinweryanyu wira ni matat’anyu, mwireke vorera n’ikuru sanyu sothene”. (Musuweli 9:10) Nave-tho Biibiliya onihimya so: “Apalano a mutthu orina ankhili anneetta saana”. — Miruku 21:5.

Othanla opaka itthu nimphavela ahu mootaphuwa, epresenti enikhuma wa Muluku, okhala wiira ninniwerya othanla omurumeela Yehova ni murima ahu wootheene. — Matheyo 22:37.

Kiira Muluku toneettiha itthu sootheene?

Mweekeekhai, Biibiliya onihimya wiira Muluku namwerya sootheene, khuuvo onimukhoottiherya opaka itthu oniphavela awe. (Yoobi 37:23; Yesaya 40:26) Hata vari siiso, owo khonirumeela owerya wawe wiira eettihe itthu sootheene. Mwa ntakiheryo, Biibiliya onihimya wiira Muluku khaapanke etthu okathi atthu a oBabilonia yahaamwiiwelela aya. (Yesaya 42:14) Mwa enamuna emosa-ru, nenna-va, Muluku khoniwiiriha etthu atthu yaale anaahaaxa atthu akina, ni ahinirumeela saana eparakha ela ya othanla opaka itthu mootaphuwa. Masi owo onoorowa waaphukela atthu awo moohipisa. — Isaalimu 37:10, 11.